 |
| ທ່ານນາງຮອງຫົວໜ້າຄະນະພົວພັນຕ່າງປະເທດສູນກາງ ຫງວຽນທິຮ່ວາງເວິນ (ພາບ: TTXVN) |
ຫວ່າງແລ້ວນີ້, ທ່ານນາງຮອງຫົວໜ້າຄະນະພົວພັນຕ່າງປະເທດສູນກາງ ຫງວຽນທິຮ່ວາງເວິນ ໄດ້ເຂົ້າຮ່ວມກອງປະຊຸມທາງໄກ “ສອງສະຕະວັດແຫ່ງມິດຕະພາບ, ສອງທົດສະວັດ ຄູ່ຮ່ວມມືຍຸດທະສາດ” ໂດຍຄະນະພົວພັນຕ່າງປະເທດນະຄອນ Saint Petersburg ຈັດຕັ້ງເນື່ອງໃນໂອກາດສະເຫຼີມສະຫຼອງ 20 ປີແຫ່ງວັນສ້າງຕັ້ງການພົວພັນທາງການທູດ ຄູ່ຮ່ວມມືຍຸດທະສາດ ຫວຽດນາມ - ສະຫະພັນລັດເຊຍ.
ເຂົ້າຮ່ວມກອງປະຊຸມມີ ທ່ານຮອງຜູ້ວ່າການນະຄອນ Saint Petersburg Bodarenko N.L, ຜູ້ຕາງໜ້າສະຖານທູດ ແລະ ບາງອົງການ, ອົງການຈັດຕັ້ງທີ່ກ່ຽວຂ້ອງຂອງສອງປະເທດ.
ບັນດາການປຶກສາຫາລືຢູ່ກອງປະຊຸມໄດ້ເນັ້ນໜັກວ່າ ນັບແຕ່ເວລາສ້າງຕັ້ງການພົວພັນຄູ່ຮ່ວມມືຍຸດທະສາດປີ 2001 ແລະ ຄູ່ຮ່ວມມືຍຸດທະສາດຮອບດ້ານໃນປີ 2012 ມາຮອດປັດຈຸບັນ, ການພົວພັນຄູ່ຮ່ວມມືຫວຽດນາມ - ສະຫະພັນ ລັດເຊຍ ນັບມື້ນັບໄດ້ຮັບການພັດທະນາຢ່າງດີງາມ ໃນທຸກຂົງເຂດຄື ການເມືອງ, ເສດຖະກິດ, ການຄ້າ, ການລົງທຶນ, ການປ້ອງກັນຊາດ - ປ້ອງກັນຄວາມສະຫງົບ, ການສຶກສາ ແລະ ບຳລຸງສ້າງ...
ການແລກປ່ຽນຄະນະຜູ້ແທນ ແລະ ການພົບປະກັບທຸກຂັ້ນ, ພິເສດແມ່ນຂັ້ນສູງໄດ້ຮັບການຮັກສາຢ່າງເປັນປະຈຳ. ການຮ່ວມມືດ້ານເສດຖະກິດ ການຄ້າ ພັດທະນາຢ່າງມີຂະຫຍັນຂັນເຄື່ອນ. ການຮ່ວມມືດ້ານປ້ອງກັນຊາດ - ປ້ອງກັນຄວາມສະຫງົບ ໄດ້ຮັບການຍູ້ແຮງ, ສວມບົດບາດເສົາຄ້ຳສຳຄັນໃນການພົວພັນສອງປະເທດ.
ການຮ່ວມມືດ້ານການສຶກສາ, ວັດທະນະທຳ, ການທ່ອງທ່ຽວ, ການຮ່ວມມືລະຫວ່າງສອງປະເທດ ແລະ ການພົບປະພົວພັນປະຊາຊົນມີບາດກ້າວພັດທະນາຢ່າງຕັ້ງໜ້າ, ປະກອບສ່ວນເພີ່ມທະວີຄວາມເຂົ້າໃຈ, ນ້ຳໄຈມິດຕະພາບ ລະຫວ່າງປະຊາຊົນ ຫວຽດນາມ ແລະ ສະຫະພັນລັດເຊຍ.
ກ່າວຄຳເຫັນທີ່ກອງປະຊຸມ, ທ່ານນາງ ຫງວຽນທິຮ່ວາງເວິນ ຢືນຢັນວ່າ: ນະໂຍບາຍສະເໝີຕົ້ນສະເໝີປາຍຂອງພັກ ແລະ ລັດ ຫວຽດນາມ ແມ່ນຖືເປັນສຳຄັນການປັບປຸງ ແລະ ເພີ່ມທະວີການພົວພັນກັບສະຫະພັນລັດເຊຍ, ຊຸກຍູ້ການຮ່ວມມືໃນບັນດາຊ່ອງທາງຂອງພັກ ແລະ ລັດ, ປະຊາຊົນໃນທຸກຂົງເຂດ.
ຖະແຫຼງການຮ່ວມກ່ຽວກັບວິໄສທັດການພົວພັນຄູ່ຮ່ວມມືຍຸດທະສາດຮອບດ້ານ ຫວຽດນາມ - ລັດເຊຍ ຮອດປີ 2030 ທີ່ໄດ້ຮັບຮອງເອົາ ເນື່ອງໃນໂອກາດ ທ່ານປະທານປະເທດຫວຽດນາມ ຫງວນຊວັນຟຸກ ໄປຢ້ຽມຢາມ ສະຫະພັນລັດເຊຍ ຢ່າງເປັນທາງການທີ່ຜ່ານມາ ໄດ້ສະແດງໃຫ້ເຫັນຄວາມຕັດສິນໃຈຂອງການນຳຂັ້ນສູງຂອງ 2 ປະເທດໃນການເພີ່ມທະວີການພົວພັນຮ່ວມມືຍຸດທະສາດລັດເຊຍ-ຫວຽດນາມ, ສ້າງພື້ນຖານໃຫ້ແກ່ການຮ່ວມມືລະຫວ່າງສອງປະເທດຢ່າງແໜ້ນແຟ້ນ.
ບັນດາຜູ້ແທນທີ່ເຂົ້າຮ່ວມກອງປະຊຸມໄດ້ແລກປ່ຽນ ແລະ ເຫັນດີເປັນເອກະພາບກ່ຽວກັບຫຼາຍໂຄງການ ແລະ ການເຄື່ອນໄຫວສະເຫຼີມສະຫຼອງ 10 ປີແຫ່ງວັນລົງນາມໃນຖະແຫຼງການກ່ຽວກັບການພົວພັນຄູ່ຮ່ວມມືຍຸດທະສາດຮອບດ້ານ ຫວຽດນາມ - ລັດເຊຍ ໃນປີ 2022.
ບຸນຄົງ
