ກ່າວຄຳເຫັນທີ່ພິທີ, ທ່ານນາງເອກອັກຄະລັດຖະທູດ ຫງວຽນເຟືອງງາ - ປະທານສະຫະພັນບັນດາອົງການຈັດຕັ້ງມິດຕະພາບ ຫວຽດນາມ (VUFO) ໄດ້ສະແດງຄວາມຊົມເຊີຍ ທ່ານ Kamal Malhotra ທີ່ໄດ້ປະສົບຜົນສຳເລັດໃນອາຍຸການທີ່ປະຈຳຢູ່ຫວຽດນາມ. ພ້ອມກັນນັ້ນ, ທ່ານນາງຫງວຽນເຟືອງງາ ກໍ່ໄດ້ສະແດງຄວາມຂອບໃຈສໍາລັບການອຸທິດຕົນຂອງ ທ່ານ Kamal Malhotra ເພື່ອປະເທດ, ປະຊາຊົນ ແລະ ຄວາມສໍາເລັດຂອງຫວຽດນາມ ໃນການເດີນທາງມຸ່ງໄປສູ່ການພັດທະນາແບບຍືນຍົງ, ສ້າງສາປະເທດໃຫ້ຈະເລີນຮຸ່ງເຮືອງ ແລະ ມີຄວາມຜາສຸກ.
ທ່ານນາງເອກອັກຄະລັດຖະທູດ ຫງວຽນເຟືອງງາ ໄດ້ສະແດງຄວາມຫວັງວ່າ ໃນຖານະເປັນເພື່ອນທີ່ສະ ໜິດສະໜົມຂອງຫວຽດນາມ, ທ່ານ Kamal Malhotra ແລະ ເພື່ອນຮ່ວມງານ ຈະສືບຕໍ່ສະໜັບສະໜູນຫວຽດນາມ ແລະ ປະກອບສ່ວນອັນໃຫຍ່ຫຼວງເຂົ້າໃນການຮັກສາສັນຕິພາບ, ຊຸກຍູ້ການພັດທະນາແບບຍືນຍົງຢູ່ໃນໂລກ.
 |
| ທ່ານນາງເອກອັກຄະລັດຖະທູດ ຫງວຽນເຟືອງງາ ໄດ້ມອບຫຼຽນກາລະນຶກ “ເພື່ອສັນຕິພາບ ແລະ ມິດຕະພາບລະຫວ່າງບັນດາຊາດ” ໃຫ້ແກ່ທ່ານ Kamal Malhotra. |
ໃນ 5 ປີຜ່ານມາ, ໃນຖານະເປັນຜູ້ປະສານງານຂອງສະຫະປະຊາຊາດ (ສປຊ) ປະຈຳຫວຽດນາມ, ທ່ານ Kamal ພ້ອມກັບບັນດາອົງການຂອງສະຫະປະຊາຊາດ ໄດ້ປະກອບສ່ວນອັນສຳຄັນ ເຂົ້າໃນການເພີ່ມທະວີການເຂົ້າຮ່ວມຂອງຫວຽດນາມ ໃນການເຄື່ອນໄຫວຮັກສາສັນຕິພາບຂອງສະຫະປະຊາຊາດ, ໄດ້ຈັດຕັ້ງຫຼາຍການເຄື່ອນໄຫວທີ່ມີຄວາມໝາຍ ແລະ ປະທັບໃຈ ກ່ຽວກັບບັນຫາອັນຮີບດ່ວນ ເຊັ່ນ: ບັນຫາລູກລະເບີດ, ແມ່ຍິງ, ສັນຕິພາບ ແລະ ຄວາມໝັ້ນຄົງ, ພ້ອມກັນນັ້ນ ກໍ່ໄດ້ສະແດງການສະໜັບສະໜູນຢ່າງແຮງ ຂອງສະຫະປະຊາຊາດ ຕໍ່ກັບບົດບາດເປັນປະທານອາຊຽນຂອງຫວຽດນາມ ໃນປີ 2020 ແລະ ເປັນສະມາຊິກບໍ່ຖາວອນຂອງສະພາຄວາມໝັ້ນຄົງສະຫະປະຊາຊາດອາຍຸການ 2020-2021.
ໃນສະພາບການຜັນແປຢ່າງສັບສົນຂອງໂລກລະບາດ COVID-19, ທ່ານ Kamal Malhotra ແລະ ບັນດາອົງການຂອງສປຊ ໄດ້ຕັ້ງໜ້າແລກປ່ຽນຂໍ້ມູນຂ່າວສານ, ປະສົບການ, ແນະນໍານະໂຍບາຍ ໜູນຊ່ວຍຫວຽດນາມ, ລະດົມວັກຊີນ ແລະ ອຸປະກອນການແພດໃຫ້ຫວຽດນາມ. ປະຈຸບັນ, ອົງການສະຫະປະຊາຊາດ ແມ່ນໜຶ່ງໃນບັນດາຜູ້ສະໜອງວັກຊີນລາຍໃຫຍ່ທີ່ສຸດໃຫ້ແກ່ຫວຽດນາມ ຜ່ານ COVAX ດ້ວຍຈຳນວນເກືອບ 10 ລ້ານໂດສ.
ໂດຍຮັບຮູ້ການປະກອບສ່ວນອັນລ້ຳຄ່າ ຂອງທ່ານ Kamal Malhotra ເຂົ້າໃນການພັດທະນາຂອງຫວຽດນາມ ແລະ ການພົວພັນມິດຕະພາບ, ການຮ່ວມມືລະຫວ່າງສະຫະປະຊາຊາດ ແລະ ຫວຽດນາມ, ປະທານສະຫະພັນບັນດາອົງການຈັດຕັ້ງມິດຕະພາບ (VUFO) ໄດ້ມີການມອບຫຼຽນກາທີ່ລະນຶກ “ເພື່ອສັນຕິພາບ ແລະ ມິດຕະພາບລະຫວ່າງບັນດາຊາດ” - ລາງວັນສູງສຸດຂອງ VUFO.
ໂດຍແບ່ງປັນໃນພິທີ, ທ່ານ Kamal Malhotra ໄດ້ສະແດງຄວາມຂອບໃຈ ທ່ານນາງເອກອັກຄະລັດຖະທູດ ຫງວຽນເຟືອງງາ, VUFO ແລະ ບັນດາອົງການທີ່ກ່ຽວຂ້ອ ງທີ່ໄດ້ສະໜັບສະໜູນທ່ານ ໃນເວລາທີ່ເຮັດວຽກຢູ່ຫວຽດນາມ. ທ່ານເຊື່ອໝັ້ນວ່າ ການພົວພັນລະຫວ່າງສະຫະປະຊາຊາດ ແລະ ຫວຽດນາມ ຈະພັດທະນາດີກ່ວາໃນອະນາຄົດ, ພ້ອມທັງຢືນຢັນວ່າ ຈະສະໜັບສະໜູນ ແລະ ຊຸກຍູ້ບັນດາການເຄື່ອນໄຫວຮ່ວມມືກັບຫວຽດນາມໃນໄລຍະຈະມາເຖິງ.
ຄຳຮຸ່ງ
