 |
| ການເຈລະຈາທາງໂທລະສັບ (ພາບ: TTXVN) |
ທ່ານລັດຖະມົນຕີ ບຸຍແທັງເຊີນ ສະເໜີໃຫ້ 2 ຝ່າຍຈົ່ງຮັກສາການແລກປ່ຽນ, ພົບປະຢູ່ທຸກຂັ້ນດ້ວຍຮູບແບບຢ່າງມີໄຫວພິບ; ເພີ່ມທະວີການແບ່ງປັນຂໍ້ມູນຂ່າວ, ນະໂຍບາຍກ່ຽວຂ້ອງເຖິງວຽກງານປ້ອງກັນ ຕ້ານໂລກລະບາດ, ສົມທົບກັນໃນການປ້ອງກັນ ຕ້ານໂລກລະບາດຢູ່ເຂດຊາຍແດນ.
ສອງຝ່າຍໄດ້ນຳໃຊ້ບັນດາມາດຕະການທີ່ມີປະສິດທິຜົນເພື່ອຮັກສາທ່າເຕີບໂຕການຮ່ວມມືເສດຖະກິດ - ການຄ້າ, ສ້າງຄວາມສະດວກໃຫ້ແກ່ສິນຄ້າ ຫວຽດນາມ, ເປັນຕົ້ນແມ່ນຜະລິດຕະພັນກະເສດ, ສິນໃນນ້ຳນຳເຂົ້າຈີນ, ບໍ່ໃຫ້ຂາດວັກຂາດຕອນການພົວພັນການຄ້າ, ລະບົບສະໜອງ, ລະບົບ logistic, ສົມທົບກັນຄຸ້ມຄອງເຂດຊາຍແດນໃຫ້ເປັນຢ່າງດີ, ຍູ້ໄວການສ້າງການເຊື່ອມຕໍ່ພື້ນຖານໂຄງລ່າງດ່ານຊາຍແດນ, ປະຕິບັດສຳເລັດລະບຽບການພາຍໃນໂດຍໄວເພື່ອຍົກສູງບັນດາດ່ານຊາຍແດນ ແລະ ແກ້ໄຂບັນດາບັນຫາທີ່ເກີດຂຶ້ນຄືນໃໝ່ຢ່າງທັນການ.
ສ່ວນທ່ານເລຂາຄະນະພັກ ລູຊິນຊາງ ຢືນຢັນວ່າ ແຂວງ ກວາງຊີ ຕີລາຄາສູງທ່າພັດທະນາຢ່າງດີງາມຂອງການພົວພັນຈີນ - ຫວຽດນາມ ກໍ່ຄືບັນດາຜົນງານໃນການຮ່ວມມືມິດຕະພາບ ລະຫວ່າງ ກວາງຊີ ກັບບັນດາກະຊວງ, ຂະແໜງການ, ທ້ອງຖິ່ນ ຫວຽດນາມ ໃນໄລຍະຜ່ານມາ.
ແຂວງ ກວາງຊີ ຈະມານະພະຍາຍາມຍົກສູງຄວາມໄວໃຫ້ແກ່ສິນຄ້າຜ່ານແດນຢູ່ດ່ານຊາຍແດນທາງລົດໄຟ ແລະ ທາງບົກ, ສ້າງເງື່ອນໄຂສະດວກເພື່ອໃຫ້ບັນດາປະເພດສິນຄ້າຂອງຫວຽດນາມ, ໂດຍສະເພາະແມ່ນຜະລິດຕະພັນກະເສດທີ່ນຳເຂົ້າແຂວງ ກວາງຊີ ແລະ ບັນດາແຂວງພາຍໃນປະເທດ ຈີນ ແລະ ສົ່ງໄປຍັງເຂດອາຊີກາງ.
ແຂວງ ກວາງຊີ ຈະປະຕິບັດຄວາມຮັບຮູ້ລວມຂອງການນຳຂັ້ນສູງສອງພັກ, ສອງລັດໃຫ້ເປັນຢ່າງດີ, ເພີ່ມທະວີການພົວພັນມິດຕະພາບ ແລະ ການຮ່ວມມືຢ່າງແທ້ຈິງ ກັບບັນດາທ້ອງຖິ່ນ ຫວຽດນາມ, ເປັນຕົ້ນແມ່ນບັນດາແຂວງເຂດຊາຍແດນ, ປະກອບສ່ວນປັບປຸງການພົວພັນຄູ່ຮ່ວມມືຍຸດທະສາດຮອບດ້ານລະຫວ່າງ ຈີນ ຫວຽດນາມ.
ບຸນຄົງ
