ມູນຄ່າການຄ້າຂາອອກ-ຂາເຂົ້າລື່ນກາຍ 659 ຕື້ USD

ການນຳ ກົມພາສີ ຮຽກຮ້ອງໃຫ້ ທົ່ວຂະແໜງການ ຊຸກຍູ້ການປະຮູບ, ການຫັນເປັນດິຈິທັອນ, ສ້າງເງື່ອນໄຂອັນສະດວກ ໃຫ້ແກ່ການຄ້າ ແລະ ເພີ່ມທະວີການຕ້ານການລັກລອບຂົນສົ່ງສິນຄ້າເຖື່ອນ, ການໂກງກິນທາງດ້ານການຄ້າ

ພາສີສືບຕໍ່ຜັກດັນການປະຕິຮູບ ແລະ ສົ່ງເສີມການຫັນປ່ຽນດິຈິຕອນ

ຕາມກົມພາສີ, ໃນເດືອນ 7 ຜ່ານມາ, ທົ່ວຂະແໜງໄດ້ສືບຕໍ່ປະຕິບັດບັນດາໜ້າວຽກສຳຄັນ ແລະ ບັນລຸຜົນງານໃນທາງບວກຫຼາຍດ້ານ ໃນການປະຕິຮູບລະບຽບການບໍລິຫານ, ການຫັນປ່ຽນດິຈິຕອນ, ອຳນວຍຄວາມສະດວກດ້ານການຄ້າ ແລະ ຍົກສູງປະສິດທິຜົນການຄຸ້ມຄອງຂອງລັດ.

ປະຕິບັດຕາມມະຕິເລກທີ 66-NQ/TW ແລະ 68-NQ/TW, ກົມພາສີໄດ້ສືບຕໍ່ທົບທວນ, ຫຼຸດຜ່ອນ ແລະ ປັບງ່າຍຂັ້ນຕອນບໍລິຫານ ແລະ ເງື່ອນໄຂທາງທຸລະກິດ. ໃນເດືອນຜ່ານມາ ໄດ້ປະກາດໃຊ້ໃໝ່ 4 ຂັ້ນຕອນບໍລິຫານ, ປັບປຸງ 11 ຂັ້ນຕອນ, ຍົກເລີກ 1 ຂັ້ນຕອນ ແລະ ປະສານງານກັບກົມພາສີອາກອນ ເພື່ອສະເໜີກະຊວງການເງິນປະກາດອີກ 1 ມະຕິກ່ຽວກັບຂັ້ນຕອນບໍລິຫານ.

ການຫັນປ່ຽນດິຈິຕອນຍັງຄົງໄດ້ຮັບການຜັກດັນ ຜ່ານການປັບແກ້ໂຄງການກໍ່ສ້າງລະບົບເຕັກໂນໂລຊີສາລະສົນເທດ ເພື່ອຮັບໃຊ້ພາສີດິຈິຕອນ ຕາມມະຕິເລກທີ 57-NQ/TW. ລະບົບ VNACCS/VCIS ແລະ ລະບົບຍ່ອຍຕ່າງໆ ຖືກເດີນເຄື່ອນຢ່າງໝັ້ນຄົງຕະຫຼອດ 24/7 ເພື່ອຮັບປະກັນການຜ່ານພາສີຢ່າງລາບລື່ນ. ຂະແໜງການຍັງກະກຽມໂຄງສ້າງພື້ນຖານ ເພື່ອທົດລອງການຢືນຢັນຕົວຕົນຜູ້ແຈ້ງພາສີຜ່ານ VNeID ສຳລັບສິນຄ້າມູນຄ່ານ້ອຍ ແລະ ສ້າງຊຸດລະຫັດໃໝ່ໃຫ້ສອດຄ່ອງກັບໂຄງສ້າງອົງກອນ.

ນັບແຕ່ຕົ້ນປີຮອດວັນທີ 19 ກໍລະກົດ 2026, ກົມພາສີໄດ້ຮັບ 75,9 ລ້ານເອກະສານ, ໃນນັ້ນຫຼາຍກວ່າ 75,87 ລ້ານເອກະສານໄດ້ຮັບການດຳເນີນການອອນລາຍ.

ນອກຈາກການປະຕິຮູບຂັ້ນຕອນແລ້ວ, ຂະແໜງການຍັງສືບຕໍ່ປັບປຸງກົນໄກ ແລະ ນະໂຍບາຍການຄຸ້ມຄອງ, ເພີ່ມທະວີການຄວບຄຸມຖິ່ນກຳເນີດສິນຄ້າ ແລະ ປົກປ້ອງສິດທິຊັບສິນທາງປັນຍາ. ຫຼັງຈາກທົດລອງຮູບແບບການຜ່ານພາສີແບບສູນກາງເປັນເວລາ 2 ເດືອນ ຢູ່ສາຂາພາສີເຂດ III, ໄລຍະເວລາດຳເນີນການໄດ້ຫຼຸດລົງ, ປະຢັດຊັບພະຍາກອນໃຫ້ແກ່ອົງການພາສີ ແລະ ວິສາຫະກິດ, ສ້າງພື້ນຖານໃນການຂະຫຍາຍການທົດລອງ. ກົມພາສີຍັງໄດ້ສະເໜີກະຊວງການເງິນສ້າງໂຄງການລວມສູນການຄຸ້ມຄອງການກວດກາສະເພາະດ້ານສຳລັບສິນຄ້າຂາອອກ-ຂາເຂົ້າ.

ການຄ້າຂາອອກ-ຂາເຂົ້າເພີ່ມຂຶ້ນ ພ້ອມກັບການເຂັ້ມງວດການຄຸ້ມຄອງ ແລະ ຕ້ານການລັກລອບ

ໃນເດືອນ 7/2026, ມູນຄ່າການຄ້າຂາອອກ-ຂາເຂົ້າລວມບັນລຸ 109,75 ຕື້ USD, ເພີ່ມຂຶ້ນ 5,3% ທຽບກັບເດືອນກ່ອນ ແລະ ເພີ່ມຂຶ້ນ 33% ທຽບກັບໄລຍະດຽວກັນຂອງປີ 2025. ໃນນັ້ນ ການສົ່ງອອກບັນລຸ 53,08 ຕື້ USD ແລະ ການນຳເຂົ້າບັນລຸ 56,67 ຕື້ USD.

ສະສົມໃນ 7 ເດືອນຕົ້ນປີ, ມູນຄ່າການຄ້າຂາອອກ-ຂາເຂົ້າລວມບັນລຸ 659,58 ຕື້ USD, ເພີ່ມຂຶ້ນ 28,1%; ການສົ່ງອອກບັນລຸ 319,53 ຕື້ USD ແລະ ການນຳເຂົ້າບັນລຸ 340,05 ຕື້ USD. ເດືອນ 7 ຂາດດຸນການຄ້າ 3,59 ຕື້ USD, ສະສົມ 7 ເດືອນຂາດດຸນການຄ້າ 20,52 ຕື້ USD.

ລາຍຮັບງົບປະມານຈາກກິດຈະກຳຂາອອກ-ຂາເຂົ້າໃນເດືອນບັນລຸ 42.525 ຕື້ດົ່ງ; ສະສົມຮອດວັນທີ 30/7 ບັນລຸ 309.994 ຕື້ດົ່ງ, ເທົ່າກັບ 68,7% ຂອງແຜນປະມານ ແລະ ເພີ່ມຂຶ້ນ 18,7% ທຽບກັບປີກ່ອນ.

ໃນວຽກງານຕ້ານການລັກລອບ ແລະ ການສໍ້ໂກງທາງການຄ້າ, ຈຳນວນຄະດີໃນເດືອນຫຼຸດລົງທຽບກັບເດືອນກ່ອນ ແຕ່ຍັງສູງກວ່າໄລຍະດຽວກັນຂອງປີ 2025. ໂດຍສະເພາະ ພົບ 3 ຄະດີທີ່ມີສັນຍານຄະດີອາຍາກ່ຽວກັບການລັກລອບຄ້າຄຳຂ້າມຊາຍແດນ; ການຂົນສົ່ງສິນຄ້າປອມ ແລະ ສິນຄ້າລະເມີດສິດທິຊັບສິນທາງປັນຍາຍັງສັບສົນ ດ້ວຍ 24 ຄະດີ ເພີ່ມຂຶ້ນ 140%.

ໃນໄລຍະ 15/6-14/7/2026, ກຳລັງພາສີພົບ ແລະ ດຳເນີນຄະດີ 1.995 ກໍລະນີ, ມູນຄ່າສິນຄ້າປະມານ 2.054 ຕື້ດົ່ງ; ດຳເນີນຄະດີອາຍາ 2 ຄະດີ, ສົ່ງຕໍ່ເພື່ອດຳເນີນຄະດີ 17 ຄະດີ; ລາຍຮັບຈາກການປັບໃໝບັນລຸ 114,2 ຕື້ດົ່ງ.

ສະສົມໃນໄລຍະ 15/12/2025-14/7/2026, ທົ່ວຂະແໜງພົບ ແລະ ດຳເນີນຄະດີ 13.413 ກໍລະນີ, ມູນຄ່າເກືອບ 11.980 ຕື້ດົ່ງ; ດຳເນີນຄະດີອາຍາ 9 ຄະດີ, ສົ່ງຕໍ່ເພື່ອດຳເນີນຄະດີ 87 ຄະດີ; ລາຍຮັບຈາກການປັບໃໝບັນລຸ 725,3 ຕື້ດົ່ງ.

ໃນການປ້ອງກັນ ແລະ ຕ້ານຢາເສບຕິດ, ໃນໄລຍະ 15/6-14/7/2026, ກຳລັງພາສີພົບ 18 ຄະດີ, ຈັບກຸມ 19 ຄົນ ແລະ ຢຶດຂອງກາງຢາເສບຕິດ 85,72 ກິໂລກຣາມ. ສະສົມນັບແຕ່ກາງເດືອນ 12/2025 ຫາກາງເດືອນ 7/2026, ທົ່ວຂະແໜງພົບ 113 ຄະດີ ກັບ 252 ຜູ້ຕ້ອງຫາ ແລະ ຢຶດຂອງກາງຢາເສບຕິດ 763 ກິໂລກຣາມ.

ທ່ານ ຫງວຽນ ວັນ ເທາະ, ຫົວໜ້າກົມພາສີ ໄດ້ຮຽກຮ້ອງໃຫ້ທົ່ວຂະແໜງສືບຕໍ່ປັບປຸງສະຖາບັນ, ໂດຍເນັ້ນໜັກການປັບປຸງກົດໝາຍພາສີປີ 2014 ແລະ ບັນດາເອກະສານທີ່ກ່ຽວຂ້ອງກັບພາສີດິຈິຕອນ, ການຄ້າອອນລາຍຂ້າມແດນ, ການກວດກາສະເພາະດ້ານ ແລະ ດ່ານຊາຍແດນອັດສະລິຍະ.

ພ້ອມກັນນັ້ນ, ຕ້ອງເລັ່ງຫຼຸດຜ່ອນຂັ້ນຕອນບໍລິຫານ, ຜັກດັນການຫັນປ່ຽນດິຈິຕອນ, ສ້າງພາສີອັດສະລິຍະເທິງພື້ນຖານຂໍ້ມູນດິຈິຕອນ, ປັນຍາປະດິດ ແລະ ຂໍ້ມູນຂະໜາດໃຫຍ່; ຂະຫຍາຍຮູບແບບການຜ່ານພາສີແບບສູນກາງ, ປັບປຸງການບໍລິຫານຄວາມສ່ຽງ, ເພີ່ມທະວີການຕໍ່ສູ້ການລັກລອບ, ການສໍ້ໂກງທາງການຄ້າ ແລະ ຢາເສບຕິດ, ປະກອບສ່ວນສ້າງກົມພາສີຫວຽດນາມໃຫ້ທັນສະໄໝ, ໂປ່ງໃສ ແລະ ເປັນມືອາຊີບ.

ມູນຄ່າການສົ່ງອອກບັນລຸລື່ນກາຍ 3 ຕື້ໂດລາສະຫະລັດ, ນະຄອນ ເກິ່ນເທີ (Cần Thơ) ເລັ່ງຄວາມໄວເພື່ອມຸ່ງສູ່ຄາດໝາຍການເຕີບໂຕທາງດ້ານເສດຖະກິດໃນລະດັບ 2 ຕົວເລກ ຍສໝ - ມູນຄ່າການສົ່ງອອກບັນລຸລື່ນກາຍ 3 ຕື້ໂດລາສະຫະລັດ, ຂະແໜງການທ່ອງທ່ຽວຕ້ອນຮັບນັກທ່ອງທ່ຽວຫຼາຍກວ່າ 7,5 ລ້ານເທື່ອຄົນ, ເນື້ອທີ່ການຜະລິດເຂົ້າຄຸນນະພາບສູງໄດ້ຮັບການຂະຫຍາຍຕົວຫຼາຍກວ່າ 170.000 ເຮັກຕາ, ແລະ ອາຄານ-ເນື້ອທີ່ດິນຂອງລັດທີ່ເຫຼືອໃຊ້ຫຼາຍຮ້ອຍແຫ່ງໄດ້ຖືກນຳເຂົ້າມາຂຸດຄົ້ນ ແລະ ນຳໃຊ້ຢ່າງມີປະສິດທິຜົນ. ບັນດາໝາກຜົນໃນທາງບວກພາຍໃນໄລຍະເຄິ່ງຕົ້ນປີ 2026 ນີ້ ພວມສ້າງພື້ນຖານອັນໜັກແໜ້ນ ເພື່ອໃຫ້ນະຄອນ ເກິ່ນເທີ ເລັ່ງຄວາມໄວພາຍໃດການຫັນຄາດໝາຍການເຕີບໂຕທາງດ້ານເສດຖະກິດໃນລະດັບ 2 ຕົວເລກພາຍໃນປີນີ້ໃຫ້ປະກົດຜົນເປັນຈິງ.

ອົງການ Sunflower Mission (ອາເມລິກາ) ອຸປະຖຳໂຄງການກໍ່ສ້າງການສຶກສາ ມູນຄ່າ 4,9 ຕື້ດົ່ງ ຢູ່ແຂວງ ອານຢາງ ຍສໝ - ໃນຕອນເຊົ້າວັນທີ 8/6, ສະຫະພັນບັນດາອົງການຈັດຕັ້ງມິດທະພາບແຂວງ ອານຢາງ (An Giang), ອົງການ Sunflower Mission (ອາເມລິກາ) ຮ່ວມກັບ ຄະນະກຳມະການປະຊາຊົນຕາແສງ ອານຝູ (An Phú) ຈັດຕັ້ງພິທີສະຫຼອງ ແລະ ມອບ-ຮັບ ຫ້ອງຮຽນຈຳນວນ 6 ຫ້ອງ ຢູ່ທີ່ໂຮງຮຽນປະຖົມ “B” ວິງໂຮ້ຍດົງ.