 |
| ພາບປະກອບ: Vietnamnet |
ວັນທີ 23 ສິງຫາ, ທ່ານລັດຖະມົນຕີ ກະຊວງອຸດສາຫະກຳ ແລະ ການຄ້າ ຫງວຽນຮົ່ງຢຽນ ໄດ້ສົ່ງຈົດໝາຍທາງການເຖິງ ທ່ານລັດຖະມົນຕີກະຊວງອຸດສາຫະກຳການຄ້າ ຈີນ ແລະ ເຈົ້າແຂວງຢຸນໜານ (ຈີນ) ເພື່ອສະເໜີສ້າງຄວາມສະດວກໃຫ້ແກ່ການເຄື່ອນໄຫວຜ່ານດ່ານຊາຍແດນ ແລະ ສົ່ງອອກບັນດາຜະລິດຕະພັນກະເສດ, ໝາກໄມ້ຂອງ ຫວຽດນາມ.
ໃນຈົດໝາຍທາງການ, ທ່ານລັດຖະມົນຕີກະຊວງອຸດສາຫະກຳ ແລະ ການຄ້າ ຫງວຽນຮົ່ງຢຽນ ໃຫ້ຮູ້ວ່າ ຕໍ່ໜ້າສະພາບການເກີດໂລກລະບາດໂຄວິດ - 19 ດ້ວຍສາຍພັນ Delta ທີ່ພວມມີການຜັນແປຢ່າງສັບສົນນັ້ນ, ການເຄື່ອນໄຫວແລກປ່ຽນສິນຄ້າສົ່ງອອກນຳເຂົ້າຢູ່ດ່ານຊາຍແດນສືບຕໍ່ໄດ້ຮັບການຮັບປະກັນຄວາມປອດໄພຕໍ່ການປ້ອງກັນ, ຕ້ານໂລກລະບາດໂຄວິດ - 19 ຢ່າງເດັດຂາດ, ບໍ່ເຮັດໃຫ້ເກີດມີຜູ້ຕິດເຊື້ອໂຄວິດ - 19 ຜ່ານດ່ານຊາຍແດນ ຫວຽດນາມ - ຈີນ.
ທ່ານລັດຖະມົນຕີ ຫງວຽນຮົ່ງຢຽນ ສະແດງຄວາມເສຍດາຍ ເມື່ອໄດ້ຮັບຂ່າວວ່າ ພະແນກການຄ້າ ຢຸນໜານ ແຈ້ງການຢຸດຕິການນຳເຂົ້າມັງກອນ ຈາກຫວຽດນາມ ຜ່ານບັນດາດ່ານຊາຍແດນໃນບໍລິເວນນັບແຕ່ເດືອນກໍລະກົດ 2021 ຍ້ອນມີຄວາມວິຕົກກັງວົນຈາກສະພາບການໂລກລະບາດໂຄວິດ - 19 ຢູ່ ຫວຽດນາມ.
ມາຮອດກາງເດືອນສິງຫາ, ໝາກມັງກອນເວົ້າສະເພາະ ແລະ ໝາກໄມ້ຫຼາຍຊະນິດ, ຜະລິດຕະພັນກະເສດປະເພດຕ່າງໆຂອງ ຫວຽດນາມ ເວົ້າລວມ ໂດຍພື້ນຖານແມ່ນບໍ່ສາມາດສົ່ງອອກໄປຍັງຈີນ ຜ່ານບັນດາດ່າຍຊາຍແດນ ກັບແຂວງຢຸນໜານ. ໃນຂະນະນັ້ນ, ການເຄື່ອນໄຫວນຳເຂົ້າຜັກພືດ, ຜະລິດຕະພັນກະເສດຈາກຢູນໜານ ສົ່ງໄປຍັງບັນດາທ້ອງຖິ່ນຢູ່ເຂດຊາຍແດນ ຫວຽດນາມ ຍັງດຳເນີນຢ່າງສະດວກ ດ້ວຍລົດຂົນສົ່ງປະມານ 400 ຄັນຕໍ່ວັນ.
ທ່ານລັດຖະມົນຕີກະຊວງອຸດສາຫະກຳ ແລະ ການຄ້າ ສະແດງ ຄວາມເຂົ້າໃຈ ແລະ ແບ່ງປັນ ຄວາມສົນໃຈກ່ຽວກັບວຽກງານປ້ອງກັນ, ຕ້ານໂລກລະບາດໂຄວິດ - 19 ຂອງຝ່າຍຈີນ, ແຕ່ຕາມທ່ານແລ້ວ, ພຽງແຕ່ອົງການທີ່ມີໜ້າທີ່ຄວາມຮັບຜິດຊອບດ່ານຊາຍແດນ ແລະ ວິສາຫະກິດສອງຝ່າຍສືບຕໍ່ປະຕິບັດຂັ້ນຕອນຂົນສົ່ງສິນຄ້າຜ່ານແດນຢ່າງເຂັ້ມງວດ ກໍ່ໄດ້ເປັນການຢັ້ງຢືນປະສິດທິຜົນໃນໄລຍະໜຶ່ງປີຜ່ານມາ, ດັ່ງນັ້ນ ວຽກງານປ້ອງກັນຕ້ານໂລກະລະບາດໂຄວິດ - 19 ກໍ່ຈະໄດ້ຮັບການຮັບປະກັນຄວາມປອດໄພຢ່າງເດັດຂາດ.
ທ່ານລັດຖະມົນຕີກະຊວງອຸດສາຫະກຳ ແລະ ການຄ້າ ຫວຽດນາມ ໄດ້ສະເໜີໃຫ້ທ່ານລັດຖະມົນຕີກະຊວງການຄ້າ ຈີນ ເອົາໃຈໃສ໋, ຊີ້ນຳແຂວງຢຸນໜານຮີບດ່ວນຍົກເລີກມາດຕະການຈຳກັດການນຳເຂົ້າຜະລິດຕະພັນກະເສດຜ່ານບັນດາດ່ານຊາຍແດນຕິດກັບ ຫວຽດນາມ. ພ້ອມທັງສົມທົບກັບບັນດາທ້ອງຖິ່ນເຂດຊາຍແດນ ຫວຽດນາມ ສືບຕໍ່ທັງປະຕິບັດການປ້ອງກັນ, ສະກັດກັ້ນໂລກລະບາດ, ທັງຮັກສາການຂົນສົ່ງສິນຄ້າໃຫ້ເປັນປົກກະຕິ.
ໃນຈົດໝາຍທາງການສົ່ງໄປຍັງເຈົ້າແຂວງແຂວງ ຢຸນໜາມ (ຈີນ), ທ່ານລັດຖະມົນຕີກະຊວງອຸດສາຫະກຳ ແລະ ການຄ້າ ຫງວຽນຮົ່ງຢຽນ ກໍ່ໄດ້ຍົກອອກຂໍ້ສະເໜີທີ່ຄ້າຍຄືກັນ.
ບຸນຄົງ
