 |
ລັດຖະມົນຕີ ກະຊວງການຕ່າງປະເທດ ເຂົ້າຮ່ວມກອງປະຊຸມ ລັດຖະມົນຕີ ຕ່າງປະເທດອາຊຽນ ແລະ ກອງປະຊຸມທີ່ກ່ຽວຂ້ອງ
ພ້ອມນີ້, ໃນຕອນບ່າຍຂອງວັນດຽວກັນ ລັດຖະມົນຕີ ຕ່າງປະເທດເຮົາ ກັບບັນດາລັດຖະມົນຕີອາຊຽນ ອືື່ນໄດ້ພົບປະກັບຜູ້ຕາງໜ້າ ຄະນະກໍາມາທິການ ລະຫວ່າງຊາດອາຊຽນ ວ່າດ້ວຍສິດທິມະນຸດ (AICHR), ເຊິ່ງໄດ້ຮັບຊາບບົດລາຍງານ ປະຈໍາປີ 2019 ແລະ ຖະແຫລງການ ສະເຫລີມສະຫລອງຄົບຮອບ 10 ປີ ຂອງ AICHR. ໃນຕອນຄ່ຳຂອງວັນດຽວກັນ, ທ່ານ ລັດຖະມົນຕີ ສະເຫລີມໄຊ ໄດ້ເຂົ້າຮ່ວມກອງປະຊຸມອາຫານຄ່ຳແບບເຮັດວຽກ, ເຊິ່ງໄດ້ປຶກສາຫາລື 3 ບັນຫາ 1. ຜົນຂອງກອງປະຊຸມ G20 ຢູ່ ເມືອງໂອສະກະ ຍີ່ປຸ່ນ; 2. ຜັນຂະຫຍາຍເອກະສານແນວຄວາມຄິດອາຊຽນ ຕໍ່ຂອບການຮ່ວມມືອິນໂດປາຊີຟິກ; ແລະ 3. ການແກ້ໄຂບັນຫາຄວາມຫຍຸ້ງຍາກ ຢູ່ ລັດຣະຄາຍ ມຽນມາ.
ໃນຕອນເຊົ້າຂອງວັນທີ 31 ກໍລະກົດ 2019, ທ່ານ ສະເຫລີມໄຊ ກົມມະສິດ, ໄດ້ນຳພາຄະນະ ເຂົ້າຮ່ວມພິທີເປີດກອງປະຊຸມ ລັດຖະມົນຕີຕ່າງປະເທດອາຊຽນ ຄັ້ງທີ 52 ຢ່າງເປັນທາງການ ແລະ ສືບຕໍ່ເຂົ້າຮ່ວມກອງປະຊຸມ ລັດຖະມົນຕີຕ່າງປະເທດ ອາຊຽນແບບຄົບຄະນະ ຄັ້ງທີ 52 ແລະ ກອງປະຊຸມແບບວົງແຄບ. ກອງປະຊຸມລັດຖະມົນຕີ ຕ່າງປະເທດຄົບຄະນະ ຄັ້ງທີ 52 ໄດ້ຕີລາຄາສູງຕໍ່ການຈັດຕັ້ງປະຕິບັດ ຜົນກອງປະຊຸມສຸດຍອດອາຊຽນ ຄັ້ງທີ 34 ຜ່ານມາ ໂດຍສະເພາະ ການສືບຕໍ່ສ້າງປະຊາຄົມອາຊຽນ ໃຫ້ມີຄວາມເຂັ້ມແຂງ ທີ່ ປິ່ນອ້ອມບັນ ດາບູລິມະສິດການເປັນປະທານອາຊຽນຂອງ ໄທ ປີ 2019 ພາຍໃຕ້ຄຳຂວັນ: “ຮ່ວມແຮງຮ່ວມໃຈ ກ້າວໄກຍືນຍົງ” ເຊັ່ນ: ການພັດທະນາແບບຍືນຍົງ, ການເຊື່ອມສານລະຫວ່າງ ວິໄສທັດອາຊຽນ 2025 ແລະ ເປົ້າໝາຍການພັດ ທະນາແບບຍົນຍົງ 2030 ຂອງ ສປຊ. ພ້ອມນີ້, ກອງປະຊຸມ ຍັງໄດ້ເອກະພາບກັນຕໍ່ການກະກຽມດ້ານເນື້ອໃນ ແລະ ພິທີການໃຫ້ແກ່ ກອງປະຊຸມລັດຖະມົນຕີ ກັບຄູ່ເຈລະຈາ (PMC) ໃນວັນທີ 1-2 ສິງຫາ 2019, ກອງປະຊຸມສະມັດຊາໃຫຍ່ອົງການ ສປຊ ຄັ້ງທີ 74 ແລະ ກອງປະຊຸມສຸດຍອດອາຊຽນ ຄັ້ງທີ 35 ໃນເດືອນກັນຍາ ແລະ ເດືອນພະຈິກ 2019 ຕາມລໍາດັບ.
ພິເສດ, ກອງປະຊຸມລັດຖະມົນຕີ ຕ່າງປະເທດອາຊຽນ ຄັ້ງທີ 52 ນີ້ ໄດ້ຮັບຮອງເອົາຖະແຫລງການຮ່ວມ ຂອງກອງປະຊຸມລັດຖະມົນຕີຕ່າງປະເທດ ຄັ້ງທີ 52; ຮັບຊາບບົດລາຍງານ ການປະເມີນຄວາມຄືບໜ້າ ໃນການຮັດແຄບຄວາມແຕກໂຕນພາຍໃນອາຊຽນ; ແລະ ໄດ້ຮັບຮອງເອົາແຜນງານໂຄງບູລິມະສິດ ແລະ ແຜນງົບປະມານປະ ຈຳປີ 2020 ຂອງຄະນະກຳມະທິການ ລະຫວ່າງລັດຖະບານອາຊຽນ ວ່າດ້ວຍສິດທິມະນຸດ ຫລື ໄອຈາ (AICHR).
ໃນກອງປະຊຸມລັດຖະມົນຕີ ຕ່າງປະເທດອາຊຽນແບບວົງແຄບ ບັນດາລັດຖະມົນຕີ ໄດ້ແລກປ່ຽນທັດສະນະນຳກັນຢ່າງກົງໄປກົງມາ ຕໍ່ບັນຫາພົ້ນເດັ່ນຢູ່ພາກພື້ນ ແລະ ສາກົນ ທີ່ມີຄວາມສົນໃຈຮ່ວມກັນ, ເຊັ່ນບັນຫາແຫລມເກົາຫລີ, ທະເລຈີນໃຕ້, ບັນຫາອາຊະຍາກຳຂ້າມຊາດ, ການຕ້ານການກໍ່ການຮ້າຍ ແລະ ລັດທິຫົວຮຸນແຮງ, ສະພາບການຢູ່ຕາເວັນອອກກາງ, ການປ່ຽນແປງດິນຟ້າອາກາດ ແລະ ອື່ນໆ.
ໃນຕອນບ່າຍຂອງວັນດຽວກັນ, ບັນດາລັດຖະມົນຕີຕ່າງປະເທດອາຊຽນ ໄດ້ຮ່ວມລົງນາມເພື່ອຮັບເອົາປະ ເທດເປຣູ ເຂົ້າເປັນພາຄີສົນທິສັນຍາໄມຕີຈິດ ແລະ ການຮ່ວມມືອາຊີຕາເວັນອອກສ່ຽງໃຕ້ (TAC); ແລະ ເຂົ້າຮ່ວມພິທີເປີດທຶນການສຶກສາຜູ້ນໍາໜຸ່ມນ້ອຍ ອາຊຽນ-ຈີນ; ແລະ ພິທິປະກາດ ຂໍ້ລິເລີ່ມ ອາຊຽນ-ອົດສະຕາລີ ກ່ຽວກັບ ການຕ້ານການຄ້າມະນຸດ.
（ແຫຼ່ງຂໍ້ມູນ： ຂປລ）
