ການພົວພັນຫວຽດນາມ - ຍີ່ປຸ່ນ ພວມຢູ່ໃນໄລຍະທີ່ດີທີ່ສຸດ

19:28 | 24/03/2022

ຍສໝ - ຕອນເຊົ້າວັນທີ 22 ມີນາ, ຢູ່ຮ່າໂນ້ຍ, ສະມາຄົມມິດຕະພາບ ຫວຽດນາມ - ຍີ່ປຸ່ນ (ສະຫະພັນບັນດາອົງການມິດຕະພາບ ຫວຽດນາມ) ໄດ້ຈັດຕັ້ງກອງປະຊຸມໃຫຍ່ຜູ້ແທນທົ່ວປະເທດຄັ້ງທີ 7 ອາຍຸການ 2021 – 2026 ແບບໂດຍກົງ ແລະ ທາງໄກ.

	ສືບຕໍ່ຊຸກຍູ້ການພົວພັນຕ່າງປະເທດລະຫວ່າງປະຊາຊົນຫວຽດນາມ - ເມັກຊິໂກ
	ຫວຽດນາມຖືເປັນສຳຄັນ ແລະ ມີຄວາມຫວັງຢາກເຮັດໃຫ້ການພົວພັນມິດຕະພາບທີ່ເປັນມູນເຊື້ອກັບ ຣູມານີ ເລິກເຊິ່ງກ່ວາອີກ

ການພົວພັນຫວຽດນາມ - ຍີ່ປຸ່ນ ພວມຢູ່ໃນໄລຍະທີ່ດີທີ່ສຸດ

ທ່ານນາງ ຫົວໜ້າຄະນະຈັດຕັ້ງສູນກາງ ເຈືອງທິມາຍ ກ່າວຄຳເຫັນທີ່ກອງປະຊຸມ (ພາບ: TTXVN)

ເຂົ້າຮ່ວມກອງປະຊຸມໃຫຍ່ມີ: ກຳມະການກົມການເມືອງ, ເລຂາທິການສູນກາງພັກ, ຫົວໜ້າຄະນະຈັດຕັ້ງສູນກາງ, ປະທານກຸ່ມສະມາຊິກລັດຖະສະພາ ມິດຕະພາບ ຫວຽດນາມ - ຍີ່ປຸ່ນ ເຈືອງທິມາຍ; ກໍາມະການສູນກາງພັກ, ຮອງນາຍົກລັດຖະມົນຕີ ເລວັນແທ່ງ; ຜູ້ຕາງໜ້າບັນດາການນຳຂອງຄະນະສູນກາງ, ກະຊວງ, ຂະແໜງການ ແລະ ອົງການຈັດຕັ້ງມະຫາຊົນ; ຜູ້ຕາງໜ້າຄະນະພັກນະຄອນ ຮ່າໂນ້ຍ, ການນຳບາງທ້ອງຖິ່ນ.

ໂດຍມີການເຂົ້າຮ່ວມຂອງທ່ານ Yamada Takio, ເອກອັກຄະລັດຖະທູດ ຍີ່ປຸ່ນ ປະຈຳ ຫວຽດນາມ ແລະ ຜູ້ຕາງໜ້າບັນດາອົງການຈັດຕັ້ງຍີ່ປຸ່ນ ປະຈຳ ຫວຽດນາມ.

ກອງປະຊຸມໃຫຍ່ມີຄວາມເປັນກຽດໄດ້ຮັບກະຕ່າດອກໄມ້ອວຍພອນຈາກທ່ານນາຍົກລັດຖະມົນຕີ ຟ້າມມິງຈິງ.

ທີ່ກອງປະຊຸມ, ບັນດາຜູ້ແທນໄດ້ເລືອກຕັ້ງຄະນະບໍລິຫານງານ ລວມມີກຳມະການ 62 ທ່ານ, ຄະນະນຳລວມມີປະທານ, ຮອງປະທານ 5 ທ່ານ, ເລຂາທິການ, ຄະນະກວດກາສະມາຄົມ ລວມມີ 3 ທ່ານ. ທ່ານ ໂຕຮູຍເຣືອ, ອະດີດກຳມະການກົມການເມືອງ, ອະດີດເລຂາທິການຄະນະບໍລິຫານງານສູນກາງພັກ, ອະດີດຫົວໜ້າຄະນະຈັດຕັ້ງສູນກາງ, ປະທານສະມາຄົມມິດຕະພາບ ຫວຽດນາມ - ຍີ່ປຸ່ນ ໄດ້ຮັບຄວາມໄວ້ເນື້ອເຊື່ອໃຈໃຫ້ສືບຕໍ່ເລືອກຕັ້ງເປັນປະທານ ສະໄໝທີ VII.

ກ່າວຄຳເຫັນທີ່ກອງປະຊຸມ, ທ່ານປະທານສະສະມາຄົມຊຸດທີ 6 ອາຍຸການ 2015-2021 ໂຕຮູຍເຣືອ ຢືນຢັນວ່າ ການພົວພັນລະຫວ່າງ ຫວຽດນາມ - ຍີ່ປຸ່ນ ພວມພັດທະນາຢ່າງດີງາມທີ່ສຸດ. ສອງປະເທດໄດ້ຮ່ວມມືກັນຢ່າງແໜ້ນແຟ້ນຢູ່ບັນດາເວທີປາໄສສາກົນ ແລະ ພາກພື້ນ, ພິເສດແມ່ນຢູ່ສະຫະປະຊາຊາດ ແລະ ອາຊຽນ; ຊຸກຍູ້ການເຊື່ອມໂຍງເສດຖະກິດ, ລົງນາມໃນສັນຍາຄູ່ຮ່ວມມືເສດຖະກິດຮອບດ້ານພາກພື້ນ (RCEP). ຍີ່ປຸ່ນ ແມ່ນບ່ອນທີ່ປະຊາຄົມຊາວຫວຽດນາມ ອາໄສ ແລະ ເຮັດວຽກ 450.000 ຄົນ, ໃນນັ້ນຈຳນວນນັກຝຶກງານໄດ້ເພີ່ມຂຶ້ນຢ່າງວ່ອງໄວ ດ້ວຍກ່ວາ 200.000 ຄົນ, ເປັນອັນດັບໜຶ່ງໃນຈຳນວນນັກຝຶກງານຢູ່ ຍີ່ປຸ່ນ.

ກ່າວຄຳເຫັນທີ່ກອງປະຊຸມ, ທ່ານເອກອັກຄະລັດຖະທູດ ຍີ່ປຸ່ນ ປະຈຳ ຫວຽດນາມ Yamada Takio ຢືນຢັນວ່າ ການພົວພັນລະຫວ່າງ 2 ປະເທດ ໄດ້ຮັບການຕີລາຄາວ່າ “ຄວາມສາມາດບົ່ມຊ້ອນບໍ່ມີຂີດຈຳກັດ” ແລະ ພວມກ້າວເຂົ້າສູ່ໄລຍະສຳຄັນເພື່ອພັດທະນາຢ່າງເຂັ້ມແຂງກວ່າ.

ທ່ານເອກອັກຄະລັດຖະທູດ Yamada Takio ໄດ້ຕີລາຄາວ່າ: ການພົວພັນອັນດີງາມລະຫວ່າງ 2 ປະເທດໄດ້ຮັບການກໍ່ສ້າງໃນທຸກຂົງເຂດ, ທຸກຂັ້ນ ແລະ ສືບຕໍ່ໄດ້ຮັບການສືບທອດກັນມາ. ສະມາຄົມມິດຕະພາບຫວຽດນາມ - ຍີ່ປຸ່ນ ມີບົດບາດອັນໃຫຍ່ຫຼວງ, ປະກອບສ່ວນຮັກສາ ແລະ ເພີ່ມທະວີການພົວພັນລະຫວ່າງ ຍີ່ປຸ່ນ - ຫວຽດນາມ. ປີ 2023, ຫວຽດນາມ - ຍີ່ປຸ່ນ ສະເຫຼີມສະຫຼອງ 50 ປີແຫ່ງວັນສ້າງຕັ້ງການພົວພັນທາງການທູດ, ທ່ານເອກອັກຄະລັດຖະທູດ Yamada Takio ຫວັງວ່າເຫດການນີ້ຈະເປັນໂອກາດເພື່ອແນໃສ່ຊຸກຍູ້ການພົວພັນລະຫວ່າງ 2 ປະເທດກ່ວາອີກ, ຊ່ວຍໃຫ້ປະຊາຊົນ 2 ປະເທດມີຄວາມເຂົ້າໃຈ ແລະ ຮັດແໜ້ນການພົວພັນຄູ່ຮ່ວມມືຮອບດ້ານກ່ວາອີກ. .

ກ່າວຄຳເຫັນທີ່ກອງປະຊຸມ,ທ່ານນາງ ຫົວໜ້າຄະນະຈັດຕັ້ງສູນກາງ ເຈືອງທິມາຍ ຊີ້ແຈ້ງວ່າ: ກອງປະຊຸມໃຫຍ່ໄດ້ດຳເນີນໄປໃນສະພາບການທີ່ການພົວພັນຫວຽດນາມ - ຍີ່ປຸ່ນ ພວມພັດທະນາຢ່າງດີງາມ, ຮອບດ້ານ ແລະ ໝັ້ນຄົງເຂັ້ມແຂງ. ຍີ່ປຸ່ນ ສືບຕໍ່ແມ່ນຄູ່ຮ່ວມມືດ້ານເສດຖະກິດແຖວໜ້າຂອງ ຫວຽດນາມ, ແມ່ນຄູ່ຮ່ວມມືໜູນຊ່ວຍດ້ານການພັດທະນາ (ODA) ໃຫຍ່ກວ່າໝູ່, ເປັນນັກລົງທຶນຕ່າງປະເທດໃຫຍ່ອັນດັບ 2, ແມ່ນຄູ່ຮ່ວມມືດ້ານການທ່ອງທ່ຽວໃຫຍ່ທີ 3 ແລະ ທີສີ່ດ້ານການຄ້າ.

ການຮ່ວມມືໃນຂົງເຂດການສຶກສາ, ປ້ອງກັນຄວາມສະຫງົບ, ພັດທະນາຊັບພະຍາກອນມະນຸດ, ການຮັບມືການປ່ຽນແປງຂອງດິນຟ້າອາກາດ, ການຮ່ວມມືລະຫວ່າງທ້ອງຖິ່ນບັນລຸໄດ້ບັນດາໝາກຜົນທີ່ຕັ້ງໜ້າໂດຍຜ່ານຫຼາຍກົນໄກສຳຄັນ, ເພີ່ມທະວີການຮ່ວມມືທີ່ເວທີປາໄສຫຼາຍຝ່າຍຂອງສະຫະປະຊາຊາດ, ອາຊຽນ, APEC... ສອງປະເທດຍັງໄດ້ຮ່ວມມືກັນໃນການປ້ອງກັນ, ຄວບຄຸມ ແລະ ຫຼຸດຜ່ອນຜົນຮ້າຍຢ້ອນຫຼັງຈາກພະຍາດໂຄວິດ-19, ບັນລຸໄດ້ໝາກຜົນຫຼາຍຢ່າງ. ການພົວພັນລະຫວ່າງ ຫວຽດນາມ - ຍີ່ປຸ່ນ ພວມຢູ່ໃນໄລຍະທີ່ດີທີ່ສຸດ ແລະ ຍັງມີຄວາມສາມາດບົ່ມຊ້ອນ ແລະ ກາລະໂອກາດຫລາຍຢ່າງ ເພື່ອສືບຕໍ່ເພີ່ມທະວີການພົວພັນມິດຕະພາບ ແລະ ຄວາມໄວ້ເນື້ອເຊື່ອໃຈທີ່ໄດ້ມີມາແລ້ວ. ນີ້ແມ່ນໝາກຜົນອັນໃຫຍ່ຫຼວງພາຍຫຼັງຄວາມມານະພະຍາຍາມຂອງສອງປະເທດໃນຫຼາຍປີມານີ້, ໃນນັ້ນມີການປະກອບສ່ວນຂອງສະມາຄົມມິດຕະພາບ ຫວຽດນາມ - ຍີ່ປຸ່ນ.

ຫົວໜ້າຄະນະຈັດຕັ້ງສູນກາງ ຢືນຢັນວ່າ, ໃນເກືອບ 60 ປີແຫ່ງການເຄື່ອນໄຫວ, ແຕ່ວັນທີ 23 ເມສາ 1965, ສະມາຄົມມິດຕະພາບ ຫວຽດນາມ - ຍີ່ປຸ່ນ ໄດ້ປະກອບສ່ວນສຳຄັນເຂົ້າໃນການເພີ່ມທະວີການພົວພັນມິດຕະພາບ ແລະ ຄວາມໄວ້ເນື້ອເຊື່ອໃຈເຊິ່ງກັນ ແລະ ກັນລະຫວ່າງປະຊາຊົນສອງປະເທດ; ປະກອບສ່ວນຮັດແໜ້ນ ແລະ ພັດທະນາການພົວພັນລະຫວ່າງສອງປະເທດ, ປະຕິບັດແນວທາງການຕ່າງປະເທດຂອງພັກ ແລະ ລັດຢ່າງມີປະສິດທິຜົນ.

ທ່ານາງ ເຈືອງທິມາຍ ເຊື່ອໝັ້ນວ່າ ຄະນະບໍລິຫານງານ, ຄະນະປະຈຳ, ປະທານສະມາຄົມຂອງອາຍຸການໃໝ່ ຈະສືບຕໍ່ນຳພາສະມາຄົມບັນລຸໄດ້ຜົນງານຫຼາຍຢ່າງ, ປະກອບສ່ວນຢ່າງແທດຈິງເຂົ້າໃນການພົວພັນລະຫວ່າງສອງປະເທດ ຫວຽດນາມ ແລະ ຍີ່ປຸ່ນ ໃຫ້ສືບຕໍ່ພັດທະນາຂຶ້ນສູ່ລະດັບສູງໃໝ່, ເພື່ອຜົນປະໂຫຍດຂອງປະຊາຊົນສອງປະເທດ, ເພື່ອສັນຕິພາບ, ສະຖຽນລະພາບ, ການຮ່ວມມື ແລະ ພັດທະນາແບບຍືນຍົງຢູ່ພາກພື້ນ ແລະ ໃນໂລກ.

ໃນໂອກາດນີ້, ສະມາຄົມມິດຕະພາບ ຫວຽດນາມ - ຍີ່ປຸ່ນ ໄດ້ເປັນກຽດຕ້ອນຮັບໃບຍ້ອງຍໍຂອງທ່ານນາຍົກລັດຖະມົນຕີ ໂດຍຜົນງານດີເດັ່ນໃນອາຍຸການຜ່ານມາ.

ບຸນຄົງ