“ຢືນຢັນຖານະ” ບົດບາດຂອງການຕ່າງປະເທດປະຊາຊົນ

ມະຕິກອງປະຊຸມໃຫຍ່ຄັ້ງທີ XIII ຂອງພັກ ໄດ້ກຳນົດຢ່າງຈະແຈ້ງວ່າ ການຕ່າງປະເທດຂອງຫວຽດນາມປະກອບມີ 3 ເສົາຄ້ຳຄື: ການຕ່າງປະເທດຂອງພັກ, ການທູດຂອງລັດ ແລະ ການຕ່າງປະເທດປະຊາຊົນ. ແນວທາງເຊື່ອມໂຍງສາກົນຂອງພັກ ກໍໄດ້ຮັບການຫັນເປັນລະອຽດໃນມະຕິເລກທີ 59-NQ/TW ລົງວັນທີ 24/01/2025 ຂອງກົມການເມືອງ ກ່ຽວກັບການເຊື່ອມໂຍງສາກົນໃນສະພາບການໃໝ່, ໃນນັ້ນ ກຳນົດວ່າ ການເຊື່ອມໂຍງສາກົນແມ່ນພາລະກິດຂອງປະຊາຊົນທັງປວງ ແລະ ຂອງທົ່ວລະບົບການເມືອງ.

ຈາກບັນດາທິດທາງດັ່ງກ່າວ, ການຕ່າງປະເທດປະຊາຊົນ ໄດ້ຮັບການກຳນົດໃຫ້ເປັນເຄື່ອງມື ແລະ ວິທີການທີ່ມີປະສິດທິຜົນ ເພື່ອປຸກລະດົມກຳລັງແຮງພາຍໃນປະເທດ, ພ້ອມທັງຍາດແຍ່ງບັນດາແຫຼ່ງກຳລັງສາກົນຢ່າງມີປະສິດທິຜົນ, ເປີດກວ້າງພື້ນທີ່ການຮ່ວມມື ແລະ ສ້າງແຮງຊຸກດັນໃຫ້ແກ່ການພັດທະນາປະເທດ.

ກ້າວເຂົ້າສູ່ຍຸກໃໝ່, ສະພາບການໂລກມີການຜັນແປຢ່າງສັບສົນ ດ້ວຍການແຂ່ງຂັນທາງຍຸດທະສາດລະຫວ່າງບັນດາປະເທດໃຫຍ່ທີ່ນັບມື້ນັບເພີ່ມຂຶ້ນ, ການປະທະກັນໃນບາງເຂດ ແລະ ບັນດາສິ່ງທ້າທາຍດ້ານຄວາມໝັ້ນຄົງນອກແບບ. ການຂະຫຍາຍຕົວຢ່າງແຂງແຮງຂອງບັນດາສະຖາບັນທີ່ບໍ່ແມ່ນລັດ, ບັນດາອົງການສັງຄົມ ແລະ ປະຊາຄົມອອນລາຍ ຮຽກຮ້ອງໃຫ້ຫວຽດນາມຕ້ອງມີຊ່ອງທາງການທູດທີ່ອ່ອນໂຍນ ແລະ ຄ່ອງຕົວ. ການຕ່າງປະເທດປະຊາຊົນ ກໍຄື ຊັ້ນ “ເກາະເຫຼັກ” ທີ່ປົກປ້ອງຄວາມໝັ້ນຄົງ ແລະ ກຽດສັກສີຂອງຊາດແຕ່ຫົວທີ, ແຕ່ໄກ ດ້ວຍ ກຳລັງແຮງທາງດ້ານຈິດໃຈ, ຊ່ວຍຕອບໂຕ້ ແລະ ລົບລ້າງບັນດາຖ້ອຍທຳນອງບິດເບືອນ, ພ້ອມທັງປັບປຸງຖານະທາງການເມືອງຂອງປະເທດ.

ໂດຍສະເພາະ, ຄວາມຈຳເປັນຂອງຊ່ອງທາງການທູດນີ້ ຍັງຢູ່ທີ່ຄວາມສາມາດໃນການເສີມສ້າງຄວາມໄວ້ວາງໃຈທາງຍຸດທະສາດ. ການທູດຂອງລັດ ສ້າງຂອບກົດໝາຍ, ສ່ວນການຕ່າງປະເທດປະຊາຊົນ ສ້າງຄວາມເຫັນອົກເຫັນໃຈ ແລະ ຄວາມເຂົ້າໃຈຢ່າງເລິກເຊິ່ງລະຫວ່າງປະຊາຊົນບັນດາປະເທດ. ຈາກການແລກປ່ຽນພຽງຢ່າງດຽວ ຫັນສູ່ການສ້າງສັນການພັດທະນາ, ການຕ່າງປະເທດປະຊາຊົນ ໄດ້ກາຍເປັນ “ຂົວເຊື່ອມ” ໂດຍກົງໃນການລະດົມອົງຄວາມຮູ້, ເຕັກໂນໂລຊີທັນສະໄໝ, ບັນດາແຫຼ່ງທຶນ, ການຫັນປ່ຽນສີຂຽວ, ການຫັນປ່ຽນດິຈິຕອນ ແລະ ກະແສການຊ່ວຍເຫຼືອຈາກບັນດາອົງການບໍ່ຂຶ້ນກັບລັດຖະບານຕ່າງປະເທດ ເພື່ອຮັບໃຊ້ໂດຍກົງໃຫ້ແກ່ເປົ້າໝາຍປະຊາຊົນຮັ່ງມີ, ປະເທດຊາດເຂັ້ມແຂງ.

ຄຳສັ່ງເລກທີ 38-CT/TW ລົງວັນທີ 19/9/2019 ຂອງຄະນະເລຂາທິການສູນກາງພັກ ໄດ້ກຳນົດວ່າ ສະຫະພັນບັນດາອົງການມິດຕະພາບຫວຽດນາມ “ແມ່ນອົງການການເມືອງ - ສັງຄົມ ທີ່ຮັບຜິດຊອບສະເພາະດ້ານການຕ່າງປະເທດປະຊາຊົນ ໃນຂົງເຂດສັນຕິພາບ, ສາມັກຄີ, ມິດຕະພາບ ແລະ ການຮ່ວມມືປະຊາຊົນ, ເປັນສະມາຊິກຂອງແນວໂຮມປິຕຸພູມຫວຽດນາມ; ມີບົດບາດເປັນ ແກນຫຼັກ ໃນກິດຈະກຳການຕ່າງປະເທດປະຊາຊົນ ແລະ ວຽກງານຂົນຂວາຍການຊ່ວຍເຫຼືອຈາກອົງການບໍຂຶ້ນກັບລັດຖະບານຕ່າງປະເທດ; ເປັນອົງການທີ່ປະຕິບັດວຽກງານການເມືອງຕ່າງປະເທດ ແລະ ເປັນພາກສ່ວນປະກອບຂອງກຳລັງຕ່າງປະເທດສະເພາະດ້ານຂອງປະເທດເຮົາ”.

ບົດບາດເປັນແກນຫຼັກ ບໍ່ໄດ້ໝາຍຄວາມວ່າ ສະຫະພັນບັນດາອົງການມິດຕະພາບຫວຽດນາມ ປະຕິບັດວຽກງານແທນບັນດາອົງການ, ທ້ອງຖິ່ນ, ຂະແໜງການ, ວົງການ ແລະ ຊັ້ນຄົນຕ່າງໆ. ບົດບາດດັ່ງກ່າວ ສະແດງອອກຢູ່ໜ້າທີ່ເຊື່ອມໂຍງບັນດາກຳລັງສັງຄົມ ເພື່ອປະຕິບັດແນວທາງການຕ່າງປະເທດຂອງພັກ, ນະໂຍບາຍຂອງລັດ ແລະ ໂຄງການດຳເນີນງານຂອງແນວໂຮມປິຕຸພູມຫວຽດນາມ; ພ້ອມທັງສົ່ງເສີມຈຸດແຂງສະເພາະຂອງແຕ່ລະພາກສ່ວນ ເພື່ອບັນລຸບັນດາເປົ້າໝາຍລວມ.

ມະຕິກອງປະຊຸມໃຫຍ່ຜູ້ແທນທົ່ວປະເທດ ແນວໂຮມປິຕຸພູມຫວຽດນາມ ຄັ້ງທີ XI, ອາຍຸການ 2026-2031 ກໍຢືນຢັນເຖິງໜ້າທີ່ຂອງສະຫະພັນບັນດາອົງການມິດຕະພາບຫວຽດນາມ ໃນການເພີ່ມທະວີການປະສານງານ, ສົ່ງເສີມຈຸດແຂງຂອງບັນດາອົງການສະມາຊິກ ໃນການເປີດກວ້າງສາຍພົວພັນສາກົນ. ເມື່ອວາງຢູ່ໃນລະບົບນີ້, ສະຫະພັນບັນດາອົງການມິດຕະພາບຫວຽດນາມ ມີບົດບາດເປັນຂົວເຊື່ອມທີ່ຂາດບໍ່ໄດ້ ລະຫວ່າງສູນກາງກັບທ້ອງຖິ່ນ, ລະຫວ່າງບັນດາກຳລັງພາຍໃນປະເທດກັບຄູ່ຮ່ວມສາກົນ; ເຊື່ອມໂຍງກິດຈະກຳສັນຕິພາບ, ມິດຕະພາບ ກັບການຮ່ວມມືເພື່ອການພັດທະນາ ແລະ ການຄົ້ນຄວ້າ, ສະເໜີແນະດ້ານຍຸດທະສາດ.