 |
| ຜູ້ຕາງໜ້າຫວຽດນາມ 2 ທ່ານ (ພາບ: nhandan.vn) |
ຕາມຂໍ້ມູນຈາກສູນກາງຄະນະຊາວໜຸ່ມ ກອມມູນິດ ໂຮ່ຈີມິນ ໃນຕອນບ່າຍວັນທີ 16 ສິງຫາ ໃຫ້ຮູ້ວ່າ AYC ຫາກໍ່ປະກາດບັນຊີລາຍຊື່ 10 ການນຳໜຸ່ມດີເດັ່ນອາຊີ ໃນປີ 2021, ໃນນັ້ນມີ ຜູ້ຕາງໜ້າຫວຽດນາມ 2 ທ່ານ.
ຜູ້ທີໜຶ່ງແມ່ນອ້າຍ ຮ່ວາງຕວັນແອັງ ດ້ວຍຂໍ້ລິເລີ່ມສ້າງ ATM ເຂົ້າສານ ໂດຍບັນດາສຳນັກຂ່າວສານຄື CNN, Reuters ໄດ້ແນະນຳໄປຍັງທົ່ວໂລກ ຄືວິທີການທີ່ມີປະສິດທິຜົນໃນການໜູນຊ່ວຍບັນດາຜູ້ທີ່ປະສົບກັບຄວາມຫຍຸ້ງຍາກຈາກໂລກລະບາດໂຄວິດ - 19.
ເມື່ອຕົ້ນເດືອນ ສິງຫາ 2021, ອ້າຍ ຮ່ວາງຕວັນແອັງ ສືບຕໍ່ຍົກອອກຂໍ້ລິເລີ່ມສ້າງຕູ້ ATM ເຂົ້າສານ, ໄດ້ປະກອບສ່ວນເຂົ້າໃນການດູແລສຸຂະພາບໃຫ້ແກ່ບັນດາຜູ້ຕິດເຊື້ອພະຍາດໂຄວິດ - 19. ປີ 2020 ອ້າຍໄດ້ຮັບການເຊີດຊູເປັນ “ພົນລະເມືອງໜຸ່ມດີເດັ່ນນະຄອນໂຮ່ຈີມິນ”, “ແບບຢ່າງໜຸ່ມ ຫວຽດນາມ ດີເດັ່ນ”.
ຜູ້ທີ 2 ແມ່ນ ເຈິ່ນແອັງຕູ ໂດຍແມ່ນທ່ານໝໍພະແນກຄວບຄຸມພະຍາດຕິດແປດ, ສະຖາບັນອະນາໄມພະຍາດຕິດແປດສູນກາງ. ລາວໄດ້ເຂົ້າຮ່ວມຫຼາຍການເຄື່ອນໄຫວປ້ອງກັນ, ສະກັດກັ້ນໂລກລະບາດໂຄວິດ - 19 ຢູ່ທຸກແຖບຖິ່ນໃນທົ່ວປະເທດ. ລາວໄດ້ເສີມຂະຫຍາຍຄວາມຮູ້ກ່ຽວກັບເຕັກໂນໂລຢີຂໍ້ມູນຂ່າວສານ, ນຳອອກບັນດາຂໍ້ລິເລີ່ມ, ປັບປຸງທັກສະໃນການຍົກສູງປະສິດທິຜົນດ້ານວິຊາການ, ຢູ່ຂັ້ນຮາກຖານເພື່ອຍູ້ແຮງວຽກງານປ້ອງກັນ, ຕ້ານໂລກລະບາດໂຄວິດ - 19.
ທ່ານໝໍ ເຈິ່ນແອັງຕູ ຍັງແມ່ນສະມາຊິກຂອງບັນດາກຸ່ມຂຶ້ນກັບກະຊວງສາທາລະນະສຸກ ທີ່ມີໜ້າທີ່ສ້າງເອກະສານແນະນຳການຕິດຕາມອາການຄົນເຈັບ, ລ໋ອກດາວ, ແຍກປ່ຽວການແພດ, ຂັ້ນຕອນ, ແບບຟອມການປ້ອງກັນຕ້ານໂລກລະບາດໂຄວິດ - 19. ລາວເຄີຍໄດ້ຮັບໃບຍ້ອງຍໍ ຂອງລັດຖະມົນຕີກະຊວງວິທະຍາສາດ ແລະ ເຕັກໂນໂລຢີ, ດ້ວຍນາມມະຍົດແມ່ນ “ທ່ານໝໍໜຸ່ມ ຫວຽດນາມ ດີເດັ່ນ”, “ພະນັກງານ, ພາລະກອນ, ລັດຖະກອນໜຸ່ມເກັ່ງ”.
AYC ແມ່ນອົງການພາກພື້ນບໍ່ຂຶ້ນກັບລັດຖະບານ ກ່ຽວກັບຊາວໜຸ່ມ, ໄດ້ຮັບການສ້າງຕັ້ງແຕ່ວັນທີ 14 ສິງຫາ ປີ 1972 ດ້ວຍເປົ້າໝາຍຊຸກຍູ້ຄວາມສາມັກຄີ, ຮ່ວມມືລະຫວ່າງຊາວໜຸ່ມ ແລະ ບັນດາອົງການຊາວໜຸ່ມຢູ່ອາຊີ. “ການນຳໜຸ່ມດີເດັ່ນ ອາຊີ” ແມ່ນລາງວັນໂດຍ AYC ປຸກລະດົມ, ເພື່ອແນໃສ່ເຊີດຊູບັນດາຊາວໜຸ່ມດີເດັ່ນໃນພາກພື້ນ ທີ່ມີການປະກອບສ່ວນຢ່າງຕັ້ງໜ້າໃຫ້ແກ່ສັງຄົມ, ປະຊາຄົມ ແລະ ປະເທດຊາດ.
ບຸນຄົງ
