 |
| ພາບປະກອບ: TTXVN |
ນະຄອນຖູດຶກ ໄດ້ມີການພົບປະ, ລະດົມກຳລັງໃຈຊາວຕ່າງປະເທດ 25 ຄົນທີ່ມາຈາກຫຼາຍປະເທດ ທີ່ຖືກຜົນກະທົບຈາກໂລກລະບາດໂຄວິດ - 19 ແລະ ປະສົບກັບຄວາມຫຍຸ້ງຍາກ. ໃນຈຳນວນນັ້ນ ບາງຄົນກໍ່ແມ່ນຄູສອນ, ແມ່ຄົວ, ກຳມະກອນ… ໂລກລະບາດເກີດຂຶ້ນ ແລະ ແກ່ຍາວມາເປັນເວລາຫຼາຍເດືອນ ເຮັດໃຫ້ເງິນທີ່ເຂົາເຈົ້າເກັບສະສົມມານັ້ນໝົດກ້ຽງ.
ທ່ານ Danny Ray Draughn (ສັນຊາດ ອາເມລິກາ) ດຳລົງຊີວິດ ຢູ່ນະຄອນຖູດຶກ ມາເປັນເວລາເກືອບ 10 ປີແລ້ວ ແລະ ແມ່ນຄູສອນພາສາອັງກິດໃຫ້ແກ່ເດັກນ້ອຍທີ່ມີອາຍຸ 5 ປີຂຶ້ນໄປ. ໂລກລະບາດໂຄວິດ - 19 ເກີດຂຶ້ນມາເປັນເວລາເກືອບ 2 ປີ ໄດ້ເຮັດໃຫ້ລາຍຮັບຂອງທ່ານ ຖືກຜົນກະທົບຢ່າງຮ້າຍແຮງ. ທ່ານໃຫ້ຮູ້ວ່າ: ໄລຍະຜ່ານມາ ທ່ານຕ້ອງຫຼຸດຜ່ອນທຸກໆການໃຊ້ຈາຍ ແຕ່ວ່າຍັງປະສົບກັບຄວາມຫຍຸ້ງຍາກ. ທ່ານເວົ້າວ່າ: “ໂດຍໄດ້ຮັບຄວາມສົນໃຈ, ລະດົມກຳລັງໃຈ, ມອບຂອງຂວັນຈາກອຳນາດການປົກຄອງທ້ອງຖິ່ນ, ຂ້າພະເຈົ້າດີໃຈຫຼາຍ. ນີ້ຈະແມ່ນກຳລັງໃຈເພື່ອໃຫ້ພວກຂ້າພະເຈົ້າຜ່ານຜ່າໄລຍະທີ່ປະສົບກັບຄວາມຫຍຸ້ງຍາກນີ້. ພວກຂ້າພະເຈົ້າຂໍຂອບໃຈນະຄອນຖູດຶກ, ຂໍຂອບໃຈນະຄອນໂຮ່ຈີມິນ ແລະ ຊາວຫວຽດນາມ”.
ທ່ານ Johnston Gareth Alexander (ສັນຊາດ ນິວຊີແລນ) ກໍ່ສະແດງຄວາມຂອບອົກຂອບໃຈຕໍ່ຊາວຫວຽດນາມ ເມື່ອຍາມໃດກໍ່ສະໜັບສະໜູນອູ້ມຊູຊ່ວຍເຫຼືອທ່ານ ກໍ່ຄືປະຊາຄົມຊາວຕ່າງປະເທດ ໃນໄລຍະທີ່ປະສົບກັບຄວາມຫຍຸ້ງຍາກ. “ຂ້າພະເຈົ້າໄດ້ຮັບສະບຽງອາຫານໂດຍທຸກຄົນສົ່ງມອບໃຫ້ເປັນປະຈຳ. ມີຜັກ ເຂົາເຈົ້າກໍ່ໃຫ້ຜັກ, ມີປາເຂົາເຈົ້າກໍ່ໃຫ້ປາ. ຫຼາຍເດືອນຜ່ານມາ ຂ້າພະເຈົ້າບໍ່ມີລາຍຮັບ ແຕ່ກໍ່ໄດ້ຮັບການໜູນຊ່ວຍຈາກທຸກໆຄົນ ດັ່ງນັ້ນ ການດຳລົງຊີວິດກໍ່ບໍ່ລຳບາກຫຼາຍປານໃດ. ຂ້າພະເຈົ້າຮັກທຸກຄົນ, ຂ້າພະເຈົ້າຮັກຫວຽດນາມ.”
ໂດຍໄດ້ຮູ້ວ່າ, ນະຄອນຖູດຶກ ໄດ້ມອບຂອງຂວັນ 25 ພູດ ໃຫ້ແກ່ຊາວຕ່າງປະເທດ 25 ຄົນ ທີ່ປະສົບກັບຄວາມຫຍຸ້ງຍາກຍ້ອນໂລກລະບາດໂຄວິດ - 19 ແຕ່ລະພູດມີມູນຄ່າ 500.000 ດົ່ງ ແລະ ເງິນສົດ 2 ລ້ານດົ່ງ.
ບຸນຄົງ
