 |
ລັດຖະບານວາງ 8 ມາດຕະການກະຕຸ້ນເສດຖະກິດ ໄດ້ຮັບຜົນດີໃນຫລາຍດ້ານ.
ໃນກອງປະຊຸມສະໄໝສາມັນ ເທື່ອທີ 6 ຂອງສະພາແຫ່ງຊາດ ຊຸດທີ VIII ທ່ານ ບຸນປອນ ບຸດຕະນະວົງ ຮອງປະທານຄະນະປະຈຳສະພາແຫ່ງຊາດ ໄດ້ລາຍງານໃຫ້ຮູ້ວ່າ: ພາຍຫລັງລັດ ຖະບານ ໄດ້ອອກ 8 ມາດຕະການ ກະຕຸ້ນເສດຖະກິດ ເຫັນວ່າ ມີຫລາຍມາດຕະການ ທີ່ລັດຖະບານ ສາມາດ ປະຕິບັດໄດ້ມີຜົນສຳເລັດ ເປັນຕົ້ນ ມາດຕະການທີ 4 ກ່ຽວກັບການກວດກາຄືນຖານລາຍຮັບຕົ້ນຕໍ່ໃຫ້ຄົບຖ້ວນ ແລະ ນຳໃຊ້ລະບົບທັນສະໄໝ ເຂົ້າໃນການເກັບ ຄ່າທຳນຽມທາງ, ເຊິ່ງສາມາດຍົກລາຍຮັບໄດ້ 5-6 ເທົ່າຕົວ, ມາຮອດປັດຈຸບັນ ສາມາດເກັບລາຍຮັບໄດ້ ປະມານ 61,1 ຕື້ກີບ ທຽບໃສ່ປີຜ່ານມາ ເກັບໄດ້ພຽງ 10 ຕື້ກີບ, ເລັ່ງທວງເອົາພັນທະຈາກໂຄງການ ລົງທຶນຂະໜາດໃຫຍ່ ຈຳນວນ 297,5 ຕື້ກີບ.
ໃນຂະນະທີ່ມາດຕະການທີ 6 ກ່ຽວກັບການກວດກາຄືນ ມາດຕະຖານເຕັກນິກ ແລະ ມູນຄ່າບັນດາໂຄງການລົງທຶນຂອງລັດ ໃນປີ 2017 ແລະ 2018 ຈໍານວນ 30 ໂຄງການ ສາມາດເກັບກູ້ ແລະ ປະຢັດງົບປະມານ ຂອງລັດໄດ້ 3.561 ຕື້ກີບ ຫລື ເທົ່າກັບ 419 ລ້ານໂດລາສະຫະລັດ, ພ້ອມກັນນັ້ນ, ອົງການກວດສອບລັດຖະບານ ກໍໄດ້ກວດເຫັນໂຄງການ ທີ່ຄິດໄລ່ມູນຄ່າເກີນບໍລິມາດຕົວຈິງ, ໂຄງການທີ່ໄດ້ໂຈະການ ຈັດຕັ້ງປະຕິບັດ ແລະ ໂຄງການທີ່ນຳໃຊ້ເງິນແຮບໍ່ຖືກຕ້ອງ, ເຊິ່ງຕ້ອງໄດ້ຕັດອອກ ຈາກສາລະບານງົບປະມານ ເປັນເງິນທັງໝົດ 1.338,94 ຕື້ກີບ ຖ້າລວມທັງສອງຮ່ວງ ກໍຈະເຮັດໃຫ້ລັດຖະບານ ຫລຸດໜີ້ສິນໄດ້ເຖິງ 4.899,94 ຕື້ກີບ.
ແຕ່ເຖິງຢ່າງໃດກໍ່ຕາມ ຄະນະປະຈຳສະພາແຫ່ງຊາດ ສະເໜີໃຫ້ລັດຖະບານ ສືບຕໍ່ຊຸກຍູ້ພາກ ສ່ວນກ່ຽວຂ້ອງ ປະຕິບັດບັນດາມາດຕະການ ທີ່ຍັງບໍ່ສາມາດບັນລຸ ຕາມຄາດໝາຍ ເປັນຕົ້ນ ມາດຕະ ການທີ 1 ກ່ຽວກັບການຄຸ້ມຄອງມະຫາພາກ, ມາດຕະການທີ 2 ກ່ຽວກັບການປັບປຸງ ສະພາບແວດລ້ອມ ແລະ ການດຳເນີນທຸລະກິດ ແລະ ມາດຕະການທີ 5 ກ່ຽວກັບການສົ່ງເສີມວິສາຫະກິດຂະໜາດກາງ ແລະ ຂະໜາດນ້ອຍ. ທັງນີ້, ແນໃສ່ເຮັດໃຫ້ເສດຖະກິດຂອງ ສປປ ລາວ ໄດ້ຮັບການພັດທະນາ ແລະ ຂະຫຍາຍຕົວຢ່າງຕໍ່ເນື່ອງ.
（ແຫຼ່ງຂໍ້ມູນ： ຂປລ）
