| ປະທານປະເທດ ຢ້ຽມຢາມ ແລະ ເຮັດວຽກຢູ່ສູນເຂດຮ້ອນ ຫວຽດນາມ - ລັດເຊຍ | |
| ຫວຽດນາມ - ລັດເຊຍ ເພີ່ມທະວີ ແລະ ເປີດກວ້າງການຮ່ວມມືໃນຂົງເຂດປ້ອງກັນຄວາມໝັ້ນຄົງ |
ທ່ານປະທານປະເທດ ຫງວຽນຊວນຟຸກ ແລະ ທ່ານປະທານາທິບໍດີ ລັດເຊຍ Vladimir Putin ໄດ້ປຶກສາຫາລື ແລະ ເຫັນດີເປັນເອກະສັນກ່ຽວກັບທິດທາງ ແລະ ມາດຕະການສຳຄັນຫຼາຍຢ່າງ ເພື່ອເປີດໄລຍະການຮ່ວມມືຢ່າງເລິກເຊິ່ງ, ປະສິດທິຜົນ ແລະ ແທດຈິງຂອງການພົວພັນຄູ່ຮ່ວມມືຍຸດທະສາດຮອບດ້ານ ຫວຽດນາມ - ລັດເຊຍ ດ້ວຍວິໄສທັດຮອດປີ 2030.
ທ່ານປະທານປະເທດ ຫງວຽນຊວນຟຸກ ແລະ ທ່ານປະທານາທິບໍດີ ລັດເຊຍ Putin ໄດ້ພ້ອມກັນຕີລາຄາວ່າ ການພົວພັນດ້ານການເມືອງ ແລະ ການທູດລະຫວ່າງ ຫວຽດນາມ ແລະ ລັດເຊຍ ມີຄວາມໄວ້ເນື້ອເຊື່ອໃຈດ້ານຍຸດທະສາດສູງ. ການພົບປະທຸກຂັ້ນ, ພິເສດແມ່ນຢູ່ຂັ້ນສູງ ໄດ້ຮັບການຮັກສາຢ່າງເປັນປະຈຳ ໃນທັງຂອບເຂດສອງຝ່າຍ ແລະ ຫຼາຍຝ່າຍ ເຖິງຈະໄດ້ຮັບຜົນກະທົບບໍ່ສະດວກຈາກການແຜ່ລະບາດ Covid-19 ກໍຕາມ.
 |
| ທ່ານປະທານປະເທດ ຫງວຽນຊວນຟຸກ ແລະ ທ່ານປະທານາທິບໍດີ ລັດເຊຍ Vladimir Putin. (ພາບ: TTXVN) |
ສອງຝ່າຍໄດ້ຕີລາຄາສູງການພົວພັນຮ່ວມມືທີ່ໄວ້ເນື້ອເຊື່ອໃຈ, ແທດຈິງ, ມີປະສິດທິຜົນ ແລະ ຮອບດ້ານລະຫວ່າງ ຫວຽດນາມ ແລະ ສະຫະພັນລັດເຊຍ ໃນບັນດາຂົງເຂດທີ່ເປັນມູນເຊື້ອ ແລະ ມີທ່າແຮງ ຄື: ການສຶກສາ - ບຳລຸງສ້າງ, ວິທະຍາສາດ - ເຕັກໂນໂລຢີ, ວັດທະນະທຳ, ທ່ອງທ່ຽວ, ຂໍ້ມູນຂ່າວສານ ແລະ ການສື່ສານ…
ສອງຝ່າຍໄດ້ແລກປ່ຽນທັດສະນະ ກ່ຽວກັບສະພາບການໂລກ ແລະ ພາກພື້ນ. ທ່ານປະທານປະເທດ ຫງວຽນຊວນຟຸກ ສະໜັບສະໜູນ ແລະ ຕີລາຄາສູງບົດບາດ ໃນຖານະແມ່ນປະເທດມະຫາອຳນາດ ແລະ ມີອິດທິພົນສາກົນທີ່ນັບມື້ນັບສູງຂອງລັດເຊຍຢູ່ພາກພື້ນ, ຢືນຢັນວ່າ ຫວຽດນາມ ພ້ອມແລ້ວທີ່ຈະເປັນຂົວຕໍ່ໃຫ້ແກ່ການຮ່ວມມືລະຫວ່າງ ລັດເຊຍ ກັບ ອາຊຽນ ແລະ ບັນດາປະເທດ ອາຊີ - ປາຊີຟິກ.
ສອງຝ່າຍປຶກສາຫາລືກ່ຽວກັບການສົມທົບກັນຮັກສາສັນຕິພາບ, ສະຖຽນລະພາບ, ຮັບປະກັນຄວາມໝັ້ນຄົງ, ຄວາມປອດໄພ, ຄວາມເສລີໃນການເດີນທະເລ ແລະ ການເດີນອາກາດຢູ່ ອາຊີ - ປາຊີຟິກ, ໃນນັ້ນມີທະເລຕາເວັນອອກ ສອດຄ່ອງກັບກົດໝາຍສາກົນ, ລວມມີ UNCLOS 1982.
ສອງຝ່າຍເຫັນດີເປັນເອກະພາບຍູ້ແຮງການແລກປ່ຽນຄະນະຜູ້ແທນໃນທຸກຊ່ອງທາງຂອງພັກ, ລັດ, ສະພາແຫ່ງຊາດ ແລະ ລັດຖະບານ, ກໍ່ຄືການພົບປະແລກປ່ຽນປະຊາຊົນ ແລະ ທ້ອງຖິ່ນ ພາຍຫຼັງການແຜ່ລະບາດຂອງພະຍາດໂຄວິດ-19 ໄດ້ຮັບການຄວບຄຸມ.
ສອງຝ່າຍຕີລາຄາສູງການຮ່ວມມືດ້ານປ້ອງກັນຊາດ-ປ້ອງກັນຄວາມສະຫງົບຂອງສອງປະເທດ ບັນລຸໄດ້ຫລາຍຜົນງານອັນສຳຄັນ, ຮັດແໜ້ນການພົວພັນດ້ານການເມືອງ ແລະ ຄວາມໄວ້ເນື້ອເຊື່ອໃຈຂອງສອງປະເທດຢ່າງເລິກເຊິ່ງກວ້າງຂວາງ, ຢືນຢັນຄວາມຕັດສິນໃຈເຮັດໃຫ້ການຮ່ວມມືດ້ານເສດຖະກິດ ກາຍເປັນເສົາຄ້ຳທີ່ສຳຄັນໃນການພົວພັນຮ່ວມມືສອງຝ່າຍ ລັດເຊຍ-ຫວຽດນາມ.
ສອງຝ່າຍຢັ້ງຢືນວ່າ: ພະລັງງານ, ນ້ຳມັນອາຍແກັສ ສືບຕໍ່ແມ່ນໜຶ່ງໃນບັນດາເສົາຄ້ຳຫຼັກ ຂອງການພົວພັນຄູ່ຮ່ວມມືຍຸດທະສາດຮອບດ້ານລະຫວ່າງສອງປະເທດ, ນຳມາເຊິ່ງຜົນປະໂຫຍດແທດຈິງ; ເຫັນດີເປັນເອກະພາບສືບຕໍ່ຮັກສາ ແລະ ເປີດກວ້າງການຮ່ວມມືດ້ານນ້ຳມັນອາຍແກັສ ຢູ່ເຂດນ່ານນ້ຳ ຫວຽດນາມ ແລະ ເຂດດິນແດນ ສະຫະພັນ ລັດເຊຍ ໂດຍສອດຄ່ອງຕາມກົດໝາຍສາກົນ, ໃນນັ້ນມີສົນທິສັນຍາສະຫະປະຊາຊາດ ກ່ຽວກັບກົດໝາຍວ່າດ້ວຍທະເລ ປີ 1982 (UNCLOS 1982).
ສອງຝ່າຍໄດ້ສະແດງຄວາມຊົມເຊີຍ ແລະ ສ້າງຄວາມສະດວກໃຫ້ແກ່ການຮ່ວມມືລະຫວ່າງ 2 ປະເທດໃນຂົງເຂດສະໜອງນ້ຳມັນອາຍແກັສແຫຼວ, ພະລັງງານຄວາມຮ້ອນ-ອາຍແກັສ, ພະລັງງານໄຟຟ້າທົດແທນ...; ຍູ້ແຮງໂຄງການກໍ່ສ້າງສູນຄົ້ນຄວ້າວິທະຍາສາດ ແລະ ເຕັກໂນໂລຊີນິວເຄຼຍ ຢູ່ຫວຽດນາມ, ຖືນີ້ແມ່ນໜຶ່ງໃນບັນດາໂຄງການສຳຄັນລະຫວ່າງສອງປະເທດໃນໄລຍະຈະມາເຖິງ.
ສອງຝ່າຍເຫັນດີ ຈະເປີດຖ້ຽວບິນຄືນໃໝ່ໂດຍໄວ ໃນທັນທີທີ່ໂລກລະບາດຢູ່ພາຍໃຕ້ການຄວບຄຸມ ເພື່ອຟື້ນຟູການແລກປ່ຽນລະຫວ່າງປະຊາຊົນສອງປະເທດ.
ສິ້ນສຸດການເຈລະຈາ, ສອງຝ່າຍໄດ້ອອກຖະແຫຼງການຮ່ວມກ່ຽວກັບວິໄສທັດ ການພົວພັນຄູ່ຮ່ວມມືຍຸດທະສາດຮອບດ້ານ ຫວຽດນາມ - ສະຫະພັນລັດເຊຍ ຮອດປີ 2030, ແນໃສ່ກຳນົດທິດການພົວພັນຮ່ວມມືດ້ານຄວາມໄວ້ເນື້ອເຊື່ອໃຈລະຫວ່າງ ສອງປະເທດໃນທຸກຂົງເຂດ ໃຫ້ນັບມື້ນັບເພີ່ມຂຶ້ນ, ເລິກເຊິ່ງ, ແທດຈິງ ແລະ ມີປະສິດທິຜົນ; ຕອບສະໜອງຜົນປະໂຫຍດອັນຍາວນານຂອງສອງປະເທດ ແລະ ປະຊາຊົນ; ປະກອບສ່ວນເຂົ້າໃນຄວາມສັນຕິພາບ, ຄວາມໝັ້ນຄົງ ແລະ ການພັດທະນາແບບຍືນຍົງຢູ່ພາກພື້ນ ແລະ ໃນໂລກ.
ຄຳຮຸ່ງ
