 |
| ທ່ານນາຍົກລັດຖະມົນຕີ ຫວຽດນາມ ຟ້າມມິງຈິງ ໃຫ້ການຕ້ອນຮັບທ່ານເອກອັກຄະລັດຖະທູດ ອາເມລິກາ ປະຈຳຫວຽດນາມ Marc E. Knapper (ພາບ: VGP) |
ທ່ານນາຍົກລັດຖະມົນຕີ ໄດ້ສະແດງຄວາມຊົມເຊີຍຕໍ່ທ່ານເອກອັກຄະລັດຖະທູດ Marc E.Knapper ທີ່ໄດ້ຮັບການມອບໝາຍໜ້າທີ່ໃໝ່ຈາກທ່ານປະທານາທິບໍດີ Joe Biden ແລະ ກັບຄືນເມືອ ຮ່າໂນ້ຍ ເຮັດວຽກໃນຖານະເປັນເອກອັກຄະລັດຖະທູດ; ທ່ານກໍ່ສະແດງຄວາມເຊື່ອໝັ້ນວ່າ ໃນຖານະຕຳແໜ່ງໃໝ່, ທ່ານເອກອັກຄະລັດຖະທູດຈະສືບຕໍ່ປະກອບສ່ວນເພີ່ມທະວີການພົວພັນຄູ່ຮ່ວມມືຮອບດ້ານລະຫວ່າງສອງປະເທດ.
ທ່ານນາຍົກລັດຖະມົນຕີ ຢືນຢັນຄືນໃໝ່ວ່າ ອາເມລິກາ ແມ່ນໜຶ່ງໃນບັນດາຄູ່ຮ່ວມມືສຳຄັນທີ່ສຸດຂອງ ຫວຽດນາມ, ຫວຽດນາມ ປາດຖະໜາຢາກຮ່ວມກັບ ອາເມລິກາ ສືບຕໍ່ລົງເລິກການພົວພັນຄູ່ຮ່ວມມືຮອບດ້ານ, ມີປະສິດທິຜົນ, ແທດຈິງບົນພື້ນຖານເຄົາລົບເອກະລາດ, ອະທິປະໄຕ, ຜືນແຜ່ນດິນອັນຄົບຖ້ວນ, ລະບອບການເມືອງ ແລະ ຄວາມແຕກຕ່າງຂອງກັນ.
ທ່ານນາຍົກລັດຖະມົນຕີ ສະແດງຄວາມເພິ່ງພໍໃຈຕໍ່ບັນດາຄວາມຄືບໜ້າຂອງການພົວພັນລະຫວ່າງ 2 ປະເທດໃນໄລຍະທີ່ຜ່ານມາ, ໃນນັ້ນ ການພົວພັນດ້ານເສດຖະກິດ - ການຄ້າ ສືບຕໍ່ແມ່ນກຳລັງໜູນສຳຄັນເພື່ອຊຸກຍູ້ການພົວພັນດ້ານການຄ້າລະຫວ່າງ 2 ປະເທດໃນປີ 2021 ເຊິ່ງເປັນຄັ້ງທຳອິດລື່ນກາຍລະດັບ 100 ຕື້ USD ແລະ ບັນລຸລະດັບສະຖິຕິແມ່ນ 111 ຕື້ USD. ສອງປະເທດກໍ່ຮ່ວມມືຢ່າງຕັ້ງໜ້າໃນການປ້ອງກັນ, ຕ້ານການແຜ່ລະບາດຂອງພະຍາດໂຄວິດ-19 ແລະ ການຟື້ນຟູຫຼັງໂລກລະບາດໂຄວິດ - 19. ເນື່ອງໃນໂອກາດນີ້, ໂດຍຕາງໜ້າພັກ, ລັດ ແລະ ປະຊາຊົນຫວຽດນາມ, ທ່ານນາຍົກລັດຖະມົນຕີ ໄດ້ຂອບໃຈລັດຖະບານ ແລະ ປະຊາຊົນ ອາເມລິກາ ທີ່ໄດ້ໜູນຊ່ວຍວັກຊີນນັບສິບລ້ານໂດສ ແລະ ວັດຖຸອຸປະກອນການແພດຕ່າງໆໃນການປ້ອງກັນ ແລະ ຕ້ານໂລກລະບາດໂຄວິດ - 19 ໃຫ້ແກ່ຫວຽດນາມ.
ທ່ານນາຍົກລັດຖະມົນຕີ ຕີລາຄາການຮ່ວມມືແກ້ໄຂຜົນທີ່ຕາມມາຈາກສົງຄາມແມ່ນຈຸດພົ້ນເດັ່ນໃນການພົວພັນຫວຽດນາມ - ອາເມລິກາ, ປະກອບສ່ວນເພີ່ມທະວີຄວາມໄວ້ເນື້ອເຊື່ອໃຈລະຫວ່າງປະຊາຊົນສອງປະເທດ, ໃນຂະນະທີ່ການຮັບມືກັບການປ່ຽນແປງຂອງດິນຟ້າອາກາດໄດ້ກາຍເປັນຂະແໜງການຮ່ວມມືຍຸດທະສາດລະຫວ່າງ 2 ປະເທດ. ໄປຄຽງຄູ່ກັນນັ້ນ, ຂົງເຂດການຮ່ວມມືອື່ນໆຄື: ການສຶກສາ ແລະ ບຳລຸງສ້າງ, ປ້ອງກັນຄວາມສະຫງົບ ແລະ ປ້ອງກັນປະເທດ ສືບຕໍ່ແມ່ນເງື່ອນໄຂສຳຄັນໃນການຊຸກຍູ້ການພົວພັນລະຫວ່າງ 2 ປະເທດ.
ບຸນຄົງ
