| ສືບຕໍ່ຊຸກຍູ້ການພົວພັນຄູ່ຮ່ວມມື ຫວຽດນາມ - WEF | |
| ການເຄື່ອນໄຫວຂອງທ່ານຮອງນາຍົກລັດຖະມົນຕີຫວຽດນາມ ທີ່ WEF ຄັ້ງທີ 52 |
 |
| ທ່ານຮອງນາຍົກລັດຖະມົນຕີ ເລມິງຄາຍທີ່ກອງປະຊຸມ (ພາບ:TTXVN) |
ທີ່ກອງປະຊຸມ, ທ່ານຮອງນາຍົກລັດຖະມົນຕີ ເລມິງຄາຍ ໄດ້ແບ່ງປັນບັນດາທັດສະນະ ແລະ ການກໍານົດທິດສໍາລັບການພັດທະນາຂອງຫວຽດນາມ, ໃນນັ້ນມີການພັດທະນາຢ່າງວ່ອງໄວ ແລະ ຍືນຍົງ ບົນພື້ນຖານວິທະຍາສາດ - ເຕັກໂນໂລຢີ, ປ່ຽນໃໝ່ຫົວຄິດປະດິດສ້າງ ແລະ ການຫັນເປັນດີຈີຕອນ. ຫວຽດນາມ ຍິນດີ ແລະ ພ້ອມແລ້ວທີ່ຈະສ້າງເງື່ອນໄຂສະດວກເພື່ອໃຫ້ບັນດາອົງການຈັດຕັ້ງ , ວິສາຫະກິດຕ່າງປະເທດ ພ້ອມກັບລັດຖະບານ ແລະ ບັນດາວິສາຫະກິດ ຫວຽດນາມ ຊຸກຍູ້ການພັດທະນາເສດຖະກິດດີຈີຕອນ ໂດຍຜ່ານການບຳລຸງສ້າງແຫຼ່ງຊັບພະຍາກອນມະນຸດດີຈີຕອນ, ການຖ່າຍທອດເຕັກໂນໂລຊີ, ຄົ້ນຄວ້າ - ພັດທະນາ, ຊຸກຍູ້ການປ່ຽນແປງໃໝ່ຫົວຄິດປະດິດສ້າງ...
ໃນວັນດຽວກັນນັ້ນ, ທ່ານຮອງນາຍົກລັດຖະມົນຕີ ເລມິງຄາຍ ໄດ້ມີການພົບປະແລກປ່ຽນຄໍາຄິດເຫັນ ກັບທ່ານປະທານາທິບໍດີ Litva Gitanas Nauseda. ທ່ານຮອງນາຍົກລັດຖະມົນຕີ ໄດ້ສະເໜີໃຫ້ທັງສອງຝ່າຍຕ້ອງຊຸກຍູ້ບັນດາກົນໄກຂອງການຮ່ວມມືສອງຝ່າຍ, ສົມທົບຈັດຕັ້ງບັນດາລາຍການສົ່ງເສີມການຄ້າເພື່ອຊຸກຍູ້ການຮ່ວມມືດ້ານເສດຖະກິດ.
ທີ່ການຕ້ອນຮັບ ທ່ານລັດຖະມົນຕີເສດຖະກິດສະວິດເຊີແລນ Guy Parmelin, ທ່ານຮອງນາຍົກລັດຖະມົນຕີ ເລມິງຄາຍ ຢືນຢັນວ່າ ຫວຽດນາມ ຍາມໃດກໍຖືເປັນສຳຄັນການເພີ່ມທະວີການພົວພັນມິດຕະພາບ ແລະ ການຮ່ວມມືທີ່ເປັນມູນເຊື້ອ ກັບສະວິດເຊີແລນ; ສະເໜີ 2 ຝ່າຍເພີ່ມທະວີບັນດາວິທີການຟື້ນຟູການພົວພັນດ້ານເສດຖະກິດ, ໂດຍສະເພາະແມ່ນບັນດາຂະແໜງການທີ່ສະວິດເຊີແລນ ມີທ່າແຮງ ແລະ ຫວຽດນາມ ມີຄວາມຕ້ອງການເຊັ່ນ ການເງິນ - ທະນາຄານ, ປະກັນໄພ, ອຸດສາຫະກຳປະດິດສ້າງ, ການຢາ, ປຸງແຕ່ງກະເສດຕະພັນ, ການທ່ອງທ່ຽວ...
ການຕ້ອນຮັບ ທ່ານລັດຖະມົນຕີການຕ່າງປະເທດ Peru César Rogrigo Landa Landa, ທ່ານຮອງນາຍົກລັດຖະມົນຕີ ເລມິງຄາຍ ຢືນຢັນວ່າ ຫວຽດນາມ ຍາມໃດກໍຖືເປັນສໍາຄັນ ແລະ ປາດຖະໜາຢາກເພີ່ມທະວີການພົວພັນມິດຕະພາບ ແລະ ຮ່ວມມືກັບເປຣູ ຢ່າງແທ້ຈິງ ແລະ ມີປະສິດທິຜົນກວ່າອີກ. ສອງຝ່າຍເຫັນດີເປັນເອກະພາບຈະສືບຕໍ່ຊຸກຍູ້ການແລກປ່ຽນຄະນະໃນທຸກຂັ້ນ, ບັນດາກະຊວງ, ຂະແໜງການ ແລະ ວິສາຫະກິດຂອງສອງປະເທດ; ສ້າງກອບນິຕິກຳສອງຝ່າຍໃຫ້ສົມບູນແບບເພື່ອນຳການພົວພັນລະຫວ່າງສອງປະເທດເຂົ້າສູ່ລວງເລິກ, ເປັນປົກກະຕິ ແລະ ຍືນຍົງ.
ທີ່ການຕ້ອນຮັບ ທ່ານເລຂາທິການໃຫຍ່ອົງການຮ່ວມມື ແລະ ພັດທະນາ ເສດຖະກິດ (OECD) Mathias Cormann, ທ່ານຮອງນາຍົກລັດຖະມົນຕີ ສະເໜີ OECD ສືບຕໍ່ໜູນຊ່ວຍຫວຽດນາມ ໃນການຜັນຂະຫຍາຍໃຫ້ມີປະສິດທິຜົນສໍາລັບລາຍການຟື້ນຟູການພັດນະທາເສດຖະກິດ - ສັງຄົມ, ໂດຍສະເພາະແມ່ນໃນບັນດາຂະແໜງການທີ່ OECD ມີທ່າແຮງຄື ຈັດຕັ້ງໂຄງປະກອບເສດຖະກິດຄືນໃໝ່, ປ່ຽນໃໝ່ຮູບແບບຂອງການເຕີບໂຕຕາມທິດພັດທະນາວິທະຍາສາດເຕັກໂນໂລຊີ, ປ່ຽນແປງໃໝ່ຫົວຄິດປະດດສ້າງ, ຄຸ້ມຄອງຕະຫຼາດຫຼັກຊັບ, ຄຸ້ມຄອງບໍລິຫານລັດວິສາຫະກິດ ແລະ ຕ້ານການສໍ້ລາດບັງຫຼວງ.
ການຕ້ອນຮັບ ທ່ານ Jan Jambon, ລັດຖະມົນຕີ - ນາຍົກເທດສະມົນຕີເຂດ Flanders, ລາຊະອານາຈັກ ແບນຊິກ, ທ່ານຮອງນາຍົກລັດຖະມົນຕີ ເລມິງຄາຍ ສະເໜີສອງຝ່າຍສືບຕໍ່ຮ່ວມມື ເພື່ອໃຫ້ສັນຍາ EVIPA ໄດ້ຮັບການອະນຸມັດຈາກບັນດາອົງການຂອງ ແບນຊິກ ໂດຍໄວ; ປາດຖະໜາວ່າ ແບນຊິກ ແລະ EU ຈະເພີ່ມທະວີການລົງທຶນຢູ່ພາກພື້ນແມ່ນ້ຳຂອງ ແລະ ເຂດທົ່ງພຽງແມ່ນ້ຳຂອງ, ຊຸກຍູ້ການຮ່ວມມືດ້ານກະສິກຳແບບທັນສະໄໝ, ຊົນລະປະທານທີ່ເໝາະສົມກັບການປ່ຽນແປງຂອງດິນຟ້າອາກາດ, ພັດທະນາພື້ນຖານໂຄງລ່າງສີຂຽວ, ຄຸນນະພາບສູງ; ເພີ່ມທະວີການຮ່ວມມືດ້ານການບຳລຸງສ້າງຊັບພະຍາກອນມະນຸດ.
ຫອມມາລາ
