ກອງປະຊຸມໂດຍທ່ານ Jean-Claude Dardelet, ຮອງເຈົ້າຄອງນະຄອນ Toulouse, ປະທານກຸ່ມຫວຽດນາມ ຢູ່ສະຫະສະມາຄົມບັນດາທ້ອງຖິ່ນຝຣັ່ງ ເປັນປະທານ.
 |
| ພາບປະກອບ |
ເຂົ້າຮ່ວມ ແລະກ່າວຄຳເຫັນທີ່ກອງປະຊຸມ, ທ່ານ ດິ່ງຕວ່ານຖັ໊ງ ເອກອັກຄະລັດຖະທູດຫວຽດນາມ ປະຈຳ ຝຣັ່ງ ໄດ້ທົບທວນຄືນບັນດາໝາກຜົນຕົ້ນຕໍທີ່ບັນລຸໄດ້ໃນການຢ້ຽມຢາມຝຣັ່ງຢ່າງເປັນທາງການ ເມື່ອບໍ່ດົນມານີ້ຂອງ ທ່ານນາຍົກລັດຖະມົນຕີ ຟ້າມມີງຈິ໊ງ; ຢືນຢັນວ່າ ການຢ້ຽມຢາມໄດ້ເປີດກາລະໂອກາດຮ່ວມມືໃໝ່ຫຼາຍຢ່າງ, ໂດຍສະເພາະແມ່ນຂົງເຂດສາທາລະນະສຸກ, ການປັບຕົວ ກັບການປ່ຽນແປງຂອງດິນຟ້າອາກາດ, ຫັນເປັນດິຈິຕອນ... ເຊິ່ງພວມໄດ້ຮັບຄວາມສົນໃຈທີ່ສຸດໃນປະຈຸບັນ; ເນັ້ນໜັກວ່າການນຳສອງປະເທດລ້ວນແຕ່ສະແດງຄວາມຊົມເຊີຍ ແລະຕີລາຄາສູງການຮ່ວມມືລະຫວ່າງບັນດາທ້ອງຖິ່ນ, ຖືວ່າແມ່ນກົນໄກຮ່ວມມືແບບພິເສດປະກອບສ່ວນຢ່າງແທດຈິງ ແລະມີປະສິດທິຜົນເຂົ້າໃນການເພີ່ມທະວີ ແລະພັດທະນາການພົວພັນສອງປະເທດ ຫວຽດນາມ - ຝຣັ່ງ.
ທ່ານເອກອັກຄະລັດຖະທູດ ດິ່ງຕວ່ານຖັ໊ງ ປາດຖະໜາວ່າບັນດາທ້ອງຖິ່ນຂອງສອງປະເທດ ແລະບັນດາອົງການທີ່ກ່ຽວຂ້ອງ ຈະເສີມຂະຫຍາຍລັກສະນະເປັນ ເຈົ້າການ ແລະປະດິດຄິດສ້າງມຸ່ງໄປເຖິງການຈັດຕັ້ງກອງປະຊຸມຮ່ວມມືລະຫວ່າງ ທ້ອງຖິ່ນຫວຽດນາມ - ຝຣັ່ງ ຄັ້ງທີ 12 ຢູ່ ຮ່າໂນ້ຍ ໃນທ້າຍປີ 2022 ໃຫ້ປະສົບ ຜົນສຳເລັດ, ຖືນີ້ເປັນບາດກ້າວທີ່ສຳຄັນກ່ອນການສະເຫຼີມສະຫຼອງວັນສ້າງຕັ້ງການພົວພັນທາງການທູດຄົບຮອບ 50 ປີ ແລະ 10 ປີແຫ່ງວັນເຊັນສາຍພົວພັນຄູ່ຮ່ວມມືຍຸດທະສາດຫວຽດນາມ - ຝຣັ່ງ ໃນປີ 2023.
ຜູ້ຕາງໜ້າບັນດາທ້ອງຖິ່ນ ແລະກະຊວງການຕ່າງປະເທດຝຣັ່ງ ທີ່ເຂົ້າຮ່ວມກອງປະຊຸມໄດ້ແບ່ງປັນຂໍ້ມູນຂ່າວສານກ່ຽວກັບສະພາບການຮ່ວມມື ແລະ ການຜັນຂະຫຍາຍບັນດາການເຄື່ອນໄຫວກັບບັນດາຄູ່ຮ່ວມມືຫວຽດນາມ ໃນໄລຍະຜ່ານມາ. ພ້ອມກັນນັ້ນ, ກໍ່ເຫັນດີເປັນເອກະພາບເພີ່ມທະວີຄວາມມານະພະຍາຍາມ ແລະສົມທົບກັນຢ່າງແໜ້ນແຟ້ນ ເພື່ອຮັບປະກັນໃຫ້ກອງປະຊຸມຄັ້ງທີ 12 ປະສົບຜົນສຳເລັດ ແລະຫວັງວ່າບັນດາຝ່າຍ ແລະນະຄອນເຈົ້າພາບຮ່າໂນ້ຍ ຈະປຶກສາຫາລື ແລະເຫັນດີເຫັນພ້ອມກ່ຽວກັບແຜນການ ແລະລາຍການລະອຽດຂອງກອງ ປະຊຸມໂດຍໄວ, ເພື່ອປະກອບສ່ວນສ້າງທ່ວງທ່າໃຫ້ແກ່ປີສະເຫຼີມສະຫຼອງວັນສ້າງຕັ້ງສາຍພົວພັນທາງການທູດຫວຽດນາມ - ຝຣັ່ງ ໃນໄລຍະຈະມາເຖິງ, ພິເສດແມ່ນບັນຫາໃໝ່ທີ່ພວມວາງອອກຕໍ່ຫວຽດນາມ ແລະ ຝຣັ່ງ, ໃນນັ້ນ ມີຄວາມຕ້ອງການເພີ່ມທະວີການຮ່ວມມືດ້ານການແພດໃນສະພາບການແຜ່ລະບາດຂອງພະຍາດໂຄວິດ-19 ແລະການຮັບມືກັບການປ່ຽນແປງຂອງດິນຟ້າອາກາດສືບຕໍ່ພາຍຫຼັງກອງປະຊຸມ COP-26 ທີ່ຜ່ານມາ…
ໄຊພອນ
