 |
ບັນຍາກາດການເຜີຍແຜ່.(ພາບ: ກົມເຕັກໂນໂລຊີ ແລະ ນະວັດຕະກໍາ)
ກອງປະຊຸມດັ່ງກ່າວ ໄດ້ຮັບກຽດການເຂົ້າຮ່ວມເປັນປະທານຂອງ ທ່ານ ປອ. ຈັນແສງ ພິມມະວົງ, ຮອງລັດຖະມົນຕີ ກວຕ ແລະ ທ່ານ ດຣ. ພາກພູມ ສີທີມາກຸມ, ຜູ້ບໍລິຫານໂຄງການພັດທະນາແຂວງ ອັດສະຣິຍະ ພ້ອມດ້ວຍຄະນະ. ຈຸດປະສົງຂອງກອງປະຊຸມ ແມ່ນເພື່ອເຜີຍແຜ່ສ້າງຄວາມເຂົ້າໃຈພື້ນຖານຂອງໂຄງການພັດທະນາແຂວງ ອັດສະຣິຍະ (Smart Province) ແລະ ປືກສາຫາລື ເນື້ອໃນຈິດໃຈຂອງໂຄງການດັ່ງກ່າວ ກ່ຽວກັບການສ້າງຕະຫຼາດນະວັນຕະກໍາຜະລິດຕະພັນລາວ ແລະ ສ້າງຂໍ້ມູນໃນດ້ານອື່ນໆ ສໍາລັບບັນດາແຂວງຕ່າງໆ ຂອງ ສປປ ລາວ ເພື່ອແນ່ໃສ່ການປັບປຸງຊີວິດການເປັນຢູ່ຂອງປະຊາຊົນໃຫ້ດີຂື້ນເປັນກ້າວໆ.
ບາງຄໍາເຫັນຂອງ ທ່ານ ຮອງລັດຖະມົນຕີ ໄດ້ກ່າວຢູ່ກອງປະຊຸມ ໄດ້ເນັ້ນເຖິງຄວາມສໍາຄັນຂອງໂຄງການ ຕໍ່ກັບວຽກງານການນໍາໃຊ້ວິທະຍາສາດ ແລະ ເຕັກໂນໂລຊີ ເຊັ່ນ: ການນໍາໃຊ້ເຕັກໂນໂລຊີຂໍ້ມູນຂ່າວສານ ເປັນວິວັດທະນາການ ກ້າວກະໂດດທີ່ນໍາໃຊ້ເຂົ້າໃນການຄົ້ນຄວ້າ ແລະ ພັດທະນາວຽກງານຄຸ້ມຄອງຕິດຕາມກວດກາໃນຂະແໜງການກະສິກໍາ, ດ້ານສິ່ງແວດລ້ອມ, ການຄຸ້ມຄອງຕົວເມືອງ, ການຜະລິດເປັນສິນຄ້າ (ນໍາໃຊ້ເຕັກໂນໂລຊີຂໍ້ມູນຂ່າວສານທີ່ປັດຈຸບັນຍົກລະດັບເປັນລະບົບດິຈິຕ໋ອນ) ແລະ ຂະແໜງການອື່ນໆ ໂດຍຜ່ານການຮ່ວມມື ລະຫວ່າງ ປະເທດທີ່ມີເຕັກໂນໂລຊີກ້າວໜ້າທັນສະໄໝໂດຍນໍາໃຊ້ໂຄງການພັດທະນາແຂວງ ອັດສະລິຍະ ເຂົ້າໃນການພັດທະນາ ເສດຖະກິດ-ສັງຄົມ ໃຫ້ມີປະໂຫຍດ ແລະ ຍືນຍົງ. ເຂົ້າຮ່ວມກອງປະຊຸມຄັ້ງນີ້ມີ ບັນດາຜູ້ຕາງໜ້າຈາກກົມ, ສະຖາບັນ, ຫ້ອງການ ພາຍໃນ ກວຕ 80 ກວ່າຄົນ.
（ແຫຼ່ງຂໍ້ມູນ： ກົມເຕັກໂນໂລຊີ ແລະ ນະວັດຕະກໍາ）
