ປີ 2022, ຫວຽດນາມ ແມ່ນຕະຫຼາດສຳຄັນຂອງບັນດາກຸ່ມວິສາຫະກິດຂາຍຍ່ອຍຍີ່ປຸ່ນ

11:30 | 01/01/2022

ຍສໝ - ນັ້ນແມ່ນຄຳຢືນຢັນຂອງໜັງສືພິມ Nikkei Asia, ຍີ່ປຸ່ນ ເມື່ອວິເຄາະຍຸດທະສາດການລົງທຶນຢູ່ຕ່າງປະເທດຂອງບັນດາກຸ່ມວິສາຫະກິດຂາຍຍ່ອຍຍີ່ປຸ່ນ.

	ຈຸດສຸມການຮ່ວມມືດ້ານປ້ອງກັນຊາດ ຫວຽດນາມ ແລະ ກຳປູເຈຍ ໃນປີ 2022
	Vietjet ຄາດຄະເນຈະເຊື່ອມຕໍ່ສາຍການບິນສາກົນເປັນປົກກະຕິຄືນໃໝ່ແຕ່ວັນທີ 1 ມັງກອນ 2022

ຫວ່າງມໍ່ໆນີ້, ໜັງສືພິມ Nikkei Asia ໄດ້ລົງພິມບົດວິເຄາະກ່ຽວກັບຍຸດທະສາດລົງທຶນຢູ່ຕ່າງປະເທດຂອງກຸ່ມວິສາຫະກິດຂາຍຍ່ອຍຍີ່ປຸ່ນ, ໃນນັ້ນຢືນຢັນວ່າ ຫວຽດນາມ ແມ່ນຕະຫຼາດສຳຄັນທີ່ສຸດຂອງກຸ່ມ AEON ກໍ່ຄືບັນດາກຸ່ມບໍລິສັດຂາຍຍ່ອຍຕ່າງໆ.

ຈາກນີ້ຮອດປີ 2025, AEON ມີແຜນຈະເປີດຮ້ານສັບພະສິນຄ້າ MaxValu ປະມານ 100 ແຫ່ງຢູ່ຫວຽດນາມ.

ປີ 2022, ຫວຽດນາມ ແມ່ນຕະຫຼາດສຳຄັນຂອງບັນດາກຸ່ມວິສາຫະກິດຂາຍຍ່ອຍຍີ່ປຸ່ນ

ສູນການຄ້າ Aeon. ພາບ: internet

ທ່ານ Soichi Okazaki, ຜູ້ອຳນວຍການບໍລິຫານຮັບຜິດຊອບການດຳເນີນທຸລະກິດເຂດອາຊີຕາເວັນອອກສ່ຽງໃຕ້ຂອງ AEON ເນັ້ນໜັກວ່າ: ຫວຽດນາມ ແມ່ນຕະຫລາດສຳຄັນທີ່ສຸດໃນຍຸດທະສາດຢູ່ຕ່າງປະເທດຂອງກຸ່ມບໍລິສັດ. ບໍລິສັດລູກຂອງ AEON ແມ່ນ Aeon Mall, ມີແຜນຈະເພີ່ມຈາກ 6 ເປັນ 16 ສູນການຄ້າຢູ່ຫວຽດນາມ ຈາກນີ້ຮອດປີ 2025.

AEON ຕັ້ງເປົ້າຈະເພີ່ມອັດຕາສ່ວນການລົງທຶນໄປຕ່າງປະເທດແຕ່ນີ້ເຖິງປີການເງິນ 2025 ຂຶ້ນເປັນ 25% ຕໍ່ປີ, ເພີ່ມຂຶ້ນເກືອບທົບ 2 ເທົ່າຂອງລະດັບກ່ອນໜ້ານີ້ ແລະ ທົບກວ່າ 2 ເທົ່າກຳໄລຈາກການເຄື່ອນໄຫວຢູ່ອາຊີ (ບໍ່ລວມຕະຫຼາດຍີ່ປຸ່ນ) ໃຫ້ໄດ້ກວ່າ 100 ຕື້ເຢນ (875 ລ້ານ USD)/ປີ.

ນອກຈາກ AEON ແລ້ວ, Sumitomo Corp ຂອງຍີ່ປຸ່ນ ກໍ່ມີແຜນທີ່ຈະຮ່ວມມືກັບກຸ່ມບໍລິສັດ BRG ເພື່ອເປີດກວ້າງລະບົບຮ້ານສັບພະສິນຄ້າ FujiMart, ເຊິ່ງປະຈຸບັນມີ 3 ແຫ່ງຢູ່ຮ່າໂນ້ຍ. Pan Pacific International Holdings - ຫົວໜ່ວຍບໍລິຫານກຸ່ມຮ້ານສັບພະສິນຄ້າ Don Don Donki ຕັ້ງເປົ້າໝາຍຈະເພີ່ມຍອດຂາຍຢູ່ຕ່າງປະເທດໃຫ້ເປັນ 1.000 ຕື້ເຢນ ໃນປີ 2030 ເພີ່ມປະມານທົບ 6 ເທົ່າເມື່ອທຽບໃສ່ປີການເງິນຂອງປີກ່ອນ ແລະ ມີແຜນຈະເປີດຮ້ານຄ້າໃໝ່ 10 ຮ້ານໃນອາຊີຕາເວັນອອກສ່ຽງໃຕ້, ຍົກຍອດຂຶ້ນເປັນ 20 ແຫ່ງ,

ຕາມ Euromonitor ແລ້ວ, ໃນໄລຍະ 2016-2026, ຕະຫຼາດສະບຽງອາຫານປຸງແຕ່ງໃນ 6 ພື້ນຖານເສດຖະກິດແຖວໜ້າງຂອງອາຊຽນ ຄາດວ່າຈະເຕີບໂຕປະມານ 60% ຂຶ້ນເປັນປະມານ 112,7 ຕື້ USD.

Euromonitor ຍັງຄາດຄະເນວ່າ ຫວຽດນາມ ຈະມີລະດັບເຕີບໂຕໄວທີ່ສຸດໃນ 6 ພື້ນຖານເສດຖະກິດນີ້, ດ້ວຍລະດັບເຕີບໂຕເກືອບ 90% ໃນໄລຍະນີ້.

ບູນມີ