 |
| ການຂົນສົ່ງສິນຄ້າຈາກຫວຽດນາມຜ່ານຈີນໄປຍັງເອີຣົບ ແມ່ນໄວກວ່າການຂົນສົ່ງທາງທະເລ 7 ວັນ. ພາບປະກອບ |
ຖ້ຽວລົດໄຟໝາຍເລກ 42090 ທີ່ບັນທຸກສິນຄ້າຂອງຫວຽດນາມຫຼາຍກວ່າ 250 ໂຕນ ໄດ້ອອກຈາກສະຖານີລົດໄຟ ບັ່ງເຕື່ອງ (ກວາງຊີ - ຈີນ) ໄປຍັງເອີຣົບ. ນີ້ແມ່ນຖ້ຽວລົດໄຟຂົນສົ່ງສິນຄ້າທຳອິດດ້ວຍທາງລົດໄຟໄປຍັງເອີຣົບ ໂດຍຈີນ ແລະຫວຽດນາມ ຮ່ວມມືກັນຈັດຕັ້ງຜັນຂະຫຍາຍ.
ທ່ານ ເຕືອງຕິງ, ຫົວໜ້າສະຖານີລົດໄຟ ບັ່ງເຕື່ອງ ໃຫ້ຮູ້ວ່າ: ການຂົນສົ່ງຈາກຫວຽດນາມໄປເອີຣົບແມ່ນເລີ່ມຈາກສະຖານີລົດໄຟ ດົງແອງ (ຮ່າໂນ້ຍ - ຫວຽດນາມ) ໄປຫາສະຖານີລົດໄຟ ບັ່ງເຕື່ອງ (ເຊິ່ງຮັບຜິດຊອບໂດຍບໍລິສັດໃຫຍ່ລົດໄຟຫວຽດນາມ).
ຈາກສະຖານີລົດໄຟ ບັ່ງເຕື່ອງ ໄປ ເຈີ້ງໂຈວ ແລະຈາກນັ້ນໄປເຖິງປະເທດແບນຊິກດ້ວຍເສັ້ນທາງລົດໄຟ ຈີນ - ເອີຣົບ ເຊິ່ງຮັບຜິດຊອບໂດຍອົງການລົດໄຟຈີນ. ຄາດວ່າການເດີນທາງຈະໃຊ້ເວລາ 25 ມື້, ສັ້ນລົງປະມານ 7 ມື້ເມື່ອທຽບກັບການຂົນສົ່ງທາງທະເລ.
ນັບແຕ່ປີ 2017 ເປັນຕົ້ນມາ, ເມື່ອທາງລົດໄຟຈີນ-ຫວຽດນາມໄດ້ເປີດນຳໃຊ້, ການຂົນສົ່ງຕູ້ຄອນເທນເນີຂ້າມຊາຍແດນໄດ້ມີປະສິດທິຜົນຫຼາຍຂຶ້ນ. ໃນ 6 ເດືອນທໍາອິດຂອງປີ 2021 ມີລົດໄຟຂົນສົ່ງຕູ້ຄອນເທນເນີ ລະຫວ່າງຈີນ - ຫວຽດນາມ 145 ຖ້ຽວ, ເພີ່ມຂຶ້ນ 64,8% ທຽບໃສ່ໄລຍະດຽວກັນຂອງປີຜ່ານມາ, ອັນໄດ້ສ້າງພື້ນຖານອັນສຳຄັນໃຫ້ກັບການຂົນສົ່ງຕູ້ຄອນເທນເນີຈາກຫວຽດນາມໄປຍັງເອີຣົບ.
ຄາດວ່າໃນເດືອນສິງຫານີ້, ຈີນຈະສືບຕໍ່ຮ່ວມມືກັບຫວຽດນາມ ເພື່ອຜັນຂະຫຍາຍການຂົນສົ່ງທາງລົດໄຟສອງສາຍ ລະຫວ່າງຫວຽດນາມ - ຈີນ - ເອີຣົບ.
ໄຊພອນ
