 |
| ນັກຂ່າວ Marta Rojas |
ທ່ານພົນເອກ Raúl Castro Ruz ແລະທ່ານເລຂາທິການຜູ້ທີໜຶ່ງພັກກອມມູນິດ - ປະທານປະເທດກູບາ Miguel Díaz-Canel Bermúdez ໄດ້ສົ່ງພວງມາລາອຳລາໜຶ່ງໃນບັນດານັກຂ່າວທີ່ມີຄວາມໄວ້ວາງໃຈທີ່ສຸດແລະຕົວພະຍານປະຫວັດສາດຈາກຊຸມວັນທຳອິດຂອງການປະຕິວັດກູບາ.
ທ່ານປະທານປະເທດຫງວຽນຊວັນຟຸກໄດ້ສົ່ງພວງມາລາ, ໝູ່ຄະນະພະນັກງານສະຖານທູດຫວຽດນາມປະຈຳກູບາໄດ້ໄປໄຫວ້ອາໄລເພື່ອສະແດງຄວາມຮູບບຸນຄຸນຕໍ່ນັກຂ່າວບັ້ນຮົບຊາວກູບາແລະອາເມລິກາລາຕິນຄົນທຳອິດໃນການຕໍ່ສູ້ຕ້ານອາເມລິກາຂອງປະຊາຊົນຫວຽດນາມແລະແມ່ນຜູ້ຮ່ວມເດີນທາງກັບບັນດາໄລຍະທີ່ມີການປ່ຽນແປງຂອງຊາດຫວຽດນາມ,ເພີ່ມພູນຄູນສ້າງນ້ຳໃຈມິດຕະພາບລະຫວ່າງສອງຊາດຢ່າງບໍ່ຢຸດຢັ້ງໃນໄລຍະ 6 ທົດສະວັດທີ່ຜ່ານມາ.
ນັກຂ່າວ Marta Rojas ເກີດວັນທີ 28 ພຶດສະພາປີ 1928 ຢູ່ Santiago de ປະເທດກູບາ. ພາຍລັງຮຽນຈົບພະແນກສື່ມວນຊົນຢູ່ມະຫາວິທະຍາໄລ La Habana, ທ່ານນາງໄດ້ເຫັນປະຈັກຕາການບຸກໂຈມຕີເຂົ້າຄ້າຍທະຫານ Moncada ໃນວັນທີ 26 ກໍລະກົດປີ 1953 ໂດຍການນຳ Fidel Castro ບັນຊາການແລະເຫັນປະຈັກຕາວາລະດຳເນີນຄະດີຂອງລະບອບຜະເດັດການ Batista ເພື່ອພິພາກສາເພິ່ນແລະເພື່ອນຮ່ວມກົມກອງ.
ທ່ານນາງໄດ້ຈົດແລະຖ່າຍທອດຢ່າງລະອຽດບັນດາເຫດການປະຫວັດສາດນີ້ໃນປືຶ້ມ“ວາລະດຳເນີນຄະດີMoncada” ໂດຍແມ່ນຜົນງານທີ່ໄດ້ຮັບການຕີລາຄາສູງທີ່ສຸດກ່ຽວກັບຄຸນຄ່າຂອງສື່ມວນຊົນ.
ພາຍຫຼັງການປະຕິວັດກູບາປະສົບຜົນສຳເລັດໃນປີ 1959, ທ່ານນາງໄດ້ເຮັດວຽກໃນບາງອົງການສື່ມວນຊົນປະຕິວັດແລະເຮັດວຽກຢູ່Granma ນັບແຕ່ປີ 1965 ໂດຍແມ່ນປີສ້າງຕັ້ງໜັງສືພິມ Granma.
ດ້ວຍ ບົດຂຽນເປັນຈຳນວນຫຼວງຫຼາຍ ພ້ອມກັບປຶ້ມນັບສິບຫົວທີ່ໄດ້ພິມຈຳໜ່າຍ, ນັກຂຽນ Marta Rojas ໄດ້ຮັບລາງວັນສື່ມວນຊົນທົ່ວໂລກ José Martí (ລາງວັນອັນສູງສົ່ງທີ່ສຸດທີ່ສະຫງວນໃຫ້ແກ່ບັນດານັກຂ່າວຢູ່ກູບາແລະພິຈາລະນາຕາມຜົນງານຕະຫຼອດຊີວິດ), ລາງວັນວັນນະຄະດີ Alejo Carpentier ແລະນາມມະຍົດວິລະຊົນແຮງງານແຫ່ງຊາດ.
ໜັງສືພິມລາຍວັນ Granma ເນັ້ນໜັກວ່ານັກຂ່າວ Marta Rojas ໄດ້ຮັບການຈົດຈຳຄືນັກຂ່າວບັ້ນຮົບຄົນທຳອິດຂອງຊາວກູບາແລະອາເມລິກາລາຕິນໃນການຕໍ່ສູ້ຕ້ານອາເມລິກາຂອງປະຊາຊົນຫວຽດນາມ.
ນັກຂ່າວMarta Rojas ໄດ້ເຫັນປະຈັກຕາບັນດາບັ້ນຖິ້ມລູກລະເບີດທີ່ຮ້າຍແຮງຂອງກອງທັບອາກາດອາເມລິກາທີ່ທຳລາຍພາກເໜືອຫວຽດນາມ, ເຫັນປະຈັກຕາບັນດາບັ້ນຕໍ່ສູ້ທີ່ສະຫຼາດສ່ອງໄສ, ອົງອາດກ້າຫານຂອງກອງຫຼອນກູຈີຢູ່ພາກໃຕ້...ໃນໄລຍະກ່ວາ 10 ປີ. ນັກຂ່່າວ Marta Rojas ແມ່ນນັກຂ່າວຕ່າງປະເທດຄົນສຸດທ້າຍໄດ້ສຳພາດທ່ານປະທານ ໂຮ່ຈີມິນ.
ຍາມໃດນັກຂ່າວ Marta Rojas ກໍ່ຮັກສານ້ຳໃຈພິເສດແລະມີການເຂົ້າຮ່ວມຢ່າງຕັ້ງໜ້າໃນບັນດາຂະບວນການ, ການເຄື່ອນໄຫວສະໜັບສະໜູນຫວຽດນາມ, ສ້າງນ້ຳໃຈສາມັກຄີລະຫວ່າງສອງຊາດ. ທ່ານນາງໄດ້ມີບົດຂຽນຢ່າງກະທັດລັດຢ່າງເປັນປະຈຳໃນໜັງສືພິມລາຍວັນ Granma ກ່ຽວກັບ “ປະເທດຊາດບ້ານເກີດເມືອງນອນລຸງໂຮ່” ໃນບັນດາວັນສະເຫຼີມສະຫຼອງທີ່ສຳຄັນ.
ເຖິງວ່າມີອາຍຸກ່ວາ 90 ປີແລ້ວ, ແຕ່ນັກຂ່າວ Marta Rojas ຍັງຮັບດຳລົງຕຳແໜ່ງບົດບາດເປັນຮອງປະທານສະມາຄົມມິດຕະພາບກູບາ -ຫວຽດນາມ. ກ່ອນຈະເຖິງແກ່ມໍລະນະກຳ, ນັກຂ່າວ Marta Rojas ໄດ້ເຂົ້າຮ່ວມການພົບປະລະຫວ່າງທ່ານປະທານປະເທດ ຫງວຽນຊວັນຟຸກ ກັບຜູ້ຕາງໜ້າສະຖາບັນກູບາມິດຕະພາບກັບບັນດາຊົນຊາດ (ICAP), ແລະສະມາຄົມມິດຕະພາບກູບາ - ຫວຽດນາມທີ່ໄດ້ດຳເນີນໃນການຢ້ຽມຢາມກູບາຢ່າງເປັນທາງການຂອງທ່ານປະທານປະເທດ ຫງວຽນຊວັນຟຸກ ໃນລະຫວ່າງວັນທີ 18 – 20 ກັນຍາປີ 2021.
ບຸນຄົງ
