 |
| ທ່ານນາງ Robyn Mudie ເອກອັກຄະລັດຖະທູດອົດສະຕາລີປະຈຳຫວຽດນາມ (ພາບ: qdnd.vn) |
ລັດຖະບານອົດສະຕາລີຫາກໍ່ອະນຸມັດບ້ວງເງິນໜູນຊ່ວຍ 5 ລ້ານ AUD ເພື່ອແນໃສ່ໜູນຊ່ວຍຫວຽດນາມເພີ່ມທະວີຄວາມສາມາດໃນການແກ້ງແຍ່ງ, ຫຼຸດຜ່ອນການປ່ອຍອາຍພິດກາກບອນແລະປັບປຸງຊີວິດການເປັນຢູ່, ການຫາລ້ຽງຊີບຂອງປະຊາຊົນ.
ນີ້ແມ່ນແຫຼ່ງອຸປະຖຳໜູນຊ່ວຍໃຫ້ແກ່ໂຄງການຮ່ວມມືລະຫວ່າງລັດຖະບານອົດສະຕາລີແລະກຸ່ມທະນາຄານໂລກປະຈຳຫວຽດນາມທີ່ໄດ້ຮັບການສ້າງຕັ້ງຂຶ້ນເພື່ອແນໃສ່ໜູນຊ່ວຍໂຄງການພັດທະນາຂອງຫວຽດນາມໃນຫຼາຍຂົງເຂດນະໂຍບາຍທີ່ແຕກຕ່າງກັນ.
ທ່ານນາງ Robyn Mudie ເອກອັກຄະລັດຖະທູດອົດສະຕາລີປະຈຳຫວຽດນາມໃຫ້ຮູ້ວ່າ: ການຮ່ວມມືເປີດກ້ວາງລະຫວ່າງລັດຖະບານອົດສະຕາລີແລະທະນາຄານໂລກຈະສືບຕໍ່ສຸມໃສ່ໜູນຊ່ວຍຫວຽດນາມຟື້ນຟູເສດຖະກິດໂດຍໄວແລະບັນລຸໄດ້ບັນດາເປົ້າໝາຍພັດທະນາ...
ໂດຍໄດ້ຮູ້ວ່າ, ໂຄງການ ABP ຈະສືບຕໍ່ບັນດາການເຄື່ອນໄຫວຊຸກຍູ້ຄວາມສະເໝີພາບລະຫວ່າງຍິງຊາຍແລະພັດທະນາແບບຍືນຍົງຢູ່ເຂດທົ່ງພຽງແມ່ນ້ຳຂອງທາງພາກໃຕ້ຫວຽດນາມ. ໂຄງການກໍ່ຜັນຂະຫຍາຍບັນດາການເຄື່ອນໄຫວໃໝ່ເພື່ອແນໃສ່ຕອບສະໜອງບັນດາບຸລິມະສິດໃໝ່ທີ່ໄດ້ວາງອອກໃນຍຸດທະສາດພັດທະນາເສດຖະກິດສັງຄົມໄລຍະ 10 ປີ 2021 – 2030 ແລະແຜນການພັດທະນາເສດຖະກິດສັງຄົມໄລຍະ 5 ປີ 2021 – 2025ໃຫ້ເປັນຢ່າງດີ.
ທ່ານນາງ Carolyn Turk ຜູ້ອຳນວຍການແຫ່ງຊາດທະນາຄານໂລກປະຈຳຫວຽດນາມຖືວ່າໂຄງການ ABP ຈະສືບຕໍ່ໃຫ້ຄຳປຶກສາຊ່ວຍບັນດານັກວາງແຜນກຳນົດນະໂຍບາຍຫວຽດນາມເດີນຕາມບັນດາການປະຕິຮູບຢ່າງແທດຈິງ. ນີ້ແມ່ນການປະຕິຮູບທີ່ຈຳເປັນເພື່ອຊ່ວຍຫວຽດນາມຟື້ນຟູພາຍຫຼັງຜົນກະທົບດ້ານເສດຖະກິດຈາກໂລກລະບາດໂຄວິດ - 19, ພ້ອມທັງສ້າງພື້ນຖານຢ່າງໝັ້ນແກ່ນເພື່ອບັນລຸໄດ້ເປົ້າໝາຍກາຍເປັນພື້ນຖານເສດຖະກິດທີ່ມີລາຍຮັບສູງ.
ບຸນຄົງ
