 |
| ທ່ານປະທານຄະນະກຳມະການສູນກາງ ແນວໂຮມປະເທດຊາດ ຫວຽດນາມ ໂດ້ວັນຈຽນ ໄດ້ມີການພົບປະກັບ ທ່ານປະທານສະພາແຫ່ງຊາດ ລາວ ໄຊສົມພອນ ພົມວິຫານ. ພາບ: tapchimattran.vn |
ຫວ່າງແລ້ວນີ້, ທ່ານປະທານຄະນະກຳມະການສູນກາງ ແນວໂຮມປະເທດຊາດ ຫວຽດນາມ ໂດ້ວັນຈຽນ ໄດ້ມີການພົບປະກັບ ທ່ານປະທານສະພາແຫ່ງຊາດ ລາວ ໄຊສົມພອນ ພົມວິຫານ.
ທ່ານປະທານສະພາແຫ່ງຊາດລາວ ໄຊສົມພອນ ພົມວິຫານ ໃຫ້ຮູ້ວ່າ: ຜ່ານບັນດາການເຄື່ອນໄຫວໃນການຢ້ຽມຢາມ, ສອງຝ່າຍໄດ້ພ້ອມກັນທົບທວນຄືນສາຍພົວພັນມິດຕະພາບອັນຍິ່ງໃຫຍ່, ຄວາມສາມັກຄີແບບພິເສດ ແລະ ການຮ່ວມມືຮອບດ້ານລະຫວ່າງສອງພັກ, ສອງລັດ ແລະ ປະຊາຊົນສອງປະເທດ. 2 ຝ່າຍເຫັນດີເປັນເອກະສັນສືບຕໍ່ເພີ່ມທະວີການຮ່ວມມື, ນຳການພົວພັນລະຫວ່າງສອງປະເທດໃຫ້ນັບມື້ນັບເຂົ້າສູ່ລວງເລິກ, ມີປະສິດທິຜົນ ແລະ ແທດຈິງ.
ທ່ານປະທານສະພາແຫ່ງຊາດ ລາວ ໄຊສົມພອນ ພົມວິຫານ ປາດຖະໜາວ່າ ແນວລາວສ້າງຊາດ ແລະ ແນວໂຮມປະເທດຊາດ ຫວຽດນາມ ຈະສືບຕໍ່ປະຕິບັດບັນດາຂໍ້ຕົກລົງຮ່ວມມືທີ່ໄດ້ລົງນາມຕາມທິດທາງນັບມື້ນັບມີການເປີດກວ້າງ ແລະ ບັນດາການເຄື່ອນໄຫວທີ່ມີຄວາມຫຼາກຫຼາຍຢ່າງມີປະສິດທິຜົນ; ແລກປ່ຽນ ແລະ ແບ່ງປັນປະສົບການຢ່າງຕັ້ງໜ້າ.
ສອງອົງການແນວໂຮມຕ້ອງສົມທົບກັນຢ່າງແໜ້ນແຟ້ນກ່ວາອີກ ໃນປີ 2022 “ປີສາມັກຄີມິດຕະພາບຫວຽດນາມ - ລາວ, ລາວ - ຫວຽດນາມ” ເພື່ອໃຫ້ມີການເຄື່ອນໄຫວທີ່ແທດຈິງ; ເພີ່ມທະວີການສຶກສາ ແລະ ໂຄສະນາເຜີຍແຜ່ໃຫ້ແກ່ຄົນລຸ້ນໜຸ່ມ, ຜ່ານນັ້ນກໍເພີ່ມພູນຄູນສ້າງສາຍພົວພັນມິດຕະພາບອັນຍິ່ງໃຫຍ່, ຄວາມສາມັກຄີແບບພິເສດ ແລະ ການຮ່ວມມືຮອບດ້ານລະຫວ່າງ ລາວ-ຫວຽດນາມ.
ທ່ານປະທານຄະນະກຳມະການສູນກາງ ແນວໂຮມປະເທດຊາດ ຫວຽດນາມ ໂດ້ວັນຈຽນ ເນັ້ນໜັກເຖິງຄວາມຮັກແພງເປັນພິເສດທີ່ ທ່ານປະທານສະພາແຫ່ງຊາດລາວ ໄຊສົມພອນ ພົມວິຫານ ມີຕໍ່ພະນັກງານເຮັດວຽກງານແນວໂຮມຂອງລາວ ແລະ ຫວຽດນາມ, ຜ່ານນັ້ນກໍ່ໄດ້ສະແດງໃຫ້ເຫັນຄວາມເອົາໃຈໃສ່ເປັນຢ່າງດີຕໍ່ວຽກງານຂົນຂວາຍປະຊາຊົນ - ກົກເຄົ້າເຫງົ້າກໍ ແຫ່ງຄວາມເຂັ້ມແຂງຂອງທັງສອງປະເທດ.
ທ່ານປະທານຄະນະກຳມະການສູນກາງ ແນວໂຮມປະເທດຊາດ ຫວຽດນາມ ໂດ້ວັນຈຽນ ໃຫ້ຮູ້ວ່າ: ແນວໂຮມປະເທດຊາດ ຫວຽດນາມ ຈະໄດ້ຮັບເອົາຄຳເຫັນຂອງການນຳຂັ້ນສູງຂອງ 2 ພັກ ແລະ ລັດ ເພື່ອສົມທົບກັນຈັດຕັ້ງບັນດາການເຄື່ອນໄຫວສະເຫຼີມສະຫຼອງ 60 ປີແຫ່ງວັນສ້າງຕັ້ງການພົວພັນທາງການທູດ ( 5 ກັນຍາ 1962 – 5 ກັນຍາ 2022) ແລະ ຄົບຮອບ 45 ປີ ແຫ່ງວັນເຊັນສົນທິສັນຍາມິດຕະພາບ ແລະ ການຮ່ວມມື ຫວຽດນາມ - ລາວ (18 ກໍລະກົດ 197 - 18 ກໍລະກົດ 2022) ໃຫ້ມີຄວາມໝາຍຢ່າງແທ້ຈິງ, ຜ່ານນັ້ນກໍ່ປະກອບສ່ວນເຂົ້າໃນການສຶກສາມູນເຊື້ອໃຫ້ແກ່ລຸ້ນໜຸ່ມ ເພື່ອຮ່ວມກັນປົກປັກຮັກສາ ແລະ ເສີມຂະຫຍາຍການພົວພັນລະຫວ່າງສອງປະເທດໃຫ້ຫຼາຍກວ່າອີກ. ແນວໂຮມປະເທດຊາດທຸກຂັ້ນຈະຜັນຂະຫຍາຍແຜນການເປີດກວ້າງບັນດາການເຄື່ອນໄຫວແລກປ່ຽນລະຫວ່າງປະຊາຊົນສອງປະເທດຢູ່ລຽບຕາມຊາຍແດນ.
ໄຊພອນ
