 |
| ພາບປະກອບ |
ຕອນເຊົ້າວັນທີ 15 ສິງຫາ, ນະຄອນ ໂຮ່ຈີມິນ ໄດ້ຈັດຕັ້ງພິທີ “ປຸກລະດົມກຳລັງແຮງທົ່ວປວງຊົນທັງຊາດປ້ອງກັນ, ຕ້ານໂລກລະບາດໂຄວິດ - 19 ແລະ ເປີດຕົວສູນຮັບ ແລະ ໜູນຊ່ວຍສິນຄ້າຈຳເປັນຮັບໃຊ້ປະຊາຊົນຜູ້ປະສົບກັບຄວາມຫຍຸ້ງຍາກຍ້ອນໂລກລະບາດໂຄວິດ - 19. ກ່າວຄຳເຫັນທີ່ພິທີ, ທ່ານຮອງເລຂາຜູ້ປະຈຳການຄະນະພັກນະຄອນ ໂຮ່ຈີມິນ ຟານວັນມາຍ ໃຫ້ຮູ້ວ່າ: ໃນໄລຍະເວລາ 80 ວັນທີ່ນະຄອນ ໂຮ່ຈີມິນ ກວດພົບການແຜ່ລະບາດໂລກລະບາດໃນຊຸມຊົນ, ທັງລະບົບການເມືອງ ແລະ ປະຊາຊົນນະຄອນ ໄດ້ຮ່ວມແຮງຮ່ວມໃຈ, ອົງອາດກ້າແກ່ນຕໍ່ສູ້. ໃນຕະຫຼອດໄລຍະປະຕິບັດການແຍກຫ່າງສັງຄົມ, ໂດຍສະເພາະແມ່ນໃນ 5 ອາທິດທີ່ເພີ່ມທະວີບັນດາມາດຕະການປ້ອງກັນຕາມຄຳສັ່ງເລກທີ 16 ຂອງນາຍົກລັດຖະມົນຕີ ແມ່ນຊຸມວັນທີ່ຫຍຸ້ງຍາກລຳບາກສຳລັບລະບົບການເມືອງ ແລະ ປະຊາຊົນນະຄອນ. ໃນໄລຍະຈະມາເຖິງ, ນະຄອນ ໂຮ່ຈີມິນ ຈະແກ່ຍາວການແຍກຫ່າງສັງຄົມຕື່ມອີກ 1 ເດືອນ ເພື່ອສຸມໃສ່ຄວບຄຸມແຫຼ່ງແຜ່ເຊື້ອ, ນຳນະຄອນກັບຄືນສູ່ສະພາບປົກກະຕິໃໝ່ເທື່ອລະກ້າວ.
ທ່ານຮອງນາຍົກລັດຖະມົນຕີຫວຽດນາມ ຫວູດຶດດາມ ຫາກໍ່ເຊັນປະກາດໃຊ້ໂທລະເລກທາງການຂອງນາຍົກລັດຖະມົນຕີກ່ຽວກັບການປ້ອງກັນ, ຕ້ານໂລກລະບາດໂຄວິດ-19. ໂທລະເລກຊີ້ແຈ້ງວ່າ: ຕໍ່ໜ້າສະພາບການຜັນແປຂອງໂລກລະບາດໂຄວິດ-19, ທ່ານນາຍົກລັດຖະມົນຕີຫວຽດນາມ ໄດ້ຮຽກຮ້ອງໃຫ້ຄະນະກຳມະການປະຊາຊົນບັນດາແຂວງ, ນະຄອນຂຶ້ນກັບສູນກາງທີ່ພວມປະຕິບັັດການແຍກຫ່າງສັງຄົມ ອີງໃສ່ສະພາບໂລກລະບາດໃນບໍລິເວນ, ຕ້ອງເປັນເຈົ້າການໃນການຕົກລົງເລື່ອງສືບຕໍ່ປະຕິບັດການແຍກຫ່າງສັງຄົມໃນບໍລິເວນທົ່ວແຂວງ, ນະຄອນ. ພ້ອມກັນນັ້ນ, ສືບຕໍ່ຍາດແຍ່ງເວລາ, ຮີບເຮັ່ງວິໄຈ, ຕາມຫາກໍລະນີ F0 ໃຫ້ໝົດ; ໂດຍສະເພາະແມ່ນບໍ່ປະໃຫ້ປະຊາຊົນຜູ້ໃດຖືກຂາດຂອງກິນ, ເຄື່ອນນຸ່ງ, ທີ່ຢູ່ອາໄສ, ບໍ່ໄດ້ຮັບການໜູນຊ່ວຍດ້ານສາທາລະນະສຸກ; ນະໂຍບາຍໜູນຊ່ວຍຢ່າງແທດຈິງດ້ວຍເງິນສົດ, ທັນຍາຫານ, ສະບຽງອາຫານ… ເພື່ອໃຫ້ປະຊາຊົນມີຄວາມອຸ່ນອຽນໃຈຢູ່ກັບທີ, ເຄົາລົບບັນດາຂໍ້ກຳນົດໃນການປ້ອງກັນ, ຕ້ານໂລກລະບາດ.
ນັບແຕ່ເວລາ 18 ໂມງ ຂອງວັນທີ 16 ສິງຫາ ຫາ ເວລາ 18 ໂມງຂອງວັນທີ 17 ສິງຫາ, ຫວຽດນາມ ໄດ້ຢັ້ງຢືນມີຜູ້ຕິດເຊື້ອພະຍາດໂຄວິດ - 19 ໃໝ່ຕື່ມອີກ 9.605 ຄົນ. ມາຮອດປັດຈຸບັນ, ຫວຽດນາມ ມີຜູ້ຕິດເຊື້ອພະຍາດໂຄວິດ - 19 ລວມທັງໝົດ 293.301 ຄົນ, ໃນນັ້ນ ມີຜູ້ໄດ້ຮັບການປິ່ນປົວຫາຍດີເປັນປົກກະຕິ ຂຶ້ນເຖິງ 111.308 ຄົນ.
ໄຊພອນ
