ປຶກສາຫາລື ກ່ຽວກັບເນື້ອໃນຮ່າງທີ່ສອງ ຂອງນະໂຍບາຍແຫ່ງ ຊາດ ດ້ານປະຊາກອນ ແລະ ການພັດທະນາ

ກອງປະຊຸມປຶກສາຫາລື ກ່ຽວກັບຮ່າງນະໂຍບາຍແຫ່ງຊາດ ດ້ານປະຊາກອນ ແລະ ການພັດທະນາ 2019-2030.

ກອງປະຊຸມປຶກສາຫາລື ກ່ຽວກັບຮ່າງນະໂຍບາຍແຫ່ງຊາດ ດ້ານປະຊາກອນ ແລະ ການພັດທະນາ 2019-2030 ​ໄດ້ຈັດຂຶ້ນໃນວັນທີ 22 ສິງຫາ 2018 ທີ່ນະຄອນຫລວງວຽງຈັນ, ໂດຍການ ເປັນປະທານຂອງ ທ່ານ ນາງ ພອນວັນ ອຸທະວົງ ຫົວໜ້າກົມແຜນການ ກະຊວງແຜນການ ແລະ ການລົງທຶນ, ທ່ານ ນາງ ເຟຣດີຣິກາ ເມເຈີ (Frederika MEIJER) ຜູ້​ຕາງ​ໜ້າ​ອົງການ​ສະຫະ​ປະຊາ​ຊາດກອງ​ທຶນ​ສຳລັບ​ປະຊາກອນ ປະຈໍາ ສປປ ລາວ, ມີບັນດາຕາງໜ້າຈາກກະຊວງກ່ຽວຂ້ອງ ແລະ ຄູ່ຮ່ວມພັດທະນາເຂົ້າຮ່ວມຫລາຍກວ່າ 50 ທ່ານ.

ກອງປະຊຸມຄັ້ງນີ້, ໄດ້ຮັບການສະໜັບສະໜູນ ຈາກອົງການສະຫະປະຊາຊາດກອງທຶນສຳລັບປະຊາກອນ ປະຈຳ ສປປ ລາວ ເພື່ອ​ປຶກສາຫາລື ກ່ຽວກັບການປັບປຸງນະໂຍບາຍແຫ່ງຊາດ ດ້ານປະຊາ ກອນ ແລະ ການພັດທະນາ ສະບັບ ປີ 2006, ເຊິ່ງການຈັດຕັ້ງປະຕິບັດໃນໄລຍະ 10 ປີ ຜ່ານມາ ສາມາດສະຫລຸບຕີລາຄານະໂຍບາຍ ໄດ້ມີຜົນສຳເລັດຫລາຍດ້ານ ເປັນຕົ້ນ ອັດຕາເຂົ້າຮຽນ ສຸດທິ ຊັ້ນປະຖົມ ເພີ່ມຂຶ້ນຈາກ 94%ໃນສົກປີ 2010-2011 ມາເປັນ 98,7% ໃນສົກປີ 2016-2017; ການເຂົ້າເຖິງການບໍລິການ ສຸຂະພາບກໍ່ກວ້າງຂວາງຂຶ້ນ, ອັດຕາການຕາຍຂອງເດັກລຸ່ມ 5 ປີ ຫລຸດລົງ ຈາກ 98 ຄົນ ຕໍ່ເດັກເກີດມີຊີວິດ1.000 ຄົນ ໃນປີ 2005 ມາເປັນ 86 ຄົນຕໍ່ເດັກເກີດມີຊີວິດ 1.000 ຄົນ ໃນປີ 2015, ອັດຕາການຕາຍຂອງແມ່ຫລຸດລົງ ຈາກ 405 ຄົນຕໍ່ການເກີດມີຊີວິດ 100.000 ຄົນ ໃນປີ 2005 ມາເປັນ 206 ຄົນຕໍ່ການເກີດມີຊີວິດ 100.000 ຄົນ ໃນປີ 2015. ຄຽງຄູ່ກັບຜົນສໍາເລັດດັ່ງກ່າວ, ຍັງມີຂໍ້ຄົງຄ້າງຈໍານວນໜຶ່ງ ແລະ ມີບາງຄາດໝາຍທີ່ບໍ່ສາມາດວັດແທກຄວາມຄືບ ໜ້າໄດ້ຢ່າງ ຊັດເຈນ, ເຊິ່ງເຮັດໃຫ້ມີຄວາມຫຍຸ້ງຍາກໃນການຕິດຕາມ ແລະ ປະເມີນຜົນສໍາເລັດ.

ປັດຈຸບັນ ສະພາບຂອງການພັດທະນາເສດຖະກິດ -ສັງຄົມ ກໍ່ມີການປ່ຽນແປງຢ່າງຫລວງຫລາຍ ສະພາບປະຊາກອນກໍມີການປ່ຽນແປງ ຢ່າງເຫັນໄດ້ຊັດເຈນ. ອີງຕາມຜົນສໍາຫລວດພົນລະເມືອງ ຄັ້ງທີ IV ປີ 2015, ປະຊາກອນໃນເກນອາຍຸ 15-64 ປີ ກວມເອົາເຖິງ 63,7% ເພີ່ມຂຶ້ນຈາກ 56,7% ໃນປີ 2005, ເຊິ່ງສະແດງເຖິງກາລະໂອກາດ ຂອງປະຊາກອນຂອງ ສປປ ລາວ ທີ່ມີປະຊາກອນ ໃນໄວ ອອກແຮງງານຫລາຍ. ສະນັ້ນ, ນະໂຍບາຍແຫ່ງຊາດດ້ານປະຊາກອນ ແລະ ການພັດທະນາສະບັບປັບປຸງໃໝ່ (2019-2030) ປະກອບມີ 9 ເປົ້າໝາຍ ເພື່ອພັດທະນາ ປະຊາກອນຢ່າງມີຄຸນນະພາບ ເພື່ອໃຫ້ເຂົາ ເຈົ້າໄດ້ຮັບຜົນປະໂຫຍດສູງສຸດ ຈາກການພັດທະນາເສດຖະກິດ -ສັງຄົມຢ່າງທົ່ວເຖິງ ແລະ ສະເໝີພາບ ຄຽງຄູ່ກັບການແກ້ໄຂບັນຫາຕ່າງໆ ເປັນຕົ້ນບັນຫາສຸຂະພາບ, ຈະເລີນພັນ, ການພັດທະ ນາສີມືແຮງງານ, ການພັດທະນາຕົວເມືອງ, ການຂະຫຍາຍຕົວຂອງປະຊາກອນ, ການຕາຍຂອງແມ່ ແລະ ເດັກ, ການນໍາໃຊ້ກາລະໂອກາດ ຂອງການມີປະຊາກອນໜຸ່ມ, ການພັດທະນາໄວໜຸ່ມ ໂດຍສະ ເພາະ ໄວໜຸ່ມຍິງ. ນະໂຍ ບາຍສະບັບປັບປຸງດັ່ງກ່າວນີ້, ມີຄວາມສອດຄ່ອງກົມກຽວ ກັບການຈັດຕັ້ງປະຕິບັດການ ພັດທະນາແບບຍືນຍົງ (SDGs) ແລະ ບັນຫາອື່ນໆ.

ນອກຈາກນັ້ນ, ນະໂຍບາຍດັ່ງກ່າວ ຍັງແມ່ນການສືບຕໍ່ຈັດຕັ້ງປະຕິບັດຄໍາໜັ້ນສັນຍາຂອງ ສປປ ລາວ ຕໍ່ກັບ ການຈັດຕັ້ງປະຕິບັດແຜນດຳເນີນງານ ກອງປະຊຸມສາກົນກ່ຽວ ກັບປະຊາກອນ ແລະ ການພັດທະນາ (ICPD).

（ແຫຼ່ງ​ຂໍ້​ມູນ​： ຂ​ປ​ລ）