 |
| ພາບປະກອບ |
ວັນທີ 25 ມິຖຸນາ, ຄະນະພະນັກງານຂອງສະຖານທູດ ຫວຽດນາມ ປະຈຳ ສາທາລະນະລັດເຊັກໂກ ແລະ ສະມາຄົມຊາວຫວຽດນາມ ອາໄສຢູ່ເຊັກໂກ ໄດ້ລົງຢຶ້ຢາມຖາມຂ່າວ, ລະດົມກຳລັງໃຈ, ພ້ອມທັງປຸກລະດົມການອຸປະຖຳຊ່ວຍເຫຼືອບັນດາຄອບຄົວຊາວຫວຽດນາມ ທີ່ຖືກຜົນກະທົບຈາກພາຍຸລູກໝູນ ແລະ ຝົນໝາກເຫັບໃຫຍ່ທີ່ສຸດໃນຮອບເວລາ 100 ປີທີ່ຜ່ານມາ ຢູ່ ໂມລາວາ (ປະເທດ ສາທາລະນະລັດ ເຊັກໂກ).
ພາຍໃນເວລາພຽງແຕ່ 1 ວັນ, ຊາວຫວຽດນາມ ອາໄສຢູ່ທົ່ວຜືນແຜ່ນດິນຂອງ ສາທາລະນະລັດ ເຊັກໂກ ລະດົມໄດ້ເງິນເປັນຈຳນວນກ່ວາ 200.000 Korun ພ້ອມກັບເຄື່ອງຂອງ, ສະບຽງອາຫານ ເພື່ອຊ່ວຍເຫຼືອໃຫ້ແກ່ພໍ່ແມ່ປະຊາຊົນທີ່ຖືກຜົນກະທົບຈາກໄພທຳມະຊາດ.
ທ່ານເຈິ່ນງອກຢຸງ - ຮອງປະທານສະມາຄົມຊາວຫວຽດນາມ ອາໄສຢູ່ Brno ແລະ ເຂດພາກໃຕ້ ໂມລາວາ ໄດ້ແບ່ງປັນວ່າ: ພາຍຫຼັງພາຍຸລູກໝູນ ແລະ ຝົກໝາກເຫັບຢຸດ, ຂ້າພະເຈົ້າໄດ້ຕາງໜ້າໃຫ້ສະມາຄົມຊາວຫວຽດນາມ ອາໄສຢູ່ Brno ແລະ ເຂດພາກໃຕ້ ໂມລາວາ ລົງໄປບັນດາໝູ່ບ້ານທີ່ໄດ້ຮັບຜົນເສຍຫາຍຢ່າງໜັກໜ່ວງທີ່ສຸດ ເພື່ອຢຶ້ຢາມຖາມຂ່າວ, ລະດົມກຳລັງໃຈບັນດາຄອບຄົວທີ່ພວມດຳລົງຊີວິດ, ທຳມາຫາກິນຢູ່ເຂດນີ້, ຫຼັງຈາກນັ້ນກໍ່ລາຍງານຕໍ່ການນຳ ສະມາຄົມ ເພື່ອຊອກຫາວິທີການແກ້ໄຂ ແລະ ຮຽກຮ້ອງໃຫ້ປະຊາຄົມໜູນຊ່ວຍແກ້ໄຂຜົນເສຍຫາຍຈາກເຫດການດັ່ງກ່າວ”.
ຕອນບ່າຍວັນທີ 24 ມິຖຸນາ (ຕາມເວລາທ້ອງຖິ່ນ), ພາຍຸລູກໝູນ, ຝົນໝາກເຫັບ ໄດ້ກໍ່ຜົນເສຍຫາຍທາງດ້ານຊີວິດອິນຊີ ແລະ ຊັບສິນຢ່າງໜັກໜ່ວງ. ຕາມກົມອຸຕຸນິຍົມ ເຊັກໂກແລ້ວ, ມີຫຼາຍກ່ວາ 120.000 ຄອບຄົວໃນພາກພື້ນບໍ່ມີໄຟຟ້າໃຊ້. ເສັ້ນທາງລົດໄຟຂົນສົ່ງໄປຍັງ ໂຊວາກີ ຫຼາຍຕອນຖືກເປ່ເພ.
ເຂດພາກໃຕ້ ໂມລາວາ ແມ່ນທ້ອງຖິ່ນທີ່ມີຄອບຄົວຊາວຫວຽດນາມ ດຳລົງຊີວິດຫຼາຍທີ່ສຸດ. ບັ້ນພາຍຸລູກໝູນ ແລະ ຝົກໝາກເຫັບທີ່ເກີດຂຶ້ນຢູ່ເຂດນີ້ ໄດ້ກໍ່ຜົນເສຍຫາຍຢ່າງໜັກໜ່ວງໃຫ້ແກ່ບັນດາຄອບຄົວຊາວຫວຽດນາມ. ມີເກືອບ 30 ຄອບຄົວຊາວຫວຽດນາມ ທີ່ດຳລົງຊີວິດຢູ່ບັນດາໝູ່ບ້ານຖືກພາຍຸລູກໝູນພັດຜ່ານ ຊຶ່ງຮັບຜົນເສຍຫາຍຢ່າງໜັກໜ່ວງ, ໃນນັ້ນມີ 6 ຄອບຄົວທີ່ຖືກຜົນເສຍຫາຍທາງດ້ານຊັບສິນຮ້າຍແຮງທີ່ສຸດ ແຕ່ໂຊກດີທີ່ບໍ່ມີຄົນເສຍຊີວິດ.
ຕາມອົງການທີ່ມີໜ້າທີ່ຮັບຜິດຊອບຂອງ ເຊັກໂກ ແລ້ວ, ໄລ່ຮອດຕອນຄ່ຳວັນທີ 25 ມິຖຸນາ, ພາຍຸລູກໝູນ ໄດ້ເຮັດໃຫ້ 5 ຄົນເສຍຊີວິດ, ນັບຮ້ອຍໆຖືກຮັບບາດເຈັບ ໃນນັ້ນມີ 10 ຄົນຖືກຮັບບາດເຈັບໜັກ. ຄວາມເສຍຫາຍທາງດ້ານພື້ນຖານໂຄງລ່າງ ແລະ ຊັບສິນຄາດວ່າຂຶ້ນເຖິງ ນັບຮ້ອຍລ້ານ USD.
ບຸນຄົງ
