| ຊາວໜຸ່ມຫວຽດນາມ - ລາວ: ເພີ່ມທະວີການແລກປ່ຽນມິດຕະພາບ ແລະ ພ້ອມກັນພັດທະນາ |
ນີ້ແມ່ນການຢ້ຽມຢາມຫວຽດນາມ ຄັ້ງທຳອິດຂອງທ່ານນາຍົກລັດຖະມົນຕີລາວ ພັນຄຳ ວິພາວັນ ໃນຖານະຕຳແໜ່ງໃໝ່, ກໍ່ເປັນການຢ້ຽມຢາມຄັ້ງທຳອິດຂອງການນຳຂັ້ນສູງຕ່າງປະເທດມາຫວຽດນາມ ໃນປີ 2022.
ການຢ້ຽມຢາມກໍ່ສະແດງໃຫ້ເຫັນຄວາມຕັດສິນໃຈຂອງການນຳຂັ້ນສູງສອງປະເທດໃນການຊຸກຍູ້ສາຍພົວພັນແບບພິເສດຫວຽດນາມ - ລາວ ເຂົ້າສູ່ລວງເລິກ, ແທດຈິງ ແລະ ຜັນຂະຫຍາຍຖະແຫຼງການຮ່ວມ ຫວຽດນາມ - ລາວ ເດືອນ ມິຖຸນາ 2021 ຢ່າງມີປະສິດທິຜົນ. ການຢ້ຽມຢາມກໍ່ແມ່ນເຫດການທີ່ມີຄວາມໝາຍເປັນຄັ້ງທຳອິດໃນຂອບເຂດປີສາມັກຄີມິດຕະພາບ ຫວຽດນາມ - ລາວ; ລາວ - ຫວຽດນາມ ເພື່ອຮັດແໜ້ນ ແລະ ເພີ່ມທະວີສາຍພົວພັນແບບພິເສດລະຫວ່າງ ສອງປະເທດໃນສະພາບການໂລກ ແລະ ພາກພື້ນທີ່ນັບມື້ນັບສັບສົນຄືປະຈຸບັນ.
ຫວນຄືນສາຍພົວພັນຕ່າງໆໃນໂລກ, ການພົວພັນລະຫວ່າງ ຫວຽດນາມ ແລະ ລາວ ໄດ້ກາຍເປັນສາຍພົວພັນທີ່ຫາຍາກດ້ວຍຄວາມສາມັກຄີ, ສັດຊື່ບໍລິສຸດ ລະຫວ່າງສອງພັກ, ສອງລັດ ແລະ ປະຊາຊົນສອງປະເທດ.
 |
| ພາບປະກອບ: TTXVN |
ປີ 2021 ແມ່ນປີທີ່ສຳຄັນພິເສດຂອງຫວຽດນາມ ແລະ ລາວ ເມື່ອພ້ອມກັນຈັດຕັ້ງກອງປະຊຸມໃຫຍ່ຂອງພັກຢ່າງສຳເລັດຜົນ ແລະ ເລືອກຕັ້ງບັນດາການນຳຊຸດໃໝ່ ເພື່ອສືບຕໍ່ນຳພາປະເທດກ້າວຂຶ້ນສັງຄົມນິຍົມ. ກໍ່ໃນປີ 2021, ສະພາບການພະຍາດໂຄວິດ-19 ມີການຜັນແປຢ່າງສັບສົນຫຼາຍຢ່າງ ເຮັດໃຫ້ສອງປະເທດຕ້ອງຮັບມືຢ່າງໜັກໜ່ວງ. ເຖິງຢ່າງໃດກໍ່ຕາມ, ຄວາມຫຍຸ້ງຍາກຈາກການແຜ່ລະບາດຂອງພະຍາດດັ່ງກ່າວໄດ້ຢືນຢັນອີກເທື່ອໜຶ່ງເຖິງຄວາມສາມັກຄີແບບພິເສດຂອງສອງປະເທດທີ່ມີຕໍ່ກັນ. 2 ປະເທດຮັກສາການພົວພັນອັນດີງາມໃນຫຼາຍຂົງເຂດ. ກ່ຽວກັບການພົວພັນດ້ານການເມືອງ ແລະ ການທູດ, ໃນສະພາບການແຜ່ລະບາດຂອງພະຍາດໂຄວິດ-19, 2 ປະເທດຍັງຄົງຮັກສາທ່ວງທ່າ ແລະ ພັດທະນາການພົວພັນໃນຫຼາຍຂົງເຂດ.
2 ຝ່າຍສົມທົບກັນກະກຽມເນື້ອໃນໃຫ້ແກ່ກອງປະຊຸມຄັ້ງທີ 44 ຂອງຄະນະກຳມະການລະຫວ່າງລັດຖະບານ ຫວຽດນາມ - ລາວ; ການນຳຂັ້ນສູງຂອງສອງປະເທດ ກໍ່ໄດ້ພົບປະແລກປ່ຽນໃນທຸກຮູບແບບເປັນປະຈໍາ; ພິເສດແມ່ນ ຫວຽດນາມ ໄດ້ຕ້ອນຮັບທ່ານເລຂາທິການໃຫຍ່, ປະທານປະເທດລາວ ທອງລຸນ ສີສຸລິດ ມາຢ້ຽມຢາມສັນຖະວະໄມຕີຢ່າງເປັນທາງການ (ວັນທີ 28-29 ມິຖຸນາ 2021), ທ່ານປະທານສະພາແຫ່ງຊາດລາວ ໄຊສົມພອນ ພົມວິຫານ ມາຢ້ຽມຢາມຢ່າງເປັນທາງການ (ວັນທີ 6-8 ທັນວາ 2021). ທ່ານລັດຖະມົນຕີ ການຕ່າງປະເທດ ສະເຫຼີມໄຊ ກົມມະສິດ ມາຢ້ຽມຢາມຢ່າງເປັນທາງການ (ວັນທີ 27-29 ທັນວາ 2021); ທ່ານປະທານປະເທດ ຫງວຽນຊວນຟຸກ ໄດ້ໄປຢ້ຽມຢາມສັນຖະວະໄມຕີ ລາວ ຢ່າງເປັນທາງການ (ວັນທີ 9-10 ສິງຫາ 2021).
ຫວຽດນາມ, ລາວ ແລະ ກຳປູເຈຍ ໄດ້ຈັດຕັ້ງການພົບປະລະຫວ່າງການນໍາພັກ 3 ປະເທດກຳປູເຈຍ - ລາວ - ຫວຽດນາມ ຢ່າງສຳເລັດຜົນ (ວັນທີ 26 ກັນຍາ 2021). ຄຽງຂ້າງນັ້ນ, ບັນດາອົງການ, ຄະນະ, ຂະແໜງການ ແລະ ທ້ອງຖິ່ນຂອງ 2 ປະເທດ ກໍ່ຍູ້ແຮງການຈັດຕັ້ງບັນດາກອງປະຊຸມອອນໄລ ເພື່ອ ແລກປ່ຽນປະສົບການ, ຊຸກຍູ້ການຮ່ວມມື.
ການຮ່ວມມືໃນການປ້ອງກັນ, ຕ້ານພະຍາດໂຄວິດ-19 ລະຫວ່າງສອງປະເທດກໍ່ໄດ້ຮັບການຊຸກຍູ້ຢ່າງຕໍ່ເນື່ອງ, ພັກ, ລັດ ແລະ ປະຊາຊົນຫວຽດນາມ ໄດ້ໜູນຊ່ວຍພັກ, ລັດ ແລະ ປະຊາຊົນລາວ ຮັບມືກັບໂລກລະບາດໂຄວິດ-19 2 ຄັ້ງຄື: ຄັ້ງທຳອິດແມ່ນ 500.000 USD ແລະ ເຄື່ອງອຸປະກອນການແພດລວມມູນຄ່າ 2 ລ້ານ USD (ວັນທີ 4 ພຶດສະພາ 2021), ໄດ້ຈັດສົ່ງຄະນະແພດໝໍ ແລະ ຄະນະຊ່ຽວຊານຈາກວິທະຍາຄານການແພດຂອງຫວຽດນາມໄປປ້ອງກັນ, ຕ້ານໂລກລະບາດ (ວັນທີ 10-24 ພຶດສະພາ 2021 ແລະ ວັນທີ 3-20 ພຶດສະພາ 2021); ຄັ້ງທີ 2 ແມ່ນ 2.150.000 USD ແລະ ອຸປະກອນການແພດຈຳນວນໜຶ່ງ ມີມູນຄ່າປະມານ 120.000 USD (ວັນທີ 25 ຕຸລາ 2021).
ນອກນີ້, ກະຊວງ, ຂະແໜງ ແລະ ທ້ອງຖິ່ນຂອງຫວຽດນາມ ຈຳນວນໜຶ່ງກໍ່ໄດ້ໜູນຊ່ວຍບັນດາຄູ່ຮ່ວມມືຂອງລາວ ໃນການປ້ອງກັນ ແລະ ຕ້ານພະຍາດ...
ການຮ່ວມມືດ້ານປ້ອງກັນຊາດ-ປ້ອງກັນຄວາມສະຫງົບ ສອງຝ່າຍສືບຕໍ່ໄດ້ຮັບ ການເພີ່ມທະວີການຮ່ວມມື. 2 ຝ່າຍສືບຕໍ່ສົມທົບກັນຮັບປະກັນຄວາມໝັ້ນຄົງ, ຮັກສາເສັ້ນຊາຍແດນສັນຕິພາບ, ມິດຕະພາບ; ຈັດຕັ້ງການພົບປະແລກປ່ຽນມິດ ຕະພາບເຂດຊາຍແດນ ຫວຽດນາມ - ລາວ ຄັ້ງທຳອິດ (ວັນທີ 12 ທັນວາ 2021); ເພີ່ມທະວີການຄວບຄຸມເຂດຊາຍແດນ, ສະກັດກັ້ນການເຂົ້າ-ອອກເມືອງຢ່າງຜິດກົດໝາຍ ເພື່ອຈຳກັດການແຜ່ລະບາດຂອງພະຍາດໂຄວິດ-19; ສົມທົບກັນຊອກຫາ, ທ້ອນໂຮມອັດຖິທະຫານອາສາສະໝັກ ແລະ ນັກຊ່ຽວຊານຫວຽດນາມ ທີ່ເສຍຊີວິດໃນປາງສົງຄາມຢູ່ລາວ ກັບເມືອປະເທດ.
ບັນດາແຂວງທີ່ມີຊາຍແດນຕິດຈອດກັນຂອງສອງປະເທດສືບຕໍ່ເພີ່ມທະວີການຄວບຄຸມເຂດຊາຍແດນ ແລະ ສະກັດກັ້ນການເຂົ້າ-ອອກເມືອງຢ່າງຜິດກົດໝາຍ ເພື່ອສະກັດກັ້ນການແຜ່ລະບາດຂອງພະຍາດໂຄວິດ-19.
ການຮ່ວມມືດ້ານເສດຖະກິດ, ການຄ້າ ແລະ ການລົງທຶນລະຫວ່າງສອງປະເທດໄດ້ຮັກສາທ່າເຕີບໂຕທີ່ດີໃນສະພາບການແຜ່ລະບາດ. ວົງເງິນການຄ້າສອງສົ້ນ ບັນລຸ 1,2 ຕື້ USD ໃນປີ 2021, ເພີ່ມຂຶ້ນ 33,6%. ປະຈຸບັນ, ມີ 209 ໂຄງການລົງທຶນຂອງຫວຽດນາມ ເຂົ້າລາວ ດ້ວຍຍອດຈຳນວນທຶນຈົດທະບຽນ 5,16 ຕື້ USD; ໃນນັ້ນ, ໃນປີ 2021, ມີ 3 ໂຄງການທີ່ໄດ້ຮັບອະນຸຍາດໃໝ່ ແລະ 2 ໂຄງການດັດປັບທຶນ ດ້ວຍຍອດຈຳນວນທຶນຈົດທະບຽນ 47,84 ລ້ານ USD.
ການຮ່ວມມືດ້ານການສຶກສາ-ກໍ່ສ້າງ ຍາມໃດກໍ່ໄດ້ຮັບຄວາມສົນໃຈ. ກະຊວງສຶກສາ ແລະ ກໍ່ສ້າງຂອງສອງປະເທດໄດ້ປະກາດແຜນຮ່າງການຮ່ວມມືດ້ານການສຶກສາຫວຽດນາມ - ລາວ ໄລຍະ 2021-2030.
ການຮ່ວມມືລະຫວ່າງບັນດາທ້ອງຖິ່ນ, ພິເສດແມ່ນບັນດາທ້ອງຖິ່ນທີ່ມີຊາຍແດນ ຕິດຈອດກັນໄດ້ຮັບຄວາມເອົາໃຈໃສ່, ພິເສດແມ່ນກໍ່ສ້າງພື້ນຖານໂຄງລ່າງ, ການແພດ, ກໍ່ສ້າງ ແລະ ພັດທະນາແຫຼ່ງຊັບພະຍາກອນມະນຸດ, ຮັບປະກັນຄວາມສະຫງົບປອດໄພຢູ່ເຂດຊາຍແດນ 2 ປະເທດ.
ໃນການຮ່ວມມືພາກພື້ນ ແລະ ສາກົນ, 2 ຝ່າຍສົມທົບກັນຢ່າງແໜ້ນແຟ້ນ ແລະ ສະໜັບສະໜູນເຊິ່ງກັນ ແລະ ກັນຢູ່ບັນດາເວທີປາໄສການຮ່ວມມື, ພິເສດແມ່ນໃນຂອບອາຊຽນ, ສະຫະປະຊາຊາດ ແລະ ບັນດາກົນໄກອະນຸພາກພື້ນ.
ປີ 2022 ແມ່ນປີທີ່ມີຄວາມໝາຍສຳຄັນໃນການພົວພັນຮ່ວມມືລະຫວ່າງ ຫວຽດນາມ - ລາວ ແລະ ລາວ - ຫວຽດນາມ. ການນຳສອງປະເທດໄດ້ເຫັນດີເປັນເອກະພາບສົມທົບກັນຈັດຕັ້ງປີສາມັກຄີມິດຕະພາບຫວຽດນາມ - ລາວ, ລາວ - ຫວຽດນາມ ດ້ວຍຫຼາຍກິດຈະກຳເພື່ອສະເຫຼີມສະຫຼອງວັນບຸນສຳຄັນຂອງຊາດຫວຽດນາມ - ລາວ ເຊັ່ນ: ຄົບຮອບ 60 ປີແຫ່ງວັນສ້າງຕັ້ງການພົວພັນທາງການທູດ (5 ກັນຍາ 1962 - 5 ກັນຍາ 2022) ແລະ 45 ປີແຫ່ງວັນເຊັນສົນທິສັນຍາມິດຕະພາບ ແລະ ການຮ່ວມມື (18 ກໍລະກົດ 1977 – 18 ກໍລະກົດ 2022).
ໃນຂອບເຂດປີ 2022, 2 ປະເທດ ຫວຽດນາມ - ລາວ ຈະສືບຕໍ່ສົມທົບກັນຈັດຕັ້ງຜັນຂະຫຍາຍບັນດາໜ້າທີ່ລະອຽດ ຄື: ເພີ່ມທະວີການພົວພັນທາງການເມືອງ - ການທູດ, ຮັບປະກັນການປ້ອງກັນຊາດ - ປ້ອງກັນຄວາມໝັ້ນຄົງ; ຈັດຕັ້ງປະຕິບັດເນື້ອໃນຂອງຖະແຫຼງການຮ່ວມ ແລະ ຂໍ້ຕົກລົງຂອງການນຳຂັ້ນສູງ; ຊຸກຍູ້ການຢ້ຽມຢາມ; ສືບຕໍ່ສະໜັບສະໜູນເຊິ່ງກັນ ແລະ ກັນໃນເວທີປາໄສ ພາກພື້ນ ແລະ ສາກົນ ເພື່ອເພີ່ມທະວີສາຍພົວພັນມິດຕະພາບອັນຍິ່ງໃຫຍ່, ຄວາມສາມັກຄີພິເສດ ແລະ ການຮ່ວມມືຮອບດ້ານລະຫວ່າງສອງປະເທດ ໃຫ້ນັບມື້ນັບເຂົ້າສູ່ລວງເລິກ, ແທດຈິງ ແລະ ມີປະສິດທິຜົນ.
ບູນມີ
