| ລັດຖະບານຮ່ວມເດີນທາງ, ຊ່ວຍເຫຼືອວິສາຫະກິດຟື້ນຟູການຜະລິດ | |
| ກະຊວງ ແຜນການ ແລະ ການລົງທຶນສົມທົບກັບບັນດາທ້ອງຖິ່ນສ້າງແຜນການຟື້ນຟູເສດຖະກິດ |
 |
| ທ່ານນາຍົກລັດຖະມົນຕີ ຫວຽດນາມ ຟ້າມມິງຈິງ ກ່າວຄຳເຫັນທີ່ກອງປະຊຸມ (ພາບ: VGP) |
ເຂົ້າຮ່ວມກອງປະຊຸມຢູ່ຈຸດເຊື່ອມຕໍ່ 63 ແຂວງ, ນະຄອນ ຂຶ້ນກັບສູນກາງ ມີບັນດາທ່ານເລຂາຄະນະພັກແຂວງ, ນະຄອນ; ປະທານຄະນະກຳມະການປະຊາຊົນບັນດາແຂວງ, ນະຄອນ; ການນຳບັນດາພະແນກ, ຄະນະ, ຂະແໜງການ, ອົງການຈັດຕັ້ງ ແລະ ຜູ້ແທນ, ຜູ້ຕາງໜ້າວິສາຫະກິດ ແລະ ສະຫະສະມາຄົມວິສາຫະກິດຢູ່ທ້ອງຖິ່ນຕ່າງໆ ຈຳນວນ 1.200 ທ່ານ.
ກ່າວຄຳເຫັນໄຂກອງປະຊຸມ, ທ່ານນາຍົກລັດຖະມົນຕີ ເນັ້ນໜັກວ່າ: ບົນເນື້ອໃນຈິດໃຈ “ຍິ່ງປະສົບກັບຄວາມຫຍຸ້ງຍາກ, ຍິ່ງສັບສົນ ຕ້ອງຍິ່ງມີຄວາມສາມັກຄີ, ຍິ່ງມີປະຊາທິປະໄຕ, ຮັບຟັງຄຳເຫັນຂອງກັນ ເພື່ອພ້ອມກັນຜ່ານຜ່າຄວາມຫຍຸ້ງຍາກ ແລະ ສິ່ງທ້າທາຍ”, ທ່ານນາຍົກລັດຖະມົນຕີມີຄວາມປາດຖະໜາຢາກສືບຕໍ່ຮັບຟັງຄຳເຫັນຂອງປະຊາຄົມວິສາຫະກິດ, ຊອກຫາມາດຕະການຊຸກຍູ້ການຜະລິດດຳເນີນທຸລະກິດ, ໜູນຊ່ວຍບັນດາວິສາຫະກິດ, ພ້ອມກັບທົ່ວປະເທດ “ປັບຕົວໃຫ້ແທດເໝາະກັບສະພາບ ຢ່າງປອດໄພ, ມີໄຫວພິບ, ຄວບຄຸມໂລກລະບາດໄດ້ຢ່າງມີປະສິດທິຜົນ”, ຟື້ນຟູການຜະລິດ, ດຳເນີນທຸລະກິດ, ພັດທະນາເສດຖະກິດ - ສັງຄົມເທື່ອລະກ້າວ.
“ພວກເຮົາຕ້ອງຊອກຫາວິທີເພື່ອປັບຕົວໃຫ້ແທດເໝາະກັບສະພາບໂລກລະບາດນີ້, ພວກເຮົາຕ້ອງສືບຕໍ່ດຳເນີນການພົບປະແລກປ່ຽນຕື່ມອີກ ແລ້ວແກ້ໄຂເທື່ອລະກ້າວ, ຮັບຟັງຄຳຄິດເຫັນຂອງກັນ, ເຄົາລົບເຊິ່ງກັນແລະກັນເພື່ອພ້ອມກັນປຶກສາຫາລືຊອກຫາມາດຕະການແກ້ໄຂ ເພື່ອທັງຕ້ານໂລກລະບາດໄດ້ເປັນຢ່າງດີ ທັງພັດທະນາເສດຖະກິດ”
ກ່າວຄຳເຫັນທີ່ກອງປະຊຸມ, ທ່ານລັດຖະມົນຕີກະຊວງແຜນການ ແລະ ການລົງທຶນ ຫງວຽນຈີຢຸງ ໄດ້ຍົກອອກ 6 ຂໍ້ສະເໜີແນະ, ໃນນັ້ນ ໄດ້ສະເໜີໃຫ້ທ້ອງຖິ່ນຕ່າງໆຈົ່ງສ້າງ ແລະ ປະກາດແຜນການຟື້ນຟູເສດຖະກິດໃນສະພາບການໃໝ່ໂດຍດ່ວນ. ພ້ອມດຽວກັນນັ້ນ, ພ້ອມກັບບັນດາວິສາຫະກິດ, ເປັນເຈົ້າການຄົ້ນຄວ້າ, ເປັນເອກະພາບກ່ຽວກັບແບບວິທີ, ເງື່ອນໄຂຈັດຕັ້ງການຜະລິດ, ດຳເນີນທຸລະກິດຢ່າງຮອດໄພ, ຮັບມືກັບການຜັນແປຂອງໂລກລະບາດຢູ່ທ້ອງຖິ່ນ ແລະ ສ້າງເງື່ອນໄຂຕົວຈິງໃຫ້ແກ່ວິສາຫະກິດ; ຈຳກັດການປິດປະຕູໂຮງຈັກໂຮງງານຢ່າງສຸດຂີດ.
ກ່າວຄຳເຫັນສະຫຼຸບກອງປະຊຸມ, ທ່ານນາຍົກລັດຖະມົນຕີ ຟ້າມມິງຈິງ ເນັ້ນໜັກວ່າ, ກອງປະຊຸມຄັ້ງນີ້ ແລະ ກອງປະຊຸມ, ການພົບປະແລກປ່ຽນ, ໂອ້ລົມຄັ້ງຕ່າງໆທີ່ຈັດຂຶ້ນໃນໄລຍະຜ່ານມາໄດ້ສະແດງໃຫ້ເຫັນຄວາມສຸດຈິດສຸດໃຈ, ນ້ຳໃຈຄວາມຮັບຜິດຊອບຂອງບັນດານັກທຸລະກິດ, ຄວາມຄາດຫວັງຂອງຊາດ, ຄວາມມຸ່ງມາດປາດຖະໜາຢາກປະກອບສ່ວນເຂົ້າໃນການສ້າງປະເທດຫວຽດນາມ ທີ່ສະຫງົບສຸກ ແລະ ພັດທະນາ. ລັດຖະບານຈະຍູ້ແຮງການແບ່ງຂັ້ນ, ແບ່ງສິດອຳນດາຢ່າງສຸດຂີດເພື່ອໃຫ້ອຳນາດການປົກຄອງໃກ້ຊິດກັບປະຊາຊົນ, ໃກ້ຊິດກັບວິສາຫະກິດຫຼາຍກວ່າ, ເພື່ອໃຫ້ວິສາຫະກິດມີຄວາມໃກ້ຊິດສະໜິດສະໜົມກັບອຳນາດການປົກຄອງໄວກວ່າ.
ສຳລັບບັນດາຂໍ້ສະເໜີແນະຂອງວິສາຫະກິດ, ທ່ານນາຍົກລັດຖະມົນຕີໃຫ້ຮູ້ວ່າ ລັດຖະບານພວມພ້ອມກັບ ສະພາແຫ່ງຊາດ ພະຍາຍາມຮ່ວມເດີນທາງພ້ອມກັບວິສາຫະກິດ, ບົນເນື້ອໃນຈິດໃຈ “3 ບໍ່ ແລະ 5 ຈິງ”, ນັ້ນແມ່ນ ບໍ່ເວົ້າລ້າໆ, ບໍ່ເວົ້າຍາກ, ບໍ່ເວົ້າເຮັດແຕ່ບໍ່ເຮັດ, ຄິດຈິງ, ເວົ້າຈິງ, ທຳຈິງ, ມີປະສິດທິຜົນຢ່າງແທ້ຈິງ ແລະ ປະຊາຊົນ ແລະ ວິສາຫະກິດໄດ້ຊົມໃຊ້ຜົນງານນັ້ນຢ່າງແທ້ຈິງ”.
vovworld.vn
