| EVFTA ຊຸກຍູ້ບັນດາວິສາຫະກິດຝລັ່ງ ເອົາໃຈໃສ່ເຖິງ ຫວຽດນາມ | |
| ເລີ່ມຕົ້ນ Festival ຫວຽດນາມ ຄັ້ງທີ 2 ຢູ່ຝລັ່ງ |
 |
| ທ່ານປະທານາທິບໍດີ ຝລັ່ງ Emmanuel Macron (ພາບ: AFP/TTXVN) |
ວັນທີ 2 ພະຈິກ, ຢູ່ ປາຣີ, ທ່ານເອກອັກຄະລັດຖະທູດ ຜູ້ມີອຳນາດເຕັມແຫ່ງສສ ຫວຽດນາມ ປະຈຳ ຝລັ່ງ ດິງຕວັນທັ້ງ ໄດ້ຍື່ນສານຕາຕັ້ງຂອງທ່ານປະທານປະເທດ ຫງວຽນຊວັນຟຸກ ເຖິງທ່ານປະທານາທິບໍດີ ຝລັ່ງ Emmanuel Macron
ທີ່ພິທີຍື່ນສານຕາຕັ້ງ, ທ່ານປະທານາທິບໍດີ ຝລັ່ງ Emmanuel Macron ໄດ້ສະແດງຄວາມຊົມເຊີຍຕໍ່ທ່ານ ດິງຕວັນທັ້ງ ເມື່ອໄດ້ຮັບການແຕ່ງຕັ້ງເປັນເອກອັກຄະລັດຖະທູດ ຫວຽດນາມ ປະຈຳ ຝລັ່ງ, ຕີລາຄາສູງບັນດາຜົນງານໃນການພົວພັນຮ່ວມມືລະຫວ່າງສອງປະເທດ ໃນໄລຍະຜ່ານມາໃນຫຼາຍຂົງເຂດ, ຈາກການເມືອງ - ການທູດ ຕະຫຼອດຮອດການຄ້າ - ການລົງທຶນ, ການຮ່ວມມືພັດທະນາກໍ່ຄືການສຶກສາ - ບຳລຸງສ້າງ, ວິທະຍາສາດ - ເຕັກໂນໂລຢີ, ວັດທະນະທຳ ແລະ ການຮ່ວມມືຢູ່ທ້ອງຖິ່ນ, ພິເສດແມ່ນພາຍຫຼັງສອງປະເທດສ້າງຕັ້ງການພົວພັນຄູ່ຮ່ວມມືຍຸດທະສາດ.
ທ່ານປະທານາທິບໍດີ ຝລັ່ງ ຢັ້ງຢືນທີ່ຕັ້ງພິເສດຂອງ ຫວຽດນາມ ໃນນະໂຍບາຍຂອງ ຝລັ່ງ, ສະແດງຄວາມຍິນກ່ຽວກັບການຢ້ຽມຢາມຝລັ່ງຢ່າງເປັນທາງການ ໃນລະຫວ່າງວັນທີ 3 – 5 ພະຈິກ ຂອງທ່ານນາຍົກລັດຖະມົນຕີ ຟ້າມມິງຈິງ ແລະ ຮູ້ສຶກເປັນກຽດເມື່ອໄດ້ພົບປະກັບທ່ານນາຍົກລັດຖະມົນຕີ ໃນການຢ້ຽມຢາມຄັ້ງນີ້.
ສ່ວນທ່ານເອກອັກຄະລັດຖະທູດ ດິງຕວານທັ້ງ ໄດ້ສະແດງຄວາມເປັນກຽດເມື່ອໄດ້ຮັບດຳລົງຕຳແໜ່ງເປັນເອກອັກຄະລັດຖະທູດ ຫວຽດນາມ ປະຈຳ ຝລັ່ງ, ຢັ້ງຢືນ ຫວຽດນາມ ຍາມໃດກໍ່ຖືເປັນສຳຄັນ ແລະ ມີຄວາມປາດຖະໜາຢາກເພີ່ມທະວີການພົວພັນຄູ່ຮ່ວມມືຍຸດທະສາດກັບ ຝລັ່ງ ໂດຍແມ່ນໜຶ່ງໃນບັນດາຄູ່ຮ່ວມມືແຖວໜ້າຂອງ ຫວຽດນາມ ໃນຫຼາຍຂົງເຂດ.
ທ່ານເອກອັກຄະລັດຖະທູດຢັ້ງຢຶນວ່າ ຈະມານະພະຍາຍາມຈົດສຸດຄວາມສາມາດຂອງຕົນເພື່ອເພີ່ມພູນຄູນສ້າງໃຫ້ແກ່ການພົວພັນທີ່ເປັນມູນເຊື້ອ, ສະໜິດຕິດພັນມາແຕ່ດົນນານລະຫວ່າງສອງປະເທດ ແລະ ສອງຊາດ, ປະກອບສ່ວນຊຸກຍູ້ການພົວພັນຮ່ວມມືລະຫວ່າງ ຫວຽດນາມ - ຝລັ່ງ ໃຫ້ນັບມື້ນັບພັດທະນາຢ່າງເລິກເຊິ່ງກວ້າງຂວາງ ແລະ ມີປະສິດທິຜົນ, ມຸ່ງໄປເຖິງການສະເຫຼີມສະຫຼອງ ວັນສ້າງຕັ້ງການພົວພັນທາງການທູດຄົບຮອບ 50 ປີ, ວັນສ້າງຕັ້ງການພົວພັນຄູ່ຮ່ວມມືຍຸດທະສາດ ຄົບຮອບ 10 ປີໃນປີ 2023.
ທ່ານເອກອັກຄະລັດຖະທູດ ສະແດງຄວາມເຊື່ອໝັ້ນວ່າ ດ້ວຍບັນດາກຳລັງຄວາມສາມາດໃນການຮ່ວມມືອັນຍິ່ງໃຫຍ່ລະຫວ່າງສອງປະເທດ, ການຢ້ຽມຢາມຂອງທ່ານນາຍົກລັດຖະມົນຕີ ຟ້າມມິງຈິງ ໄປຍັງຝລັ່ງ ກໍ່ຄືການແລກປ່ຽນຄະນະຂັ້ນສູງລະຫວ່າງສອງຝ່າຍໃນໄລຍະຜ່ານມາ ຈະສືບຕໍ່ສ້າງຂອບເຂດ ແລະ ວິໄສທັດຍາວນານໃຫ້ແກ່ການພົວພັນລະຫວ່າງ ຫວຽດນາມ ແລະ ຝລັ່ງ, ແມ່ນພື້ນຖານເພື່ອສືບຕໍ່ນຳການພົວພັນສອງປະເທດກ້າວຂຶ້ນ.
ບຸນຄົງ
