ບັນດາອົງການຈັດຕັ້ງສາສະໜາ ຂະຫຍາຍກິດຈະກຳເພື່ອຊຸມຊົນ

	ຮ່າໂນ້ຍ ແລະ Saint Petersburg ຂະຫຍາຍການຮ່ວມມື
	ຊຸກຍູ້ການຮ່ວມມືທາງດ້ານການປ້ອງກັນຊາດ ຫວຽດນາມ - ອິນເດຍ

ການປະຕິບັດທຳ ຕິດພັນກັບການລົງມືເຮັດຈິງ

ຫຼາຍບົດປະກອບຄຳເຫັນ ທີ່ສົ່ງເຖິງກອງປະຊຸມໃຫຍ່ຜູ້ແທນທົ່ວປະເທດ ແນວໂຮມປະເທດຊາດ ຫວຽດນາມ ຄັ້ງທີ XI, ອາຍຸການ 2026-2031 ໃຫ້ເຫັນວ່າ, ກິດຈະກຳຂອງບັນດາອົງການຈັດຕັ້ງສາສະໜາ ໃນປັດຈຸບັນ ບໍ່ພຽງແຕ່ຢຸດຢູ່ທີ່ການຊ່ວຍເຫຼືອ ຫຼື ການເຮັດການກຸສົນເປັນໄລຍະໆເທົ່ານັ້ນ, ແຕ່ຫາກຍັງຕິດພັນກັບຄວາມຕ້ອງການຕົວຈິງ ໃນຊີວິດການເປັນຢູ່ຂອງປະຊາຊົນ ຢູ່ທ້ອງຖິ່ນອີກດ້ວຍ.

ສຳລັບ ພຸດທະສາສະໜາ ຮ່ວາຮາວ (Phật giáo Hòa Hảo), ຈິດໃຈ "ຮຽນພຸດ ປະຕິບັດຕົນ" (Học Phật tu Nhân), ການປະຕິບັດທຳແບບ "ຄະລຶຫັດຜູ້ນຸ່ງຂາວຫົ່ມຂາວ ຢູ່ເຮືອນ" (Tại gia cư sĩ) ແລະ ການຕອບແທນບຸນຄຸນທັງສີ່ (Tứ ân) ແມ່ນໄດ້ຖືກຫັນມາເປັນຮູບປະທຳ ດ້ວຍຫຼາກຫຼາຍກິດຈະກຳທາງສັງຄົມ.

ໂຮງຮຽນມັດທະຍົມສົມບູນພຸດທະສາສະໜາ ຮ່ວາຮາວ (Phật giáo Hòa Hảo) ມີນັກຮຽນເຂົ້າຮຽນເປັນຈຳນວນຫຼວງຫຼາຍ ມາຈາກຫຼາຍເກນອາຍຸ.

ທ່ານ ຫງວຽນເຕິ່ນດາດ (Nguyễn Tấn Đạt), ປະທານຄະນະບໍລິຫານງານສູນກາງ ກອງທັບທຳພຸດທະສາສະໜາ ຮ່ວາຮາວ ໃຫ້ຮູ້ວ່າ, ທາງກອງທັບທຳໄດ້ຈັດຕັ້ງປະຕິບັດຮູບແບບ "2 ສະຫງົບ" (2 An) ຢູ່ແຂວງ ອານຢາງ (An Giang) ກ່ຽວກັບຄວາມສະງົບຮຽບຮ້ອຍ ແລະ ສະຫວັດດິການສັງຄົມ; ຮູບແບບ "3 ຮ່ວມເດີນທາງ" (3 Đồng hành) ຢູ່ແຂວງ ດົ່ງທາບ (Đồng Tháp) ກ່ຽວກັບຄວາມສະງົບຮຽບຮ້ອຍ, ສະຫວັດດິການສັງຄົມ ແລະ ການຫັນເປັນດິຈິຕອນ.

ຈາກບັນດາຮູບແບບດັ່ງກ່າວນີ້, ສາສະນິກະຊົນເປັນຈຳນວນຫຼວງຫຼາຍ ໄດ້ເຂົ້າຮ່ວມຂະບວນການປົກປັກຮັກສາຄວາມສະຫງົບຂອງປະເທດຊາດ, ການສ້າງສາຊົນນະບົດໃໝ່ ແລະ ຕົວເມືອງສິວິໄລ; ພ້ອມທັງຍົກສູງສະຕິລະວັງຕົວ ຕໍ່ກັບພຶດຕິກຳທີ່ສວຍໃຊ້ສາສະໜາ ເພື່ອສ້າງຄວາມບໍ່ສະຫງົບໃຫ້ແກ່ສັງຄົມ.

ໝາກຜົນຂອງການເຮັດການກຸສົນສັງຄົມ ຂອງພຸດທະສາສະໜາ ຮ່ວາຮາວ ກໍໄດ້ເພີ່ມຂຶ້ນໃນແຕ່ລະອາຍຸການ: ຈາກ 22 ຕື້ດົ່ງ ໃນຊ່ວງປີ 1999-2004 ຂຶ້ນມາເປັນເກືອບ 2.500 ຕື້ດົ່ງ ໃນຊ່ວງປີ 2019-2024; ແລະ ສະເພາະໃນປີ 2025 ຜ່ານມານີ້ ແມ່ນສາມາດລະດົມທຶນໄດ້ເຖິງ 610 ຕື້ດົ່ງ.

ຫຼາຍອົງການຈັດຕັ້ງສາສະໜາອື່ນໆ ກໍໄດ້ຮັກສາເຄືອຂ່າຍການຊ່ວຍເຫຼືອຊຸມຊົນ ດ້ວຍຮູບແບບການເຂົ້າເຖິງສະເພາະຂອງຕົນ. ຄະນະມູນນິທິ ສາສະໜາກາວດ່າຍ ທຽນທຽນ (Cao Đài Tiên Thiên) ໄດ້ສ້າງເຄືອຂ່າຍຊ່ວຍເຫຼືອຊຸມຊົນ ຜ່ານກິດຈະກຳການກວດພະຍາດ, ປິ່ນປົວພະຍາດ ແລະ ການເບິ່ງແຍງດູແລຜູ້ທຸກຍາກ.

ຕາມທ່ານ ຈານໂພຍຊື ເທື້ອງຟອງແທັງ (Thượng Phong Thanh), ປະທານຄະນະກຳມະການປະຈຳການ ຄະນະມູນນິທິ ສາສະໜາກາວດ່າຍ ທຽນທຽນ ໃຫ້ຮູ້ວ່າ, ລະບົບການກວດປິ່ນປົວພະຍາດດ້ວຍຢາພື້ນເມືອງຕາເວັນອອກ (Đông dược) ແລະ ຢາພື້ນເມືອງຫວຽດນາມ (Nam dược) ໃນປັດຈຸບັນ ແມ່ນໄດ້ຮັບການຮັກສາໄວ້ ຢູ່ຕາມບັນດາສະຖານທີ່ຕ່າງໆຂອງສາສະໜາຢ່າງທົ່ວເຖິງ ເພື່ອຮັບໃຊ້ຊຸມຊົນ ແລະ ເບິ່ງແຍງດູແລສຸຂະພາບຂອງປະຊາຊົນ.

ພະຍາບານສະຖານຂອງ ແທັ່ງຕິ່ງ ທຽນເຈື້ອກ (Thánh tịnh Thiên Trước), ເຊິ່ງເປັນສະຖານທີ່ສັກກາລະບູຊາ ສັງກັດຄະນະມູນນິທິ ສາສະໜາກາວດ່າຍ ທຽນທຽນ (Cao Đài Tiên Thiên) ໄດ້ກວດພະຍາດ ແລະ ແຈກຢາຍຢາໃຫ້ແກ່ປະຊາຊົນໂດຍບໍ່ຄິດຄ່າ.

ໃນອາຍຸການທີ່ຜ່ານມາ, ຄະນະມູນນິທິ ສາສະໜາກາວດ່າຍ ທຽນທຽນ ໄດ້ຮັກສາພະຍາບານສະຖານການແພດແຜນໂບຮານ 24 ແຫ່ງ, ໂຮງທານ (ເຮືອນຄົວການກຸສົນ) 5 ແຫ່ງ ຢູ່ຕາມໂຮງໝໍ; ພ້ອມກັນນັ້ນ ກໍໄດ້ຊ່ວຍເຫຼືອການສ້າງຂົວ ແລະ ເສັ້ນທາງຄົມມະນາຄົມຢູ່ຊົນນະບົດ, ຊ່ວຍເຫຼືອນັກຮຽນທຸກຍາກ, ຄົນເຈັບຜູ້ນ້ອຍໂອກາດ, ຄົນພິການ ແລະ ຊ່ວຍເຫຼືອບັນເທົາທຸກຈາກໄພພິບັດທາງທຳມະຊາດ.

ມູນຄ່າລວມຂອງວຽກງານການກຸສົນ - ສັງຄົມ ແມ່ນບັນລຸໄດ້ຫຼາຍກວ່າ 70,6 ຕື້ດົ່ງ; ສະເພາະກິດຈະກຳການກວດພະຍາດ ແລະ ແຈກຢາຍຢາໃຫ້ຟຣີໃນແຕ່ລະປີ ແມ່ນມີມູນຄ່າສູງກວ່າ 6 ຕື້ດົ່ງ.

ໃນບົດປະກອບຄຳເຫັນຂອງ ກອງທັບທຳພຸດທະສາສະໜາ ຫວຽດນາມ, ເູນເຊື້ອ "ປົກປັກຮັກສາປະເທດຊາດ ເຮັດໃຫ້ປະຊາຊົນສະຫງົບສຸກ" (Hộ quốc an dân) ສືບຕໍ່ໄດ້ຮັບການຍົກຂຶ້ນມາເວົ້າ ເພື່ອເປັນທິດທາງໃນການຮ່ວມເດີນທາງໄປພ້ອມກັບສັງຄົມ. ນັບຮອດເດືອນພະຈິກ ປີ 2025, ແຫຼ່ງກຳລັງລວມທີ່ກອງທັບທຳສະຫງວນໄວ້ໃຫ້ແກ່ສະຫວັດດິການສັງຄົມ ແມ່ນບັນລຸໄດ້ປະມານ 4.850 ຕື້ດົ່ງ, ເຊິ່ງໄດ້ນຳໃຊ້ເຂົ້າໃນຫຼາຍກິດຈະກຳ ເປັນຕົ້ນແມ່ນ: ການສ້າງເຮືອນແຫ່ງຄວາມຮັກແພງ, ການມອບທຶນການສຶກສາ, ການສ້າງຂົວຢູ່ຊົນນະບົດ, ການຂຸດນ້ຳບາດານ, ການຊ່ວຍເຫຼືອສູນເບິ່ງແຍງດູແລຜູ້ເຖົ້າຊະລາ, ເດັກກຳພ້າ, ຄົນພິການ ຫຼື ການສ້ອມແປງໂຮງຮຽນ ຢູ່ຕາມເຂດທຸລະກັນດານ, ເຂດຊາຍແດນ ແລະ ເຂດເກາະດອນ.

ແຫຼ່ງກຳລັງດັ່ງກ່າວນີ້ ແມ່ນໄດ້ຮັບການລະດົມມາຈາກຫຼາກຫຼາຍກິດຈະກຳທາງສັງຄົມ, ການກຸສົນ ແລະ ການຊ່ວຍເຫຼືອບັນເທົາທຸກຊຸມຊົນໃນທົ່ວປະເທດ. ໃນຊ່ວງໄລຍະທີ່ມີການແຜ່ລະບາດຂອງພະຍາດ COVID-19, ເຄືອຂ່າຍຮາກຖານພຸດທະສາສະໜາ ເຄີຍໄດ້ສ້າງຕັ້ງຈຸດໜູນຊ່ວຍເຖິງ 1.247 ແຫ່ງ, ສະໜອງອາຫານຟຣີປະມານ 8,6 ລ້ານກ່ອງ ແລະ ປະກອບສ່ວນປັດໄຈ 380 ຕື້ດົ່ງ ເຂົ້າໃນກອງທຶນວັກຊີນ.

ການເຊື່ອມໂຍງຊຸມຊົນ

ຢູ່ຕາມຫຼາຍທ້ອງຖິ່ນ, ວັດ, ໂບດ ຫຼື ສາລາສັກກາລະບູຊາ ໄດ້ກາຍມາເປັນສະຖານທີ່ຮ່ວມກິດຈະກຳຂອງຊຸມຊົນ, ເຊິ່ງແມ່ນບ່ອນທີ່ປະຊາຊົນພາກັນມາເພື່ອປະຕິບັດຄວາມເຊື່ອຖື, ຮັບການຊ່ວຍເຫຼືອ ຫຼື ເຂົ້າຮ່ວມບັນດາກິດຈະກຳລວມຂອງເຂດຊຸມຊົນ.

ຄະນະກຳມະການສາມັກຄີກາໂຕລິກ ຫວຽດນາມ ໃຫ້ຮູ້ວ່າ, ຫຼາຍໜ່ວຍຊຸມຊົນກາໂຕລິກ ໃນປັດຈຸບັນ ໄດ້ຮັກສາກິດຈະກຳເບິ່ງແຍງດູແລຜູ້ທຸກຍາກ, ຜູ້ດ້ອຍໂອກາດ, ເຂົ້າຮ່ວມການສ້າງສາຊີວິດການເປັນຢູ່ທາງດ້ານວັດທະນະທຳ ແລະ ຮັກສາຄວາມສະຫງົບຮຽບຮ້ອຍຢູ່ຕາມເຂດຊຸມຊົນ. ບາງແຫ່ງໄດ້ເລີ່ມນຳໃຊ້ເຕັກໂນໂລຊີຂໍ້ມູນຂ່າວສານ ເຂົ້າໃນການບໍລິຫານ ແລະ ການເຊື່ອມຕໍ່ກັບຄຣິດຕະສາສະນິກະຊົນ.

ຫຼາຍອົງການຈັດຕັ້ງສາສະໜາ ຍັງມີບົດບາດໃນການເຊື່ອມຕໍ່ຊຸມຊົນຄົນຫວຽດນາມອາໄສຢູ່ຕ່າງປະເທດ. ພຣະມະຫາເຖລະ ທິກດຶກຕວນ (Thích Đức Tuấn), ປະທານກອງທັບທຳພຸດທະສາສະໜາ ຫວຽດນາມ ປະຈຳ ທະວີບອາເມລິກາ ໃຫ້ຮູ້ວ່າ ຊຸມຊົນຄົນຫວຽດນາມ ຢູ່ ສະຫະລັດອາເມລິກາ ແລະ ການາດາ ນັບມື້ນັບເຕີບໃຫຍ່ຂະຫຍາຍຕົວ, ເຊິ່ງເຮັດໃຫ້ຄວາມຕ້ອງການໃນການຮັກສາການເຊື່ອມໂຍງທາງດ້ານວັດທະນະທຳ, ຈິດວິນຍານ ແລະ ເອກະລັກຂອງຊາດ ເພີ່ມສູງຂຶ້ນຕາມໆກັນ.

ກອງທັບທຳພຸດທະສາສະໜາ ຫວຽດນາມ ປະຈຳ ທະວີບອາເມລິກາ ໃນປັດຈຸບັນ ໄດ້ຮັກສາກິດຈະກຳຢູ່ຕາມຮາກຖານພຸດທະສາສະໜາຫຼາຍແຫ່ງ ຢູ່ ສະຫະລັດອາເມລິກາ ແລະ ການາດາ; ຮັກສາການດຳເນີນກິດຈະກຳທາງສາສະໜາ, ບັນດາງານບຸນປະເພນີ ແລະ ກິດຈະກຳແລກປ່ຽນພຸດທະສາສະໜາສາກົນ.

ທາງກອງທັບທຳ ຍັງໄດ້ປຸກລະດົມຊຸມຊົນຄົນຫວຽດນາມ ຢູ່ທະວີບອາເມລິກາ ໃຫ້ຫັນໜ້າມາສູ່ປະເທດຊາດ ຜ່ານບັນດາກິດຈະກຳການກຸສົນ, ມະນຸດສະທຳ, ຊ່ວຍເຫຼືອພໍ່ແມ່ປະຊາຊົນພາຍໃນປະເທດ ເວລາເກີດໄພພິບັດທາງທຳມະຊາດ ແລະ ໂລກລະບາດ. ການສ້າງຕັ້ງວັດເພື່ອເຮັດເປັນຫ້ອງການກອງທັບທຳພຸດທະສາສະໜາ ຫວຽດນາມ ແຫ່ງທຳອິດ ຢູ່ທະວີບອາເມລິກາ ໄດ້ສ້າງພື້ນທີ່ເພີ່ມຕື່ມ ໃຫ້ແກ່ການດຳເນີນກິດຈະກຳທາງດ້ານວັດທະນະທຳ - ຈິດວິນຍານ ສຳລັບຊຸມຊົນຄົນຫວຽດນາມ ຢູ່ເຂດແຄວ້ນດັ່ງກ່າວ.

ຈາກພຶດຕິກຳຕົວຈິງຂອງກິດຈະກຳຢູ່ຮາກຖານ, ຫຼາຍອົງການຈັດຕັ້ງສາສະໜາ ໄດ້ສະເໜີໃຫ້ຂະຫຍາຍກົນໄກການປະສານສົມທົບຮ່ວມກັບ ແນວໂຮມປະເທດຊາດ ແລະ ອຳນາດການປົກຄອງທ້ອງຖິ່ນ ໃນການຈັດຕັ້ງປະຕິບັດບັນດາໂຄງການສະຫວັດດິການສັງຄົມ, ເບິ່ງແຍງດູແລຜູ້ດ້ອຍໂອກາດ ແລະ ສ້າງສາຊຸມຊົນ.

ຄະນະບໍລິຫານງານສູນກາງ ກອງທັບທຳພຸດທະສາສະໜາ ຮ່ວາຮາວ ໄດ້ສະເໜີໃຫ້ບັນດາຂະແໜງການ ແລະ ແຕ່ລະຂັ້ນ ສືບຕໍ່ຂະຫຍາຍບັນດາຮູບແບບການປະສານສົມທົບທີ່ມີປະສິດທິຜົນ ເປັນຕົ້ນແມ່ນ "02 ສະຫງົບ", "03 ຮ່ວມເດີນທາງ", ໂດຍຕິດພັນກັບການຊ່ວຍເຫຼືອດ້ານອາຊີບ ແລະ ການພັດທະນາຊົນນະບົດ.

ຄະນະກຳມະການສາມັກຄີກາໂຕលິກ ຫວຽດນາມ ໃຫ້ຮູ້ວ່າ ຈະຊຸກຍູ້ການນຳໃຊ້ເຕັກໂນໂລຊີຂໍ້ມູນຂ່າວສານ ແລະ ຄ່ອຍໆສ້າງຮາກຖານລະບົບດິຈິຕອນ ເພື່ອເຊື່ອມຕໍ່ຕັ້ງແຕ່ຂັ້ນສູນກາງລົງຮອດທ້ອງຖິ່ນ. ສຳລັບ ຄະນະມູນນິທິ ສາສະໜາກາວດ່າຍ ທຽນທຽນ, ຈຸດສຸມແມ່ນການເພີ່ມທະວີການປະສານສົມທົບຮ່ວມກັບ ແນວໂຮມປະເທດຊາດ ຫວຽດນາມ ແລະ ບັນດາອົງການຈັດຕັ້ງສະມາຊິກ ບົນຈິດໃຈເປີດເຜີຍ, ໂປ່ງໃສ ແລະ ຖືກຕ້ອງຕາມກົດໝາຍ.

ບັນດາອົງການຈັດຕັ້ງສາສະໜາ ຕ່າງກໍໄດ້ເນັ້ນໜັກເຖິງຄຳຂວັນທີ່ວ່າ "ການປະຕິບັດທຳຕິດພັນກັບຊີວິດການເປັນຢູ່, ຮ່ວມເດີນທາງໄປພ້ອມກັບປະເທດຊາດ", ໂດຍຖືເອົາຜົນປະໂຫຍດຂອງຊາດ - ຂອງປະຊາຊົນ ເປັນພື້ນຖານໃນການສ້າງຄວາມເຫັນພ້ອມເປັນເອກະພາບກັນໃນຊຸມຊົນ.

ຊຸກຍູ້ການຮ່ວມມືທາງດ້ານການປ້ອງກັນຊາດ ຫວຽດນາມ - ອິນເດຍ ຍສໝ - ໂດຍຕອບສະໜອງຕາມຄຳເຊີນຂອງພົນເອກ ຟານວັນຢາງ (Phan Văn Giang), ກຳມະການກົມການເມືອງ, ຮອງນາຍົກລັດຖະມົນຕີ, ລັດຖະມົນຕີກະຊວງປ້ອງກັນປະເທດ, ຄະນະຜູ້ແທນຂັ້ນສູງຂອງ ອິນເດຍ ໂດຍແມ່ນທ່ານ Rajnath Singh, ລັດຖະມົນຕີກະຊວງປ້ອງກັນປະເທດ ອິນເດຍ ເປັນຫົວໜ້າຄະນະ ໄດ້ເດີນທາງມາຢ້ຽມຢາມ ຫວຽດນາມ ຢ່າງເປັນທາງການ ນັບຕັ້ງແຕ່ວन्ທີ 18-19 ພຶດສະພາ.

ຫວຽດນາມ ແມ່ນຄູ່ຮ່ວມມືທີ່ຂະຫຍັນຂັນເຄື່ອນ, ມີບົດບາດນັບມື້ນັບສຳຄັນ ຢູ່ພາກພື້ນອາຊີຕາເວັນອອກສຽງໃຕ້ ຍສໝ - ທ່ານປະທານາທິບໍດີ Isaac Herzog ເນັ້ນໜັກວ່າ Israel ໃຫ້ຄວາມສຳຄັນຕໍ່ສາຍພົວພັນກັບ ຫວຽດນາມ; ພ້ອມທັງຕີລາຄາວ່າ ຫວຽດນາມ ແມ່ນຄູ່ຮ່ວມມືທີ່ຂະຫຍັນຂັນເຄື່ອນ ແລະ ມີບົດບາດນັບມື້ນັບສຳຄັນ ຢູ່ພາກພື້ນອາຊີຕາເວັນອອກສຽງໃຕ້.