 |
| ທ່ານນາຍົກລັດຖະມົນຕີ ຟ້າມມິງຈິງ (ພາບ: moh.gov.vn) |
ໂທລະເລກທາງການໄດ້ສົ່ງໄປຍັງບັນດາກະຊວງ, ອົງການທຽບເທົ່າກະຊວງ, ອົງການຂຶ້ນກັບລັດຖະບານ, ຄະນະຊີ້ນຳການປ້ອງກັນຕ້ານໂລກລະບາດໂຄວິດ - 19 ແຂວງ, ນະຄອນຂຶ້ນກັບສູນກາງ, ຄະນະກຳມະການປະຊາຊົນແຂວງ, ນະຄອນຂຶ້ນກັບສູນກາງຊີ້ແຈ້ງວ່າ:
ເພື່ອສືບຕໍ່ເພີ່ມທະວີການປະຕິບັດບັນດາມາດຕະການປ້ອງກັນ, ຕ້ານໂລກລະບາດໂຄວິດ - 19 ຢ່າງປອດໄພ, ມີໄຫວພິບ, ຄວບຄຸມໂລກລະບາດໂຄວິດ - 19 ຢ່າງມີປະສິດທິຜົນທັງຟື້ນຟູການພັດທະນາເສດຖະກິດ, ທ່ານນາຍົກລັດຖະມົນຕີຮຽກຮ້ອງໃຫ້:
ຄະນະຊີ້ນຳການປ້ອງກັນ, ຕ້ານໂລກລະບາດໂຄວິດ - 19 ບັນດາແຂວງ, ນະຄອນຂຶ້ນກັບສູນກາງຊີ້ນຳການປະຕິບັດຢ່າງເຂັ້ມງວດມະຕິເລກທີ 128 ລົງວັນທີ 11 ຕຸລາ ປີ 2021ຂອງລັດຖະບານກ່ຽວກັບການຮັບມືຢ່າງປອດໄພ, ມີໄຫວພິບ, ຄວບຄຸມໂລກລະບາດໂຄວິດ - 19 ຢ່າງມີປະສິດທິຜົນ, ຊີ້ນຳ, ແນະນຳຄະນະຊີ້ນຳການປ້ອງກັນ, ຕ້ານໂລກລະບາດໂຄວິດ - 19 ໃນທຸກຂັ້ນເພື່ອກະກຽມວິທີການ, ແຜນການປ້ອງກັນ, ຕ້ານໂລກລະບາດໃນບໍລິເວນຢ່າງມີໄຫວພິບ, ມີວິທະຍາສາດ, ມີປະສິດທິຜົນ, ສືບຕໍ່ປະຕິບັດບັນດາມາດຕະການປ້ອງກັນ, ຕ້ານໂລກລະບາດຢ່າງເຂັ້ມງວດຄືວິໄຈຫາເຊື້ອໂດຍໄວ, ແຍກຕົວຢ່າງທັນການ, ປິ່ນປົວຢ່າງມີປະສິດທິຜົນ… ຕິດພັນກັບການປະຕິບັດການຟື້ນຟູ, ພັດທະນາເສດຖະກິດສັງຄົມໃຫ້ເປັນຢ່າງດີ.
ບັນດາແຂວງ, ນະຄອນຂຶ້ນກັບສູນກາງຊີ້ນຳຍົກສູງກຳລັງຄວາມສາມາດລະບົບສາທາລະນະສຸກ, ເປັນຕົ້ນແມ່ນສາທາລະນະສຸກຂັ້ນຮາກຖານ, ກຽມພ້ອມການສ້າງສຸກສາລາເຄື່ອນທີ່ຢູ່ບ່ອນເກີດໂລກລະບາດໂຄວິດ - 19, ທ້ອງຖິ່ນທີ່ໂລກລະບາດໂຄວິດ - 19 ມີການຜັນແປຢ່າງສັບສົນ, ຈັດຕັ້ງການສັກວັກຊິນໂດຍໄວ, ທັນການ ແລະມີປະສິດທິຜົນພາຍຫຼັງໄດ້ຮັບວັກຊິນ. ກະຊວງສາທາລະນະສຸກໄດ້ປະຕິບັດການແຈກຢາຍວັກຊິນທີ່ໄດ້ຮັບ, ຊີ້ນຳບັນດາທ້ອງຖິ່ນຈັດຕັ້ງການສັກວັກຊິນຢ່າງທັນການພາຍຫຼັງໄດ້ຮັບ, ຮັບປະກັນຄວາມປອດໄພ, ມີວິທະຍາສາດ, ມີປະສິດທິຜົນ. ກະຊວງສາທາລະນະສຸກ, ກະຊວງປ້ອງກັນປະເທດຈັດຕັ້ງກຳລັງໜູນຊ່ວຍບັນດາທ້ອງຖິ່ນສັກວັກຊິນໂດຍໄວເທົ່າທີ່ຈະໄວໄດ້.
ບັນດາກະຊວງ, ຄະນະຊີ້ນຳການປ້ອງກັນ, ຕ້ານໂລກລະບາດ, ຄະນະກຳມະການປະຊາຊົນທຸກຂັ້ນເພີ່ມທະວີການກວດກາວຽກງານປ້ອງກັນ,ຕ້ານໂລກລະບາດໂຄວິດ - 19 ຢູ່ ອົງການ, ໜ່ວຍງານ, ອົງການຈັດຕັ້ງ, ວິສາຫະກິດ, ເປັນຕົ້ນແມ່ນໂຮງໝໍ, ຮາກຖານຜະລິດ, ຕະຫຼາດ, ສະຖານີລົດໄຟ, ສະໜາມບິນ, ຄິວລົດ… ຮຽກຮ້ອງຕ້ອງປະຕິບັດຄວາມປອດໄພດ້ານໂຄວິດ - 19 ຢ່າງເຂັ້ມງວດ, ຍູ້ແຮງການໂຄສະນາໃຫ້ປະຊາຊົນສືບຕໍ່ປະຕິບັດ 5 ປະການ, ບໍ່ໃຫ້ຖືເບົາຍ້ອນໄດ້ຮັບການສັກວັກຊິນແລ້ວ, ແກ້ໄຂການລະເມີດກ່ຽວກັບການປ້ອງກັນ, ຕ້ານໂລກລະບາດຢ່າງເຂັ້ມງວດ.
ຄະນະກຳມະການປະຊາຊົນບັນດາແຂວງ, ນະຄອນຂຶ້ນກັບສູນກາງສືບຕໍ່ກວດກາຄືນ, ປະຕິບັດນະໂຍບາຍໜູນຊ່ວຍປະຊາຊົນຢ່າງເຂັ້ມງວດ, ຮັບປະກັນຊີວິດສັງຄົມ, ຮັບປະກັນຢ່າງທັນການ, ມີປະສິດທິຜົນ, ຖືກຕ້ອງຕາມເປົ້າໝາຍທີ່ໄດ້ກຳນົດ.
ບຸນຄົງ
