| ນັກສຶກສາລາວ ທີ່ໂຮງຮຽນມິດຕະພາບ 80 ຈັດບຸນປີໃໝ່ | |
| ບັນດາກິດຈະກໍາເຄື່ອນໄຫວເບິ່ງແຍງດູແລໃຫ້ຜູ້ອອກແຮງງານ, ນັກສຶກສາລາວ ແລະກໍາປູເຈຍ ຕ້ອນຮັບບຸນປີໃໝ່ |
 |
| ນັກສຶກສາລາວຖ່າຍຮູບຢູ່ຈອມພູ Fansipan (ພາບ: vufo.org.vn) |
ສະຖານທູດລາວ ແລະ ຄະນະນັກສຶກສາລາວ ໂຮງຮຽນມິດຕະພາບ T80 ຫາກໍ່ມີການຢ້ຽມຢາມ ແລະ ພົບປະແລກປ່ຽນຢູ່ແຂວງລາວກາຍ. ການເຄື່ອນໄຫວນີ້ໄດ້ຮັບການປະຕິບັດຕາມການສະເໜີຂອງສະຫະພັນບັນດາອົງການຈັດຕັ້ງມິດຕະພາບ ຫວຽດນາມ ເພື່ອແນໃສ່ເພີ່ມທະວີນ້ຳໃຈສາມັກຄີ, ມິດຕະພາບ ລະຫວ່າງປະຊາຊົນ ຫວຽດນາມ - ລາວເວົ້າລວມ ແລະ ລຸ້ນໜຸ່ມສອງປະເທດເວົ້າສະເພາະເນື່ອງໃນໂອກາດສະເຫຼີມສະຫຼອງ 60 ປີແຫ່ງວັນສ້າງການພົວພັນທາງການທູດ, 45 ປີແຫ່ງການລົງນາມສົນທິສັນຍາມິດຕະພາບ ແລະ ການຮ່ວມມືລະຫວ່າງ ຫວຽດນາມ - ລາວ.
ໃນການຢ້ຽມຢາມຄັ້ງນີ້, ບັນດານັກສຶກສາລາວ ໄດ້ໄປຢ້ຽມຢາມດ່ານຊາຍແດນສາກົນທາງບົກເລກ II ກິມແທງ ແລະ ດ່ານຊາຍແດນສາກົນລາວກາຍ, ໄດ້ພົບປະ ແລະ ຮັບຟັງການນຳຄະນະກຳມະການປະຊາຊົນແຂວງລາວກາຍອະທິບາຍບັນດາບັນຫາເຊິ່ງພວກນ້ອງໆມີຄວາມສົນໃຈຄື ບັນດາໂຮງຮຽນທີ່ຮັບສະໝັກນັກສຶກສາລາວສະເພາະໃນບໍລິເວນແຂວງ, ບັນດາໂຄງການຮ່ວມມືລະຫວ່າງ ລາວກາຍ ແລະ ແຂວງທາງທິດເໜືອລາວ, ບົດຮຽນປະສົບການໃນການຟື້ນຟູ ແລະ ພັດທະນາການທ່ອງທ່ຽວຫຼັງໂຄວິດ - 19 ຂອງລາວກາຍ...
ໃນຕອນຄ່ຳວັນທີ 26 ພຶດສະພາ, ນັກສຶກສາ ໂຮງຮຽນ T80 ໄດ້ເຂົ້າຮ່ວມລາຍການພົວພັນແລກປ່ຽນສິລະປະຢູ່ ມະຫາວິທະຍາໄລ ໄທງວຽນ ສາຂາແຂວງ ລາວກາຍ. ໃນລາຍການພົບປະແລກປ່ຽນ, ມີລາຍການສະແດງສິລະປະພົ້ນເດັ່ນ 16 ລາຍການຂອງບັນດານັກສຶກສາສອງປະເທດ ຫວຽດນາມ - ລາວເຊິ່ງສະແດງຢູ່ບົນເວທີ, ບັນດາລາຍການລ້ວນແຕ່ເຂັ້ມຂຸ້ນໄປດ້ວຍສີສັນວັດທະນະທຳທີ່ເປັນມູນເຊື້ອຊົນຊາດຂອງແຕ່ລະປະເທດ.
ພິເສດ, ຄະນະນັກສຶກສາລາວ ໄດ້ໄປຢ້ຽມຢາມຊາປາ, ຮັບປະທານບັນດາເຍື່ອງອາຫານທີ່ມີຊື່ສຽງຢູ່ແຫ່ງນີ້ ແລະ ພິຊິດ ຈອມພູ Fansipan ດ້ວຍກະເຊົ້າລອຍຟ້າ.
ໃນຄະນະຂອງນັກສຶກສາລາວ ທີ່ເຂົ້າຮ່ວມການຢ້ຽມຢາມ ແລະ ພົບປະແລກປ່ຽນຄັ້ງນີ້, ມີນ້ອງໆຫຼາຍຄົນຫາກໍ່ມາຫວຽນາມ ໄດ້ພຽງແຕ່ 4 – 5 ເດືອນ ແລະ ຫາກໍ່ຮຽນພາສາໄດ້ໃນເວລາພຽງເທົ່ານັ້ນ. ແຕ່ວ່າ ພວກນ້ອງສາມາດເວົ້າກ່ຽວກັບການໄປທ່ຽວຄັ້ງນີ້ຢ່າງຈະແຈ້ງ, ຫຼ່ຽນໄຫຼ, ມີຊີວິດຊີວາ ແລະ ເຕັມໄປດ້ວຍຄວາມຮູ້ສຶກທີ່ດີ.
ກີໂນ, ນັກສຶກສາ ຫ້ອງ A5, ໂຮງຮຽນ T80 ເຫັນວ່າ ຕົນເອງຮູ້ສຶກໂຊກດີເມືອໄດ້ເຂົ້າຮ່ວມການພົບປະແລກປ່ຽນ ແລະ ຢ້ຽມຢາມ ຊາປາ - ເຊິ່ງແມ່ນສະຖານທີ່ທ່ອງທ່ຽວທີ່ມີຊື່ສຽງຂອງ ຫວຽດນາມ. ກີໂນແບ່ງປັນວ່າ:
“ນ້ອງໄດ້ຮູ້ຕື່ມອີກກ່ຽວກັບຮີບຄອງປະເພນີ, ປູສະນີຍະສະຖານທີ່ມີຊື່ສຽງຂອງ ລາວກາຍ. ນ້ອງຮູ້ສຶກຕື່ນເຕັ້ນເມື່ອໄດ້ພົບປະແລກປ່ຽນກັບຊາວລາວກາຍ, ທຸກຄົນໄດ້ຕ້ອນຮັບພວກນ້ອງຢ່າງສຸດໃຈ ແລະ ເຮັດໃຫ້ພວກນ້ອງຍິ່ງຢາກໄປທ່ອງທ່ຽວຫຼາຍບ່ອນເພື່ອສາມາດເຂົ້າໃຈແຈ້ງກ່ຽວກັບຫວຽດນາມ”.
ສ່ວນນ້ອງ ຈັນດາລາ ພົມມະຈັນ ນັກສຶກສາລາວ ຮຽນຢູ່ຫ້ອງ A4 ໃຫ້ຮູ້ວ່າ: ການຢ້ຽມຢາມຄັ້ງນີ້, ນ້ອງໄດ້ຮຽນຮູ້ຫຼາຍສິ່ງຫຼາຍຢ່າງ, ພ້ອມທັງສ້າງຄວາມຊົງຈຳທີ່ດີໃຫ້ແກ່ນ້ອງ, ບັນດາເລື່ອງລາວທີ່ໜ້າຈັບໃຈ ແລະ ໃໝ່ອ່ຽມ.
ບຸນຄົງ
