 |
ສົ່ງເສີມການລົງທຶນຮ່ວມ ລະຫວ່າງ ພາກລັດ-ເອກະຊົນເພື່ອຂັບເຄື່ອນການລົງທຶນໃນລາວ
ກອງປະຊຸມດຳເນີນພາຍໃຕ້ການເປັນປະທານຮ່ວມ ຂອງ ທ່ານ ມະໂນທອງ ວົງໄຊ ຫົວໜ້າກົມສົ່ງເສີມການລົງທຶນ, ກະຊວງແຜນການ ແລະ ການລົງທຶນ, ທ່ານ ທີມມໍທີ ເອດເວີດ ອຸປະທູດ,ສະຖານທູດການນາດາປະຈຳລາວ ແລະ ທ່ານ ນາງ ອິດສະເບວ ແຊດເຕີຕັນ (Isabel Chatterton) ຫົວໜ້າໜ່ວຍງານໃຫ້ຄຳປຶກສາດ້ານວິຊາການ PPP ປະຈຳພາກພື້ນອາຊີ-ປາຊີຟິກຂອງ IFC ໂດຍການເຂົ້າຮ່ວມຂອງບັນດາຜູ້ຕາງໜ້າ ຈາກສະຖານທູດ, ອົງການຈັດຕັ້ງສາກົນ, ຄູ່ຮ່ວມພັດທະນາ ແລະ ກະຊວງທີ່ກ່ຽວຂ້ອງ.
ໂອກາດນີ້, ທ່ານ ມະໂນທອງ ວົງໄຊ ກ່າວວ່າ: ຈຸດປະສົງຂອງກອງປະຊຸມຄັ້ງນີ້, ແມ່ນເພື່ອສົ່ງເສີມການລົງທຶນໃນຂະແໜງການທີ່ສຳຄັນໃນ ສປປ ລາວ ແລະ ປຶກສາຫາລືແລກປ່ຽນດ້ານນະໂຍບາຍກ່ຽວກັບວຽກງານ PPP ລະຫວ່າງລັດຖະບານ, ຄູ່ຮ່ວມພັດທະນາ, ພາກເອກະຊົນ ແລະ ພາກສ່ວນອື່ນໆ. ພ້ອມກັນນັ້ນ, ກໍເພື່ອສ້າງຄວາມເຂົ້າໃຈ ແລະ ຮັບຟັງການສະເໜີບົດຮຽນທີ່ດີຂອງສາກົນໃນການຈັດຕັ້ງປະຕິບັດການລົງທຶນຮ່ວມລະຫວ່າງພາກລັດ ແລະ ພາກເອກະຊົນທີ່ຫລາຍປະເທດກໍໄດ້ຮັບຜົນສຳເລັດ.
ການສົ່ງເສີມຮູບແບບການລົງທຶນຮ່ວມ ລະຫວ່າງ ພາກລັດ ແລະ ເອກະຊົນ ໃນເງື່ອນໄຂທີ່ລັດຖະບານມີຂໍ້ຈຳກັດດ້ານທຶນຮອນຈະສາມາດຊ່ວຍຫລຸດຜ່ອນພາລະແບກຫາບດ້ານງົບປະມານຂອງພາກລັດໄດ້ຢ່າງຫລວງຫລາຍເຂົ້າໃນການກໍ່ສ້າງພື້ນຖານໂຄງລ່າງ ແລະ ການສະໜອງການບໍລິການຂອງພາກລັດ. ນອກຈາກນັ້ນ, ການລົງທຶນຮ່ວມລະຫວ່າງພາກລັດ ແລະ ເອກະຊົນ ຍັງສາມາດຍົກປະສິດທິພາບ, ປະສິດທິຜົນຂອງການລົງທຶນໃຫ້ສູງຂຶ້ນຢ່າງເດັ່ນຊັດ, ພ້ອມຫລຸດຜ່ອນຄວາມຮັບຜິດຊອບຕໍ່ຄວາມສ່ຽງຂອງພາກລັດໃນຕະຫລອດວົງຈອນໂຄງການຊຶ່ງຈະສາມາດປະກອບສ່ວນເຂົ້າໃນການພັດທະນາເສດຖະກິດສັງຄົມ ຕາມທິດທາງພັດທະນາແບບຍືນຍົງ ແລະ ເຕີບໂຕສີຂຽວ ຢ່າງເປັນຮູບປະທຳ.
ໃນກອງປະຊຸມຄັ້ງນີ້, ໄດ້ນໍາເອົາບັນດາຜູ້ຊ່ຽວຊານຈາກການາ, IFC, ຜູ້ຕາງໜ້າອາວຸໂສຂອງລັດຖະບານ, ຜູ້ດຳເນີນວຽກງານ PPP ແລະ ຜູ້ອອກນະໂຍບາຍ ເພື່ອແລກປ່ຽນຄວາມຮູ້ ກ່ຽວກັບວິທີການປະຕິບັດວຽກງານ PPPs ສາມາດເຮັດໃຫ້ວຽກງານນີ້ເປັນເຄື່ອງມືທີ່ມີປະສິດທິພາບໃນການລະ ດົມທຶນຮອນຈາກພາກສ່ວນເອກະຊົນ. ພວກເຂົາໄດ້ນຳສະເໜີການສຶກສາກໍລະນີ ຈາກເສດຖະກິດທີ່ກຳລັງພັດທະນາໃນລະດັບສູງກ່ຽວກັບການຈັດໂຄງສ້າງ ແລະ ການຈັດຕັ້ງປະຕິບັດລະບົບ PPP ໃນຂະແໜງການທີ່ກ່ຽວຂ້ອງ, ນັບແຕ່ຂະແໜງການຂົນສົ່ງ ແລະ ພື້ນຖານໂຄງລ່າງສາຍສົ່ງໄຟຟ້າ ໄປຮອດຂະແໜງການທ່ອງທ່ຽວ ແລະ ການບໍລິການສຸຂະພາບ. ສິ່ງດັ່ງກ່າວນີ້, ຈະສະໜອງຂໍ້ມູນເຂົ້າໃນຂັ້ນຕອນຕໍ່ໄປຂອງລັດຖະບານ ເຊິ່ງຈະໃຊ້ເປັນບ່ອນອີງໃນການສ້າງແບບແຜນກ່ຽວກັບ PPP ຂອງຕົນເອງ.
ທ່ານ ທີມມໍທີ ເອດເວີດ ກ່າວວ່າ: ຕະຫລອດໄລຍະ 30 ປີ ຜ່ານມາການາດາເປັນປະເທດຜູ້ບຸກເບີກໃນການນຳໃຊ້ຮູບແບບຄູ່ຮ່ວມງານ ລະຫວ່າງ ພາກລັດ-ເອກະຊົນ. ພວກເຮົາມີຄວາມພູມໃຈທີ່ຈະແລກປ່ຽນການຈັດຕັ້ງປະຕິບັດທີ່ດີທີ່ສຸດຂອງພວກເຮົາ ເພື່ອໃຫ້ຜູ້ເຂົ້າຮ່ວມຂອງ ສປປ ລາວ ສາມາດນຳໃຊ້ກົນໄກການເງິນທີ່ມີຄວາມຍືນຍົງນີ້ຕໍ່ກັບບັນດາໂຄງການໂຄ່ງລ່າງພື້ນຖານ ແລະ ໂຄງການພະລັງງານທີ່ສຳຄັນເຊິ່ງຈະສົ່ງເສີມການເຕີບໂຕເສດຖະກິດຂອງປະເທດ ໃຫ້ຍືນຍົງ.
（ແຫຼ່ງຂໍ້ມູນ： ຂປລ）
