ພາສີຫວຽດນາມ - ລາວ ເພີ່ມທະວີການປະສານສົມທົບຕ້ານການລັກລອບຄ້າຂາຍເຖື່ອນ, ອຳນວຍຄວາມສະດວກດ້ານການຄ້າ

ໃນກອງປະຊຸມ, ການນຳອົງການພາສີຂອງສອງປະເທດໄດ້ແລກປ່ຽນກ່ຽວກັບສະພາບການເຄື່ອນໄຫວ, ບັນດາໜ້າທີ່ຈຸດສຸມໃນໄລຍະຕໍ່ໜ້າ ແລະ ຕີລາຄາຜົນການຜັນຂະຫຍາຍແຜນການຮ່ວມມືປີ 2026 ບົນຈິດໃຈແຫ່ງມິດຕະພາບ, ຄວາມໄວ້ວາງໃຈ ແລະ ຄວາມເຂົ້າໃຈເຊິ່ງກັນແລະກັນ.

ສອງຝ່າຍໄດ້ຮັບຮູ້ບັນດາຜົນສຳເລັດອັນຕັ້ງໜ້າໃນການຮ່ວມມືດ້ານວິຊາຊີບ, ລວມມີການແລກປ່ຽນປະສົບການກ່ຽວກັບວຽກງານຈັດຕັ້ງ ແລະ ວຽກງານພັກ; ການຈັດກອງປະຊຸມສອງຝ່າຍກ່ຽວກັບການຕ້ານການລັກລອບຄ້າຂາຍເຖື່ອນ; ການຝຶກອົບຮົມ ແລະ ຍົກສູງຄວາມສາມາດໃຫ້ແກ່ພະນັກງານພາສີລາວ ໃນດ້ານການຈັດປະເພດສິນຄ້າ, ການກຳນົດມູນຄ່າ ແລະ ຖິ່ນກຳເນີດສິນຄ້າ.

ຕາມແຜນການ, ກິດຈະກຳແລກປ່ຽນປະສົບການກ່ຽວກັບການກວດກາຫຼັງການຜ່ານດ່ານພາສີ ຈະຈັດຂຶ້ນແຕ່ວັນທີ 16-20/11/2026.

ໃນການຮ່ວມມືດ້ານການຊ່ວຍເຫຼືອທາງບໍລິຫານ, ພາສີຫວຽດນາມ ແລະ ພາສີລາວ ໄດ້ຕີລາຄາສູງຕໍ່ປະສິດທິຜົນຂອງການແລກປ່ຽນຂໍ້ມູນ ເພື່ອຮັບໃຊ້ການສືບສວນບັນດາຄະດີລັກລອບຄ້າຂາຍເຖື່ອນ ແລະ ການຈັດການການລະເມີດກົດໝາຍດ້ານພາສີ.

ສອງຝ່າຍເຫັນດີສືບຕໍ່ໃຫ້ບູລິມະສິດແກ່ການກວດສອບ ແລະ ສະໜອງຂໍ້ມູນຕາມຄຳຮ້ອງຂໍ, ໂດຍສະເພາະບັນດາຄະດີທີ່ກ່ຽວຂ້ອງກັບຢາເສບຕິດ ແລະ ສານຕັ້ງຕົ້ນ; ພ້ອມທັງເປັນຝ່າຍລິເລີ່ມແຈ້ງຂໍ້ມູນກ່ຽວກັບບັນດາກໍລະນີທີ່ມີສັນຍານລະເມີດກົດໝາຍ ເພື່ອຍົກສູງປະສິດທິຜົນການຄຸ້ມຄອງ ແລະ ຄວບຄຸມ.

ພາບລວມກອງປະຊຸມຫົວໜ້າກົມໃຫຍ່ພາສີຫວຽດນາມ - ລາວ ປີ 2026.

ເຫັນດີກັນກ່ຽວກັບ 4 ຈຸດສຸມການຮ່ວມມືໃນປີ 2027

ບົນພື້ນຖານຜົນການຮ່ວມມື ແລະ ຄວາມຮຽກຮ້ອງຕ້ອງການຕົວຈິງ, ການນຳພາສີຫວຽດນາມ ແລະ ລາວ ໄດ້ເຫັນດີກັນໃນການຜັນຂະຫຍາຍ 4 ກຸ່ມໜ້າທີ່ໃນປີ 2027.

ໜຶ່ງ, ຊຸກຍູ້ການແລກປ່ຽນຂໍ້ມູນ, ຍົກສູງປະສິດທິຜົນການປະສານສົມທົບຄວບຄຸມດ້ານພາສີ ແລະ ອຳນວຍຄວາມສະດວກໃຫ້ແກ່ກິດຈະກຳການຄ້າຂ້າມຊາຍແດນ. ສອງຝ່າຍຈະປັບປຸງບັນຊີລາຍຊື່ຜູ້ປະສານງານຢູ່ບັນດາຂະແໜງພາສີພາກພື້ນ ແລະ ຫົວໜ່ວຍພາສີປະຈຳດ່ານຊາຍແດນ ເພື່ອຮັບປະກັນການແລກປ່ຽນຂໍ້ມູນໃຫ້ທັນເວລາ ແລະ ມີປະສິດທິຜົນ.

ສອງ, ຈັດຕັ້ງປະຕິບັດບັນດາໂຄງການ ແລະ ກິດຈະກຳພາຍໃຕ້ແຜນການຮ່ວມມືປີ 2027 ທີ່ສອງຝ່າຍໄດ້ເຫັນດີກັນແລ້ວ ໃຫ້ຄົບຖ້ວນ ແລະ ມີປະສິດທິຜົນ.

ສາມ, ສືບຕໍ່ຜັນຂະຫຍາຍບົດບັນທຶກຄວາມເຂົ້າໃຈກ່ຽວກັບການແລກປ່ຽນຂໍ້ມູນສະຖິຕິ ແລະ ບົດບັນທຶກຄວາມເຂົ້າໃຈກ່ຽວກັບການແລກປ່ຽນຂໍ້ມູນເພື່ອຮັບໃຊ້ການສືບສວນຕ້ານການລັກລອບຄ້າຂາຍເຖື່ອນ, ຜ່ານນັ້ນຊ່ວຍເຫຼືອວຽກງານຄຸ້ມຄອງ, ຕິດຕາມກວດກາ ແລະ ຈັດການການລະເມີດ.

ສີ່, ເພີ່ມທະວີການຮ່ວມມື, ການປະສານສົມທົບດ້ານວິຊາຊີບ ແລະ ການແລກປ່ຽນລະຫວ່າງອົງການພາສີຂອງບັນດາແຂວງທີ່ມີຊາຍແດນຮ່ວມກັນ ບົນພື້ນຖານການເຫັນດີກັນກ່ຽວກັບກົນໄກການຮ່ວມມືລະດັບພາກພື້ນ.

ສາຍພົວພັນການຮ່ວມມືລະຫວ່າງພາສີຫວຽດນາມ ແລະ ພາສີລາວ ໄດ້ຮັບການສ້າງຕັ້ງ ແລະ ພັດທະນາຜ່ານການນຳຫຼາຍຮຸ່ນຄົນ ໂດຍອີງໃສ່ພື້ນຖານສາຍພົວພັນມິດຕະພາບມູນເຊື້ອອັນພິເສດລະຫວ່າງສອງປະເທດ.

ບັນດາກິດຈະກຳປະສານສົມທົບ ແລະ ຊ່ວຍເຫຼືອ ໄດ້ປະກອບສ່ວນຍົກສູງປະສິດທິຜົນການຄຸ້ມຄອງຂອງລັດດ້ານພາສີ, ເພີ່ມທະວີຄວາມເຂົ້າໃຈລະຫວ່າງສອງອົງການ, ພ້ອມທັງຊ່ວຍເຫຼືອການປະຕິບັດບັນດາຄຳໝັ້ນສັນຍາສາກົນທີ່ຫວຽດນາມ ແລະ ລາວ ເຂົ້າຮ່ວມ.

ປັດຈຸບັນ, ກົນໄກການຮ່ວມມືດ້ານພາສີສອງຝ່າຍ ໄດ້ຮັບການຮັກສາຕັ້ງແຕ່ຂັ້ນສູນກາງຈົນເຖິງທ້ອງຖິ່ນ ດ້ວຍບັນດາໂຄງການແລກປ່ຽນ ແລະ ປະສານສົມທົບຢ່າງສະໝ່ຳສະເໝີ.

ໃນນັ້ນ, ພາສີຫວຽດນາມຍັງຄົງໃຫ້ຄວາມສຳຄັນຕໍ່ການຊ່ວຍເຫຼືອພາສີລາວໃນການຍົກສູງຄວາມສາມາດດ້ານວິຊາການ ແລະ ວິຊາຊີບ. ສອງຝ່າຍຍັງຊຸກຍູ້ກິດຈະກຳສ້າງສາຍພົວພັນແຮກສ່ຽວລະຫວ່າງພາສີຮ່າໂນ້ຍ ແລະ ພາສີວຽງຈັນ, ພ້ອມທັງບັນດາໂຄງການຮ່ວມມືໃນລະດັບຂະແໜງພາສີ.

ໃນຕອນທ້າຍກອງປະຊຸມ, ການນຳພາສີສອງປະເທດໄດ້ລົງນາມໃນບົດບັນທຶກການເຮັດວຽກ, ສ້າງພື້ນຖານໃຫ້ແກ່ການຜັນຂະຫຍາຍບັນດາເນື້ອໃນການຮ່ວມມືໃນປີ 2027.

ສອງຝ່າຍເຫັນດີເພີ່ມທະວີການຊີ້ນຳ ແລະ ປະສານສົມທົບໃນການປະຕິບັດແຜນການຮ່ວມມື, ປະກອບສ່ວນຍົກສູງປະສິດທິຜົນການຄຸ້ມຄອງດ້ານພາສີ, ອຳນວຍຄວາມສະດວກໃຫ້ແກ່ກິດຈະກຳສົ່ງອອກ ແລະ ນຳເຂົ້າ ແລະ ຊຸກຍູ້ການເຕີບໂຕຂອງການຄ້າຫວຽດນາມ - ລາວ.

ຊຸດເສື້ອຍາວຫວຽດນາມ ເຊື່ອມສານສາຍສຳພັນມິດຕະພາບຫວຽດນາມ - ລາວ ຍສໝ - ຕອນຄ່ຳວັນທີ 20/10, ທີ່ນະຄອນຫຼວງວຽງຈັນ (ລາວ), ສະໂມສອນມໍລະດົກຊຸດເສື້ອຍາວຫວຽດນາມປະຈຳລາວ ໄດ້ຈັດລາຍການພົບປະລະນຶກຄົບຮອບ 96 ປີ ວັນສ້າງຕັ້ງສະຫະພັນແມ່ຍິງຫວຽດນາມ (20/10/1930 - 20/10/2026) ພາຍໃຕ້ຫົວຂໍ້ “ຊຸດເສື້ອຍາວ - ຂົວເຊື່ອມຕໍ່ວັດທະນະທຳຫວຽດນາມ - ລາວ”. ນີ້ຍັງເປັນກິດຈະກຳທຳອິດຂອງຊຸມຊົນຊາວຫວຽດນາມຢູ່ລາວ ເພື່ອຂານຮັບວັນບຸນມະຫາສາມັກຄີທົ່ວປວງຊົນທີ່ແນວໂຮມປິຕຸພູມຫວຽດນາມເປັນຜູ້ລິເລີ່ມ.

ຊາວໜຸ່ມຫວຽດນາມ - ລາວ ເພີ່ມທະວີການຮ່ວມມື, ສົ່ງເສີມມູນເຊື້ອຄວາມສາມັກຄີພິເສດ ຍສໝ - ຕອນບ່າຍວັນທີ 21/10, ທີ່ສຳນັກງານສູນກາງພັກ, ສະຫາຍ ເຈິ່ນ ເກິ໋ມ ຕູ໊, ກຳມະການກົມການເມືອງ, ຜູ້ປະຈຳການຄະນະເລຂາທິການ ໄດ້ຕ້ອນຮັບຄະນະຜູ້ແທນສູນກາງຊາວໜຸ່ມປະຊາຊົນປະຕິວັດລາວ, ໂດຍເນັ້ນໜັກບົດບາດຂອງຄົນຮຸ່ນໜຸ່ມໃນການຮັກສາສາຍພົວພັນພິເສດຫວຽດນາມ - ລາວ, ພ້ອມທັງຊຸກຍູ້ການຮ່ວມມືດ້ານການສຶກສາ, ການຝຶກອົບຮົມ, ວິທະຍາສາດ - ເຕັກໂນໂລຊີ ແລະ ການຫັນປ່ຽນເປັນດິຈິຕອນ.