| ພຸດທະສາສະໜາ - ຂົວຕໍ່ເຊື່ອມສາຍພົວພັນຫວຽດນາມ - ອິນເດຍ ຊອກຫາແຮງຊຸກຍູ້ໃໝ່ໃຫ້ການພົວພັນ ຫວຽດນາມ - ອິນເດຍ |
ວັນທີ 14/9 ຢູ່ New Delhi, ທ່ານ ເລຮວ່າຍຈຸງ, ລັດຖະມົນຕີການຕ່າງປະເທດຫວຽດນາມ ແລະ ທ່ານ Subrahmanyam Jaishankar, ລັດຖະມົນຕີການຕ່າງປະເທດອິນເດຍ ໄດ້ຮ່ວມເປັນປະທານກອງປະຊຸມ ຄັ້ງທີ 19 ຂອງຄະນະກຳມະການປະສົມ ຫວຽດນາມ - ອິນເດຍ ກ່ຽວກັບການຮ່ວມມືດ້ານເສດຖະກິດ, ການຄ້າ, ວິທະຍາສາດ ແລະ ເຕັກໂນໂລຊີ.
ສອງຝ່າຍໄດ້ຮັບຮູ້ບັນດາບາດກ້າວພັດທະນາຂອງສາຍພົວພັນສອງຝ່າຍ ນັບແຕ່ກອງປະຊຸມ ຄັ້ງທີ 18 ໃນເດືອນ 10/2023, ພ້ອມທັງເຫັນດີສືບຕໍ່ຫັນບັນດາຄຳໝັ້ນສັນຍາລະດັບສູງໃຫ້ເປັນຮູບປະທຳ, ແກ້ໄຂບັນດາຂໍ້ຕິດຂັດ ເພື່ອໃຫ້ບັນດາໂຄງການ ແລະ ໂຄງການຮ່ວມມື ໄດ້ຮັບການຜັນຂະຫຍາຍຢ່າງເປັນຮູບປະທຳຍິ່ງຂຶ້ນ.
ທ່ານ ເລຮວ່າຍຈຸງ ຢືນຢັນວ່າ ຫວຽດນາມໃຫ້ຄວາມສຳຄັນຕໍ່ສາຍພົວພັນມິດຕະພາບດັ້ງເດີມກັບອິນເດຍ, ພ້ອມທັງເນັ້ນໜັກວ່າ ການຍົກລະດັບສາຍພົວພັນຂຶ້ນເປັນຄູ່ຮ່ວມຍຸດທະສາດຮອບດ້ານທີ່ເພີ່ມທະວີ ໄດ້ເປີດອອກໄລຍະພັດທະນາໃໝ່ໃຫ້ແກ່ການຮ່ວມມືລະຫວ່າງສອງປະເທດ.
ທ່ານ Subrahmanyam Jaishankar ຢືນຢັນວ່າ ຫວຽດນາມແມ່ນໜຶ່ງໃນເສົາຄ້ຳສຳຄັນ ໃນນະໂຍບາຍ “ປະຕິບັດການມຸ່ງຕາເວັນອອກ” ແລະ ວິໄສທັດອິນເດຍ - ປາຊີຟິກ ຂອງອິນເດຍ, ພ້ອມທັງມີບົດບາດສຳຄັນໃນສາຍພົວພັນ ASEAN - ອິນເດຍ.
 |
| ກອງປະຊຸມ ຄັ້ງທີ 19 ຂອງຄະນະກຳມະການປະສົມ ຫວຽດນາມ - ອິນເດຍ ກ່ຽວກັບການຮ່ວມມືດ້ານເສດຖະກິດ, ການຄ້າ, ວິທະຍາສາດ ແລະ ເຕັກໂນໂລຊີ ຈັດຂຶ້ນຢູ່ New Delhi. |
ໃນການຮ່ວມມືດ້ານເສດຖະກິດ, ການຄ້າ ແລະ ການລົງທຶນ, ຫວຽດນາມ ແລະ ອິນເດຍ ເຫັນດີສົ່ງເສີມຄຸນລັກສະນະເກື້ອກູນກັນລະຫວ່າງສອງເສດຖະກິດໃຫ້ດີຍິ່ງຂຶ້ນ, ແກ້ໄຂບັນດາອຸປະສັກໃນການເຂົ້າເຖິງຕະຫຼາດ ແລະ ສ້າງຄວາມສະດວກໃຫ້ແກ່ວິສາຫະກິດ. ສອງຝ່າຍວາງເປົ້າໝາຍຍົກຍອດມູນຄ່າການຄ້າສອງຝ່າຍຂຶ້ນເປັນ 25 ຕື້ USD.
ຝ່າຍອິນເດຍ ສະເໜີໃຫ້ຫວຽດນາມສ້າງເງື່ອນໄຂໃຫ້ຜະລິດຕະພັນຢາ, ໝາກໄມ້, ຊີ້ນ ແລະ ສິນຄ້າບາງປະເພດອື່ນທີ່ມີແຫຼ່ງກຳເນີດຈາກອິນເດຍ ສາມາດເຂົ້າເຖິງຕະຫຼາດ. ສອງຝ່າຍເຫັນດີສືບຕໍ່ແລກປ່ຽນບັນດາບັນຫາດ້ານເຕັກນິກ ແລະ ຂັ້ນຕອນ ທີ່ກອງປະຊຸມອະນຸກຳມະການຮ່ວມມືການຄ້າສອງຝ່າຍ ທີ່ຄາດວ່າຈະຈັດຂຶ້ນໃນປີ 2026.
ທ່ານ ເລຮວ່າຍຈຸງ ຍິນດີຕ້ອນຮັບບັນດາວິສາຫະກິດອິນເດຍ ເຂົ້າມາລົງທຶນຢູ່ຫວຽດນາມ ໃນບັນດາຂົງເຂດໂຄງລ່າງ, ຢາ, ພະລັງງານ ແລະ ສ້າງຍຸດທະສາດພັດທະນາໄລຍະຍາວ ໃນຕະຫຼາດຫວຽດນາມ.
ສອງຝ່າຍຍັງເຫັນດີຊຸກຍູ້ການເຊື່ອມຕໍ່ໂຄງລ່າງ, logistics ແລະ ການບິນ; ເພີ່ມຄວາມຖີ່ຂອງຖ້ຽວບິນກົງ, ເຊື່ອມຕໍ່ທາງບົກ ແລະ ທາງລົດໄຟຈາກອິນເດຍມາຫວຽດນາມ, ພ້ອມກັນນັ້ນ ເຊື່ອມຕໍ່ບັນດາທ່າເຮືອຂອງສອງປະເທດກັບເສັ້ນທາງທະເລ ອາຊີ - ເອີຣົບ.
ອີກເນື້ອໃນໜຶ່ງທີ່ສອງຝ່າຍໃຫ້ຄວາມສົນໃຈ ແມ່ນການຮີບຮ້ອນຜັນຂະຫຍາຍການເຊື່ອມຕໍ່ການຊຳລະເງິນຂາຍຍ່ອຍສອງທິດທາງດ້ວຍລະຫັດ QR.
ໃນຂົງເຂດປ້ອງກັນຊາດ - ຄວາມໝັ້ນຄົງ, ສອງປະເທດເຫັນດີຮີບຮ້ອນຈັດກອງປະຊຸມຄັ້ງທຳອິດຂອງການສົນທະນາຍຸດທະສາດ ການຕ່າງປະເທດ - ປ້ອງກັນຊາດ (2+2), ພ້ອມທັງເພີ່ມທະວີການຝຶກອົບຮົມ, ຝຶກແອບ, ຖ່າຍທອດເຕັກໂນໂລຊີ ແລະ ຍົກສູງຄວາມສາມາດ.
ຫວຽດນາມ ແລະ ອິນເດຍ ຍັງເຫັນດີຊຸກຍູ້ການຮ່ວມມືປ້ອງກັນ, ຕ້ານອາດຊະຍາກຳຂ້າມຊາດ, ຄວາມໝັ້ນຄົງໄຊເບີ, ຮັກສາການສົນທະນາຄວາມໝັ້ນຄົງທາງທະເລ ແລະ ຂະຫຍາຍການຮ່ວມມືທາງທະເລ.
ກ່ຽວກັບວິທະຍາສາດ ແລະ ເຕັກໂນໂລຊີ, ສອງຝ່າຍເຫັນດີຮີບຮ້ອນຈັດບັນດາກອງປະຊຸມອະນຸກຳມະການຮ່ວມມືດ້ານວິທະຍາສາດ - ເຕັກໂນໂລຊີ ແລະ ເຕັກໂນໂລຊີດິຈິຕອນ.
ທ່ານ ເລຮວ່າຍຈຸງ ສະເໜີໃຫ້ສ້າງຍຸດທະສາດຮ່ວມມືດ້ານວິທະຍາສາດ - ເຕັກໂນໂລຊີໄລຍະຍາວ, ສຸມໃສ່ບັນດາເຕັກໂນໂລຊີຍຸດທະສາດ ແລະ ເຕັກໂນໂລຊີເກີດໃໝ່; ຜັນຂະຫຍາຍບັນດາໂຄງການຄົ້ນຄວ້າຮ່ວມ, ເພີ່ມທະວີການເຊື່ອມຕໍ່ລະຫວ່າງສະຖາບັນຄົ້ນຄວ້າ, ມະຫາວິທະຍາໄລ ແລະ ວິສາຫະກິດ ໃນລະບົບນິເວດນະວັດຕະກຳ.
ໃນຂົງເຂດວັດທະນະທຳ, ການສຶກສາ ແລະ ການທ່ອງທ່ຽວ, ສອງປະເທດເຫັນດີສົ່ງເສີມບັນດາສາຍພົວພັນທາງປະຫວັດສາດ, ວັດທະນະທຳ ແລະ ສາສະໜາ ເພື່ອເພີ່ມທະວີການແລກປ່ຽນປະຊາຊົນ ແລະ ຊຸກຍູ້ຈຳນວນນັກທ່ອງທ່ຽວສອງທິດທາງ.
ອິນເດຍ ສືບຕໍ່ຊ່ວຍເຫຼືອການອະນຸລັກ, ບູລະນະກຸ່ມຫໍຄອຍຈຳຂອງຊາວຈຳ ຢູ່ພາກກາງຫວຽດນາມ ແລະ ສະໜອງທຶນການສຶກສາໄລຍະສັ້ນ, ໄລຍະຍາວ ໃຫ້ແກ່ຫວຽດນາມ. ຝ່າຍຫວຽດນາມ ຊຸກຍູ້ນັກຮຽນ, ນັກສຶກສາໄປຮ່ຳຮຽນຢູ່ອິນເດຍ ແລະ ພ້ອມຮັບນັກສຶກສາອິນເດຍມາຮຽນພາສາຫວຽດນາມ.
ສອງຝ່າຍຍັງເຫັນດີກະກຽມບັນດາກິດຈະກຳທີ່ເປັນຮູບປະທຳ ມຸ່ງໄປສູ່ການລະນຶກ 55 ປີ ແຫ່ງການສ້າງຕັ້ງສາຍພົວພັນການທູດ ໃນປີ 2027, ໃນນັ້ນ ພິຈາລະນາກຳນົດເອົາປີ 2027 ເປັນປີມິດຕະພາບ ຫວຽດນາມ - ອິນເດຍ.
ກ່ຽວກັບບັນດາບັນຫາພາກພື້ນ ແລະ ສາກົນ, ລັດຖະມົນຕີທັງສອງ ຢືນຢັນສືບຕໍ່ປະສານສົມທົບ, ສະໜັບສະໜູນເຊິ່ງກັນແລະກັນ ຢູ່ສະຫະປະຊາຊາດ ແລະ ບັນດາເວທີຫຼາຍຝ່າຍ. ອິນເດຍ ຢືນຢັນສະໜັບສະໜູນບົດບາດໃຈກາງຂອງ ASEAN ແລະ ປາຖະໜາໃຫ້ຫວຽດນາມສືບຕໍ່ປະສານສົມທົບ ຊຸກຍູ້ໃຫ້ສຳເລັດໂດຍໄວ ການທົບທວນຄືນສັນຍາການຄ້າສິນຄ້າ ASEAN - ອິນເດຍ.
ສິ້ນສຸດກອງປະຊຸມ, ທ່ານ ເລຮວ່າຍຈຸງ ແລະ ທ່ານ Subrahmanyam Jaishankar ໄດ້ລົງນາມໃນບົດບັນທຶກກອງປະຊຸມ ຄັ້ງທີ 19 ຂອງຄະນະກຳມະການປະສົມ ຫວຽດນາມ - ອິນເດຍ ກ່ຽວກັບການຮ່ວມມືດ້ານເສດຖະກິດ, ການຄ້າ, ວິທະຍາສາດ ແລະ ເຕັກໂນໂລຊີ.
 ຊຸກຍູ້ການຮ່ວມມືທາງດ້ານການປ້ອງກັນຊາດ ຫວຽດນາມ - ອິນເດຍ ຍສໝ - ໂດຍຕອບສະໜອງຕາມຄຳເຊີນຂອງພົນເອກ ຟານວັນຢາງ (Phan Văn Giang), ກຳມະການກົມການເມືອງ, ຮອງນາຍົກລັດຖະມົນຕີ, ລັດຖະມົນຕີກະຊວງປ້ອງກັນປະເທດ, ຄະນະຜູ້ແທນຂັ້ນສູງຂອງ ອິນເດຍ ໂດຍແມ່ນທ່ານ Rajnath Singh, ລັດຖະມົນຕີກະຊວງປ້ອງກັນປະເທດ ອິນເດຍ ເປັນຫົວໜ້າຄະນະ ໄດ້ເດີນທາງມາຢ້ຽມຢາມ ຫວຽດນາມ ຢ່າງເປັນທາງການ ນັບຕັ້ງແຕ່ວन्ທີ 18-19 ພຶດສະພາ. |
 ຂະຫຍາຍການຮ່ວມມື ຫວຽດນາມ - ອິນເດຍ ຜ່ານການສົນທະນາທາງວິຊາການ ຍສໝ - ວັນທີ 5/8, ຢູ່ນະຄອນຫຼວງ ນິວເດລີ ຂອງ ອິນເດຍ, ສະພາວຽກງານໂລກແຫ່ງ ອິນເດຍ (ICWA) ແລະ ສະພາບັນດິດວິທະຍາສາດສັງຄົມ ຫວຽດນາມ (VASS) ໄດ້ຈັດການສົນທະນາ ICWA - VASS ຄັ້ງທີ 6, ແລກປ່ຽນບັນດາທິດທາງການຮ່ວມມືຍຸດທະສາດ ແລະ ສະເໜີຂໍ້ແນະນຳດ້ານນະໂຍບາຍ ເພື່ອຊຸກຍູ້ສາຍພົວພັນຄູ່ຮ່ວມຍຸດທະສາດຮອບດ້ານທີ່ເສີມຂະຫຍາຍ ຫວຽດນາມ - ອິນເດຍ. |
ມິງດຶກ
