| WB ຄາດວ່ານັບແຕ່ປີ 2022, ເສດຖະກິດຫວຽດນາມຈະຟື້ນຟູກັບຄືນລະດັບ 6,5 – 7% | |
| WB: ຫວຽດນາມ ແມ່ນໜຶ່ງໃນບັນດາພື້ນຖານເສດຖະກິດເຕີບໂຕໄວທີ່ສຸດໃນໂລກ |
ດ້ວຍສົມມຸດຖານທີ່ວ່າ ໂຄວິດ-19 ຖືກຄວບຄຸມຂ້ອນຂ້າງດີພາຍໃນປະເທດ ແລະ ໃນທົ່ວໂລກ, WB ຄາດຄະເນ GDP ຫວຽດນາມປີນີ້ຈະເພີ່ມຂຶ້ນ 5,5%.
ລະດັບການຄາດຄະເນຂອງທະນາຄານໂລກ - WB ປັດຈຸບັນຕ່ຳກວ່າເປົ້າໝາຍທີ່ລັດຖະບານກຳນົດອອກແມ່ນ 6,5-7%, ກໍຄືຕົວເລກທີ່ຄາດໄວ້ຂອງບັນດາອົງການຈັດຕັ້ງເຊັ່ນ HSBC (6,5%), Standard Chartered (6,7%).
 |
| ພາບປະກອບ: vtv.vn |
ຕາມການລາຍງານໃນວັນທີ 13 ມັງກອນ ຂອງ WB, ຂົງເຂດການບໍລິການຂອງຫວຽດນາມຈະຄ່ອຍຟື້ນຕົວເມື່ອຜູ້ຊົມໃຊ້ ແລະ ນັກລົງທຶນ ໄດ້ຄວາມເຊື່ອໝັ້ນຄືນມາ, ໃນຂະນະທີ່ຂົງເຂດອຸດສາຫະກຳການປຸງແຕ່ງ, ການຜະລິດ ໄດ້ຮັບຜົນປະໂຫຍດໂດຍອາໄສຄວາມຮຽກຮ້ອງຕ້ອງການທີ່ຍືນຍົງຈາກອາເມລິກາ, EU ແລະ ຈີນ. ຂະແໜງກະສິກຳຄາດວ່າຈະສືບຕໍ່ເຕີບໂຕດ້ວຍລະດັບຂອງໄລຍະ 2020-2021, ທີ່ນຳເອົາການປະກອບສ່ວນເລັກນ້ອຍ ແຕ່ໝັ້ນຄົງໃຫ້ແກ່ການເຕີບໂຕ.
ການຂາດດູນງົບປະມານ ແລະ ໜີ້ສິນລວມ ຄາດວ່າຈະຮັກສາອັດຕາສ່ວນໜີ້ສິນຕໍ່ GDP ທີ່ຄາດໄວ້ແມ່ນ 58,8%, ຕ່ຳກວ່າຫຼາຍທຽບກັບລະດັບເພດານຕາມທີ່ກຳນົດໄວ້.
WB ຕີລາຄາຂະບວນການຟື້ນຕົວເສດຖະກິດຂອງຫວຽດນາມ ຈະໄດ້ຮັບການສະໜັບສະໜູນດ້ວຍນະໂຍບາຍຜ່ອນຜັນທາງການເງິນກວ່າ, ຢ່າງໜ້ອຍກໍໃນເຄິ່ງປີຕົ້ນ 2022. ແນວໃດກໍຕາມ, ອົງການຈັດຕັ້ງນີ້ຍັງບໍ່ພິຈາລະນາກ່ຽວກັບແຜນການສະໜັບສະໜູນແກ່ຍາວໃນ 2 ປີ ຂອງຫວຽດນາມ ເພາະວ່າໄລຍະການສ້າງບົດລາຍງານ ແຜນການສະໜັບສະໜູນຍັງບໍ່ທັນໄດ້ຮັບການປະກາດໃຊ້ທາງດ້ານຂອບເຂດ ແລະ ເນື້ອໃນ.
ເຖິງແມ່ນວ່າແນວນັ້ນ, ແນວໂນ້ມການເຕີບໂຕຂອງຫວຽດນາມ ຍັງຄົງເຕັມໄປດ້ວຍຄວາມສ່ຽງຫຼາຍຢ່າງ, ເປັນຕົ້ນແມ່ນຕໍ່ໜ້າສະພາບການຜັນແປທີ່ບໍ່ທັນຈະແຈ້ງຂອງພະຍາດລະບາດ. ການແຜ່ລາມຂອງພະຍາດສາຍພັນໃໝ່ອາດຈະພາໄປສູ່ການກຳນົດບັນດາມາດຕະການເວັ້ນໄລຍະຫ່າງໃນສັງຄົມ, ເປັນຜົນສະທ້ອນເຖິງການເຄື່ອນໄຫວທາງເສດຖະກິດ. ຄວາມຮຽກຮ້ອງຕ້ອງການພາຍໃນປະເທດທີ່ຕ່ຳກວ່າທີ່ຄາດໄວ້ ອາດຈະສົ່ງຜົນສະທ້ອນເຖິງຂະບວນການຟື້ນຕົວຂອງຫວຽດນາມ.
ນອກຈາກນັ້ນ, ຫຼາຍຄູ່ຮ່ວມມືການຄ້າຂອງຫວຽດນາມກຳລັງປະເຊີນໜ້າກັບສະພາບງົບປະມານ ແລະ ເງິນຕາທີ່ຫົດຕົວລົງ, ອາດຈະຈຳກັດຄວາມສາມາດໃນການສືບຕໍ່ສະໜັບສະໜູນພື້ນຖານເສດຖະກິດຂອງບັນດາປະເທດນີ້ ຖ້າສະພາບວິກິດການຍັງແກ່ຍາວ, ສິ່ງນີ້ອາດຈະເຮັດໃຫ້ມີຄວາມຊັກຊ້າໃນການຟື້ນຕົວຂອງທົ່ວໂລກ ແລະ ເຮັດໃຫ້ຄວາມຕ້ອງການຫຼຸດຖອຍລົງສຳລັບສິນຄ້າທີ່ສົ່ງອອກຂອງຫວຽດນາມ.
ທະນາຄານໂລກເຊື່ອວ່າບັນດານະໂຍບາຍຕອບໂຕ້ທີ່ຮອບຄອບ ສາມາດຫຼຸດຜ່ອນຄວາມສ່ຽງຂ້າງເທິງ. ບັນດາມາດຕະການທາງດ້ານນະໂຍບາຍການເງິນຈະສະໜັບສະໜູນຄວາມຕ້ອງການລວມພາຍໃນປະເທດ, ໃນນັ້ນມີການຫຼຸດຜ່ອນອັດຕາພາສີອາກອນມູນຄ່າເພີ່ມ (VAT) ແລະ ເພີ່ມການໃຊ້ຈ່າຍໃຫ້ແກ່ສາທາລະນະສຸກ ແລະ ການສຶກສາ.
ບັນດາການສະໜັບສະໜູນສະເພາະໃຫ້ວິສາຫະກິດ ແລະ ປະຊາຊົນທີ່ຖືກຜົນກະທົບ ກໍຄວນມີຂອບເຂດກວ້າງກວ່າ ແລະ ມີຈຸດສູມກວ່າ. ບັນດາກິດຈະການສັງຄົມສົງເຄາະ ຕ້ອງກຳນົດຖືກຕາມກຸ່ມເປົ້າທີ່ຕ້ອງການຊ່ວຍເຫຼືອ ແລະ ຈັດຕັ້ງປະຕິບັດຢ່າງມີປະສິດທິຜົນກວ່າ ເພື່ອແກ້ໄຂຜົນກະທົບທາງສັງຄົມທີ່ຮຸນແຮງຕ່າງໆ ແລະ ບໍ່ສະເໝີພາບຂອງວິກິດການ. ຄວາມສ່ຽງທີ່ກຳລັງເພີ່ມຂຶ້ນໃນຂົງເຂດການເງິນກໍຄວນໄດ້ຕິດຕາມກວດສອບຢ່າງລະອຽດ ແລະ ເປັນເຈົ້າການໃນການແກ້ໄຂ.
ວິລະຊົນ
