ວັດທະນະທຳຫວຽດນາມເປັ່ງປະກາຍຢູ່ປາຣີ

ງານບຸນດັ່ງກ່າວຈັດຂຶ້ນຢູ່ສາລາວ່າການເຂດທີ 16 ຂອງນະຄອນປາຣີ, ໂດຍມີ 20 ສະມາຄົມຈາກຊຸມຊົນຫວຽດນາມ, ກຳປູເຈຍ, ລາວ ແລະ ຝຣັ່ງ ເຂົ້າຮ່ວມ. ບັນດາກິດຈະກຳສະແດງສິລະປະ ແລະ ແນະນຳວັດທະນະທຳ ໄດ້ສ້າງໂອກາດໃຫ້ບັນດາຊຸມຊົນທີ່ເຂົ້າຮ່ວມໄດ້ແລກປ່ຽນ ແລະ ຮຽນຮູ້ເອກະລັກຂອງກັນ ແລະ ກັນ.

ຕາມສຳນັກຂ່າວສານຫວຽດນາມ, ລາຍການຂອງສະມາຄົມຮວງຊັກຫວຽດນາມ - ເອີຣົບ ແລະ ຄະນະຮ້ອງປະສານສຽງເກວເຮືອງ ໄດ້ນຳສະເໜີບັນດາພາບລັກສະນະ ແລະ ທຳນອງດົນຕີອັນເປັນເອກະລັກຂອງຫວຽດນາມ, ຊ່ວຍໃຫ້ຜູ້ຊົມສາກົນສຳຜັດໄດ້ເຖິງຄວາມຮັກຕໍ່ບ້ານເກີດເມືອງນອນ ແລະ ປະເທດຊາດ ເຖິງແມ່ນວ່າຈະບໍ່ເຂົ້າໃຈພາສາຫວຽດນາມກໍຕາມ.

ຜູ້ສະແດງແນະນຳຊຸດແຕ່ງກາຍສຳລັບແມ່ຍິງສີແດງເຂັ້ມ ປະສົມປະສານກັບຜ້າໂພກຫົວແບບດັ້ງເດີມ ໃນລາຍການຂອງສະມາຄົມຮວງຊັກຫວຽດນາມ - ເອີຣົບ. (ຮູບພາບ: TTXVN)

ທ່ານ Alain , ປະທານສະມາຄົມຮວງຊັກຫວຽດນາມ - ເອີຣົບ, ໃຫ້ຮູ້ວ່າ ສະມາຄົມໄດ້ເລືອກສະແດງຊຸດອ໋າວຢ່າຍບູຮານຂອງລາຊະສຳນັກເຫວ້ ແລະ ຊຸດອ໋າວຫງູ້ເຖິນ (ເສື້ອຫ້າສ່ວນ). ໃນນັ້ນ, ສີຟ້າສື່ເຖິງບ້ານເກີດເມືອງນອນ, ເສລີພາບ ແລະ ສັນຕິພາບ; ສ່ວນສີແດງສະແດງເຖິງສາຍເລືອດອັນກ້າແກ່ນຂອງບັນດາວິລະຊົນແຫ່ງຊາດ. ຜ່ານເຄື່ອງນຸ່ງຖື, ສະມາຄົມປາຖະໜາທີ່ຈະເຜີຍແຜ່ບັນດາຄຸນຄ່າທາງວັດທະນະທຳ ແລະ ປະຫວັດສາດຂອງຫວຽດນາມ.

ຄຽງຄູ່ກັບການສະແດງເຄື່ອງນຸ່ງຖື, ຄະນະຮ້ອງປະສານສຽງເກວເຮືອງ ໄດ້ນຳສະເໜີບົດເພງ “ຊາວຮ່າໂນ້ຍ” ຂອງນັກປະພັນເພງ ຫງວຽນ ດິ່ງ ທິ ແລະ ບົດເພງ “ຫວຽດນາມ ບ້ານເກີດຂອງຂ້ອຍ” ຂອງນັກປະພັນເພງ ໂດ໊ ຍ້ວນ, ໂດຍມີສະມາຊິກຊາວຕ່າງປະເທດເຂົ້າຮ່ວມສະແດງນຳອີກ.

ທ່ານນາງ ຫງວຽນ ເງິນ ຮ່າ, ຜູ້ອຳນວຍການວົງຂັບຮ້ອງປະສານສຽງ ແລະ ຜູ້ຮັບຜິດຊອບຄະນະຮ້ອງປະສານສຽງເກວເຮືອງ, ໃຫ້ຮູ້ວ່າ ຄະນະມີສະມາຊິກຊາວຝຣັ່ງ ແລະ ໃນປີນີ້ຍັງໄດ້ຕ້ອນຮັບເພື່ອນຊາວໂມຣັອກໂກເພີ່ມອີກໜຶ່ງຄົນ. ໃນເວລາຝຶກຊ້ອມບົດເພງກ່ຽວກັບຮ່າໂນ້ຍ, ຄະນະໄດ້ແນະນຳເນື້ອໃນຂອງບົດເພງ ເພື່ອໃຫ້ບັນດາສະມາຊິກຊາວຕ່າງປະເທດເຂົ້າໃຈຄວາມໝາຍຂອງເນື້ອຮ້ອງໄດ້ດີຂຶ້ນ.

ຕາມທ່ານນາງ, ເຖິງແມ່ນວ່າຈະມີຄວາມແຕກຕ່າງດ້ານພາສາ, ແຕ່ບັນດາສະມາຊິກກໍຍັງສາມາດສຳຜັດໄດ້ເຖິງຄວາມຮູ້ສຶກຜ່ານດົນຕີ. ທ່ານນາງແບ່ງປັນວ່າ: “ຄວາມເຂົ້າໃຈ ແລະ ຮ່ວມຮູ້ສຶກກັນເຊັ່ນນັ້ນ ເຮັດໃຫ້ຕົວຂ້ອຍເອງກໍຮູ້ສຶກຊາບຊຶ້ງໃຈຢ່າງຍິ່ງ”.

ນອກຈາກການສະແດງສິລະປະແລ້ວ, ງານບຸນຍັງໄດ້ຈັດກິດຈະກຳດ້ານອາຫານ, ການແລກປ່ຽນຫົວຂໍ້ສະເພາະ ແລະ ການພົບປະລະຫວ່າງບັນດາສະມາຄົມ, ໂດຍສຸມໃສ່ການສຶກສາ, ການຊ່ວຍເຫຼືອຊຸມຊົນ ແລະ ການແລກປ່ຽນວັດທະນະທຳ. ບັນດາການສົນທະນາຍັງໄດ້ຊ່ວຍໃຫ້ຜູ້ເຂົ້າຮ່ວມເຂົ້າໃຈເພີ່ມເຕີມກ່ຽວກັບເຄື່ອງນຸ່ງຖື, ດົນຕີ ແລະ ວິຖີຊີວິດຂອງບັນດາຊຸມຊົນຢູ່ຝຣັ່ງ.

ທ່ານ ເຈືອງ ຮົ່ງ ຫາຍ, ປະທານສະມາຄົມຫວຽດນາມ - ລາວ - ກຳປູເຈຍ ປະຈຳຝຣັ່ງ, ຕີລາຄາວ່າ ເຫດການນີ້ໄດ້ປະກອບສ່ວນເຊື່ອມໂຍງບັນດາຊຸມຊົນ, ສົ່ງເສີມຈິດໃຈແຫ່ງຄວາມສາມັກຄີ ແລະ ການຊ່ວຍເຫຼືອເຊິ່ງກັນ ແລະ ກັນ. ທ່ານໄດ້ຮັບຮູ້ເຖິງການເຂົ້າຮ່ວມຢ່າງຕັ້ງໜ້າຂອງຢ່າງໜ້ອຍ 6 ສະມາຄົມຊາວຫວຽດນາມ ພ້ອມດ້ວຍບັນດາການປະກອບສ່ວນທີ່ເປັນຮູບປະທຳ ແລະ ມຸ່ງສູ່ປະເທດຊາດ.

ຜ່ານບັນດາກິດຈະກຳແລກປ່ຽນ, ຊຸມຊົນຊາວຫວຽດນາມຢູ່ຝຣັ່ງ ສືບຕໍ່ຮັກສາເອກະລັກທາງວັດທະນະທຳ, ຮັກສາຄວາມຜູກພັນກັບບ້ານເກີດເມືອງນອນ ແລະ ເສີມຂະຫຍາຍການເຊື່ອມໂຍງກັບເພື່ອນມິດສາກົນ.

​ຜະລິດ​ຕະພັນ​ວັດທະນະທຳ, ທ່ອງ​ທ່ຽວ ຫວຽດນາມ ສ້າງຄວາມ​ປະ​ທັບ​ໃຈ​ຢູ່​ງານຕະຫຼາດນັດ ປາຣີ. ຍສໝ - ວັນທີ 5 ພຶດສະພາ, ສູນວັດທະນະທໍາຫວຽດນາມ ປະຈໍາ ຝຣັ່ງ ໄດ້ສົມທົບກັບບັນດາວິສາຫະກິດ ເພື່ອປະຕິບັດລາຍການໂຄສະນາວັດທະນະທໍາ, ການທ່ອງທ່ຽວ ແລະ ບັນດາຜະລິດຕະພັນຫັດຖະກຳ​ສິລະປະ, ອາຫານຂອງ ຫວຽດນາມ.

ບັນດາໝູ່ເພື່ອນ ສະວິດ ແລະ ທຸງຊາດຫວຽດນາມ ຢູ່ເທິງຈອມວິຫານ Notre Dame Paris ຍສໝ - ປີ 1969, ​ເມື່ອ​ທົ່ວ​ໂລກ​ເອົາ​ໃຈ​ໃສ່​ເຖິງ​ກອງ​ປະຊຸມ​ ປາຣີ, ຊາຍ​ໜຸ່ມ​ຊາວ​ສະ​ວິດ 3 ຄົນ​ໄດ້​ແຂວນ​ທຸງ​ແນວ​ໂຮມ​ປົດ​ປ່ອຍ​ຊາດ​ ພາກໃຕ້ຫວຽດນາມ​ຢ່າງ​ງຽບໆ​ຢູ່​ເທິງ​ວິຫານ Notre Dame Paris. 50 ກວ່າ​ປີ​ຕໍ່​ມາ, ສອງ​ຄົນ​ຄື Olivier Parriaux ແລະ Bernard Bachelard - ໄດ້​ເດີນ​ທາງ​ຢູ່​ຫວຽດ​ນາມ​ເປັນ​ຄັ້ງ​ທຳ​ອິດ. ​ເຂົາ​ເຈົ້າ​ມາ​ບໍ່​ໄດ້​ຮັບ​ກຽດເທົ່ານັ້ນ, ຫາກຍັງ​ຢືນຢັນ​ວ່າ: ການ​ເດີນ​ທາງພ້ອມ​ກັບ​ຫວຽດນາມ​ບໍ່​ເຄີຍ​ຢຸດ​ຢັ້ງ.