 |
ພາບປະກອບ
ກອງປະຊຸມເຜີຍແຜ່ບົດລາຍງານ ການຄາດຄະເນການພັດທະນາຂອງທະນາຄານພັດທະນາອາຊີ (ADB) ປະຈຳປີ 2019 ຈັດຂຶ້ນວັນທີ 3 ເມສາ 2019 ໂດຍມີທ່ານ ຢາຊຸຊິ ເນກິຊິ ຜູ້ຕາງໜ້າ ADB ປະຈຳລາວ ພ້ອມດ້ວຍນັກເສດຖະສາດຂອງທະນາຄານດັ່ງກ່າວໃຫ້ຮູ້ວ່າ: ບົດລາຍງານຂອງ ADB ປະຈຳປີ 2019 ໄດ້ຄາດຄະເນວ່າອັດຕາການຂະຫຍາຍຕົວຂອງລວມຍອດຜະລິດຕະພັນພາຍໃນ (GDP) ຂອງລາວ ຍັງຢູ່ທີ່ 6,5% ສຳລັບປີ 2019 ແລະ ປີ 2020 ການຂະຫຍາຍຕົວຂອງຂະແໜງກະສິກຳ ຄາດວ່າຈະສູງຂຶ້ນເລັກໜ້ອຍໃນອັດຕາ 8,1% ໃນປີ 2019 ເພີ່ມຂຶ້ນຈາກ 8% ໃນປີ 2018 ຍ້ອນການສືບຕໍ່ພັດທະນາພື້ນຖານໂຄງລ່າງ ພ້ອມທັງການຜະລິດກະແສໄຟຟ້າທີ່ເພີ່ມຂຶ້ນ ຂະແໜງກະສິກຳຄາດວ່າຈະຂະຫຍາຍຕົວໃນອັດຕາ 2,5% ສຳລັບປີ 2019 ແລະ 2020 ຂະແໜງບໍລິການຄາດວ່າຈະຂະຫຍາຍຕົວໃນອັດຕາ 6,7% ຍ້ອນຄວາມພະຍາຍາມຂອງພັກ-ລັດຖະບານ ເພື່ອດຶງດູດນັກທ່ອງທ່ຽວຈາກ ສປ ຈີນ ແລະ ບັນດາປະເທດອ້ອມຂ້າງ.
ການຂະຫຍາຍຕົວເສດຖະກິດລາວຍັງຄົງແຂງແຮງຍ້ອນມີການຟື້ນໂຕຂອງການຜະລິດກະສິກຳພ້ອມທັງການຂະຫຍາຍຕົວຢ່າງແຂງແຮງໃນການຜະລິດໄຟຟ້າ ການກໍ່ສ້າງ ແລະ ການບໍລິການຕ່າງໆ ທີ່ຕິດພັນກັບການທ່ອງທ່ຽວ ເພື່ອຮັກສາສະຖຽນລະພາບດ້ານເສດຖະກິດມະຫາພາກ ແລະ ບັນລຸການຈະເລີນເຕີບໂຕຢ່າງທົ່ວເຖິງ ແລະ ຍືນຍົງ ລັດຖະບານລາວ ຄວນສືບຕໍ່ຫຼຸດຜ່ອນລະດັບໜີ້ສິນພາກລັດ ປັບປຸງການຄຸ້ມຄອງການເງິນພາກລັດ ດ້ວຍການເພີ່ມການເກັບລາຍຮັບ ແລະ ການຄຸ້ມຄອງໜີ້ສິນໃຫ້ດີຂຶ້ນ ແລະ ການຂາດດຸນງົບປະມານໃນຊຸມປີຕໍ່ໜ້າ.
ສຳລັບອັດຕາເງິນເຟີ້ ຄາດວ່າຈະຢູ່ລະດັບ 2% ສຳລັບປີ 2019 ແລະ 2020 ຍ້ອນລາຄານ້ຳມັນໃນຕະຫຼາດໂລກ ຄາດວ່າຈະຫຼຸດຕ່ຳລົງກວ່າປີ 2018 ຂະນະທີ່ລາຄາອາຫານຄາດວ່າຈະບໍ່ມີການເໜັງຕີງ ເນື່ອງຈາກມີການຟື້ນໂຕຂອງຜົນຜະລິດກະສິກຳ ແລະ ການຂາດດຸນບັນຊີເດີນສະພັດ ຄາດວ່າຈະເພີ່ມຂຶ້ນໃນອັດຕາ 9,5% ຂອງ GDP ໃນປີ 2019 ແລະ 10% ໃນປີ 2020.
（ແຫຼ່ງຂໍ້ມູນ： ຂປລ）
