 |
| ທ່ານຟ້າມວິງກວາງເອກອັກຄະລັດຖະທູດຫວຽດນາມປະຈຳອິນໂດເນເຊຍ (ພາບ: TTXVN) |
ເຂົ້າຮ່ວມມີທ່ານ Sandiaga Uno ລັດຖະມົນຕີການທ່ອງທ່ຽວແລະເສດຖະກິດປະດິດຄິດສ້າງອິນໂດເນເຊຍ, ທ່ານຜູ້ວ່າການແຂວງບາລີ- Wayan Koster, ທ່ານ Denny Abdi ເອກອັກຄະລັດຖະທູດອິນໂດເນເຊຍປະຈຳຫວຽດນາມ, ທ່ານ Raden Pardede ເລຂາທິການຝ່າຍບໍລິຫານຜູ້ທີໜຶ່ງຄະນະກຳມະການຮັບມືກັບໂລກລະບາດໂຄວິດ - 19 ແລະຟື້ນຟູເສດຖະກິດແຫ່ງຊາດ, ທ່ານ ຮ່າວັນຊຽວ ຮອງຫົວໜ້າກົມໃຫຍ່ການທ່ອງທ່ຽວຫວຽດນາມ, ທ່ານ Budiarsa Sastrawinata ປະທານສະມາຄົມມິດຕະພາບອິນໂດເນເຊຍ - ຫວຽດນາມ, ພ້ອມກັບຜູ້ແທນເກືອບ 150 ທ່ານໂດຍເປັນຜູ້ຕາງໜ້າໃຫ້ແກ່ຫຼາຍກະຊວງ, ຂະແໜງການແລະວິສາຫະກິດສອງປະເທດ.
ກ່າວຄຳເຫັນໄຂກອງປະຊຸມ, ທ່ານຟ້າມວິງກວາງເອກອັກຄະລັດຖະທູດຫວຽດນາມປະຈຳອິນໂດເນເຊຍໄດ້ຢ້ຳຄືນວ່າຢູ່ຫຼາຍແຫ່ງໃນໂລກໂລກລະບາດໂຄວິດ - 19 ຍັງສືບຕໍ່ກໍ່ຜົນກະທົບຢ່າງຮ້າຍແຮງຕໍ່ວິວັດການພັດທະນາເສດຖະກິດສັງຄົມແລະຊີວິດການເປັນຢູ່ຂອງປະຊາຊົນ, ແຕ່ວ່າກໍ່ສະແດງໃຫ້ເຫັນບັນດາເລື່ອງລາວແລະແບບຢ່າງທີ່ດີ, ມີຄວາມກ້າຫານຜ່ານຜ່າບັນດາຄວາມຫຍຸ້ງຍາກ.
ຕາມທ່ານເອກອັກຄະລັດຖະທູດຟ້າມວິງກວາງແລ້ວ, ທັງຫວຽດນາມແລະອິນໂດເນເຊຍລ້ວນແຕ່ພວມບືນຕົວຂຶ້ນພາຍຫຼັງການແຜ່ລະບາດຮອບຕ່າງໆທີ່ເກີດຂຶ້ນຫວ່າງມໍ່ໆມານີ້, ພ້ອມກັນເດີນຕາມຍຸດທະສາດຮ່ວມດຳລົງກັບໂລກລະບາດໂຄວິດ - 19 ແລະພວມສຸມໃສ່ຍູ້ແຮງວິວັດການຟື້ນຟູເສດຖະກິດໄລຍະຫຼັງໂລກລະບາດໂຄວິດ - 19.
ທີ່ກອງປະຊຸມຂັ້ນສູງອາຊຽນຄັ້ງທີ 38 – 39 ໃນເດືອນກ່ອນ, ຫວຽດນາມແລະອິນໂດເນເຊຍພ້ອມກັບບັນດາປະເທດອາຊຽນຮັບຮອງເອົາກອບຟື້ນຟູຢ່າງຮອບດ້ານອາຊຽນ (ACRF) ເພື່ອແນໃສ່ກຳນົດທິດໃຫ້ຍຸດທະສາດລວມໃນການຫຼຸດພົ້ນອອກຈາກໂລກລະບາດໂຄວິດ - 19 ຂອງພາກພື້ນ.
ໃນສະພາບການນັ້ນ, ທ່ານເອກອັກຄະລັດຖະທູດ ຟ້າມວິງກວາງ ຖືວ່າສອງປະເທດຄວນເພີ່ມທະວີການຮ່ວມມືໃນການຕ້ານໂລກລະບາດໂຄວິດ - 19, ຍົກສູງກຳລັງຄວາມສາມາດດ້ານສາທາລະນະສຸກປະຊາຄົມແລະສະຫວັດດີການສັງຄົມ, ພ້ອມທັງກຽມພ້ອມການຮັບມືກັບສິ່ງທ້າທາຍໃນອະນາຄົດ.
ສ່ວນທ່ານ Denny Abdi ເອກອັກຄະລັດຖະທູດອິນໂດເນເຊຍປະຈຳຫວຽດນາມໄດ້ຢັ້ງຢືນຄືນວ່າສອງປະເທດແມ່ນຄູ່ຮ່ວມມືຢ່າງແຮງໃນບັນດາຂົງເຂດເສດຖະກິດແລະການພັດທະນາ. ປັດຈຸບັນ, ການພົວພັນມິດຕະພາບທີ່ເປັນມູນເຊື້ອລະຫວ່າງສອງປະເທດໄດ້ກວມລວມທຸກຂົງເຂດ.
ຫວຽດນາມແມ່ນຄູ່ຮ່ວມມືເສດຖະກິດໃຫຍ່ອັນດັບທີ 4 ຂອງອິນໂດເນເຊຍໃນອາຊຽນແລະແມ່ນຕະຫຼາດສົ່ງອອກໃຫຍ່ອັນດັບທີ 9 ຂອງອິນໂດເນເຊຍ. ປັດຈຸບັນ, ສອງປະເທດກວມເອົາປະມານ 60% ພົນລະເມືອງແລະ 45%ຍອດ GDP ຂອງອາຊຽນ. ດ້ວຍທ່າອ່ຽງເຕີບໂຕຢ່າງຕັ້ງໜ້າ, ສອງປະເທດອາດຈະກວມເອົາ 60% GDP ແລະແມ່ນກຳລັງໜູນຊຸກຍູ້ການເຕີບໂຕເສດຖະກິດພາກພື້ນໄລຍະຫຼັງໂລກລະບາດໂຄວິດ - 19.
ນອກນີ້, ສອງປະເທດຍັງມີຫຼາຍຂົງເຂດຮ່ວມມືທີ່ມີຄວາມສາມາດບົ່ມຊ້ອນຄືອຸດສາຫະກຳສູງ ແລະ ເສດຖະກິດດີຈີຕອນຍ້ອນມີປະຊາກອນຫຼາຍ, ເກນອາຍຸໄວໜຸ່ມ ແລະມີການສຶກສາ, ກໍ່ຄືກຸ່ມຄົນທີ່ມີລາຍຮັບປານກາງເພີ່ມຂຶ້ນຢ່າງວ່ອງໄວ.
ໂດຍສະແດງຄວາມຊົມເຊີຍຕໍ່ການຮັບຮອງເອົາACRF, ເຊິ່ງໄດ້ອຳນວຍຄວາມສະດວກໃຫ້ແກ່ການເດີນທາງທີ່ສຳຄັນລະຫວ່າງບັນດາປະເທດອາຊຽນ, ທ່ານເອກອັກຄະລັດຖະທູດ Denny ຖືວ່າໜ້າທີ່ໃນປະຈຸບັນແມ່ນຮັບປະກັນການຕິດຕໍ່ພົວພັນລະຫວ່າງບັນດາລະບົບ ຫຼື ແອັບພຣິເຄຊັນໃນການຊອກຫາຜູ້ຕິດເຊື້ອໂຄວິດ - 19 ທີ່ພວມໄດ້ຮັບການນຳໃຊ້ຢູ່ຫຼາຍປະເທດໃນພາກພື້ນຢ່າງປອດໄພ ແລະ ມີປະສິດທິຜົນ.
ບໍ່ພຽງແຕ່ສ້າງຄວາມສະດວກໃຫ້ແກ່ນັກທ່ອງທ່ຽວ ແລະບັນດາບໍລິສັດການບິນເທົ່ານັ້ນ, ສິ່ງນີ້ຍັງຈະຊ່ວຍຟື້ນຟູອຸດສາຫະກຳປອດຄວັນ ທີ່ພວມໄດ້ຮັບຜົນກະທົບຢ່າງໜັກໜ່ວງຈາກໂລກລະບາດໂຄວິດ - 19.
ໂດຍແບ່ງປັນບັນຫານີ້, ທ່ານ Sandiaga Uno ລັດຖະມົນຕີກະຊວງການທ່ອງທ່ຽວ ແລະເສດຖະກິດປະດິດຄິດສ້າງຂອງອິນໂດເນເຊຍໄດ້ກ່າວວ່າໂລກລະບາດໄດ້ສົ່ງຜົນກະທົບແລະເຮັດໃຫ້ເກີດການປ່ຽນແປງຂອງລະບົບນິເວດການທ່ອງທ່ຽວ. ພື້ນຖານເສດຖະກິດການທ່ອງທ່ຽວໃໝ່ຈະຈັດລຳດັບຄວາມສຳຄັນດ້ານສຸຂະອະນາໄມ, ມີການພົບປະໜ້ອຍ, ການເຄື່ອນໄຫວເດີນທາງໄປມາໜ້ອຍ ແລະຫັນເປັນດິຈິຕອນ.
ສະນັ້ນ, ຂະແໜງການທ່ອງທ່ຽວຕ້ອງກຳນົດທິດຍຸດທະສາດ, ຫັນປ່ຽນຢ່າງວ່ອງໄວເພື່ອປັບຕົວເຂົ້າກັບການປ່ຽນແປງທີ່ບໍ່ແນ່ນອນ, ສັບສົນ ແລະບໍ່ຊັດເຈນຄືປະຈຸບັນ.
ທ່ານລັດຖະມົນຕີ Sandiaga ເນັ້ນໜັກວ່າ: ຄາດວ່າການທ່ອງທ່ຽວຈະກາຍເປັນກຳລັງຊຸກຍູ້ການເຕີບໂຕເສດຖະກິດແຫ່ງຊາດ. ຄວາມພະຍາຍາມນີ້ພວມເຂົ້າໃກ້ກັບຄວາມເປັນຈິງຍ້ອນຜົນສຳເລັດໃນການຮັບມືກັບການໂລກລະບາດໂຄວິດ-19 ແລະຊຸກຍູ້ການເຄື່ອນໄຫວທີ່ມີປະສິດທິຜົນຢູ່ທັງສອງປະເທດ.
ທີ່ກອງປະຊຸມ, ບັນດາຜູ້ແທນໄດ້ສຸມໃສ່ປຶກສາຫາລື ແລະ ແບ່ງປັນບັນດາທິດທາງດີທີ່ສຸດ ແລະບົດຮຽນຂອງຫວຽດນາມ ແລະອິນໂດເນເຊຍ ໃນການຕອບສະໜອງ ແລະດຳລົງຊີວິດຮ່ວມກັບພະຍາດໂຄວິດ-19, ບູລິມະສິດດ້ານສາທາລະນະສຸກ ແລະ ເສດຖະກິດ, ເປີດປະຕູພື້ນຖານເສດຖະກິດ ແລະທ່ອງທ່ຽວຄືນໃໝ່ ໂດຍສະເພາະແມ່ນໜູນຊ່ວຍວິສາຫະກິດ... ພ້ອມກັນນັ້ນ, ກໍ່ຄົ້ນຄ້ວາ ແລະສະແຫວງຫາກາລະໂອກາດຮ່ວມມືໃນຂົງເຂດຄົ້ນຄວ້າ ແລະຜະລິດວັກຊິນ ແລະຢາປົວພະຍາດປະເພດຕ່າງໆ ແລະຊຸກຍູ້ການຟື້ນຟູແບບຍືນຍົງ.
ບຸນຄົງ
