ຊາວໜຸ່ມຫວຽດນາມ - ລາວ ຮ່ວມກັນສ້າງອາຊີບ, ຮັກສາຄວາມສະຫງົບ

ວັນທີ 23/8, ທີ່ກອງສຳມະນາ “ຮ່ວມເດີນທາງກັບຊາວໜຸ່ມໃນການສ້າງຕົນ, ສ້າງອາຊີບ”, ທ່ານ ຫງວຽນຢຸຍຮຶງ, ກຳມະການຄະນະບໍລິຫານງານສູນກາງຊາວໜຸ່ມ, ຫົວໜ້າຫ້ອງການສູນກາງສະຫະພັນຊາວໜຸ່ມຫວຽດນາມ ໃຫ້ຮູ້ວ່າ ການສະໜັບສະໜູນຊາວໜຸ່ມໃນການຮ່ຳຮຽນ, ອາຊີບ, ວຽກເຮັດງານທຳ, ການເລີ່ມຕົ້ນທຸລະກິດ ແລະ ພັດທະນາເສດຖະກິດ ແມ່ນຂົງເຂດທີ່ຊາວໜຸ່ມສອງປະເທດມີຫຼາຍບັນຫາຮ່ວມກັນ ເພື່ອແລກປ່ຽນບົດຮຽນ ແລະ ຊ່ວຍເຫຼືອເຊິ່ງກັນ ແລະ ກັນ.

ຕາມທ່ານ ຫງວຽນຢຸຍຮຶງ, ຄວາມຕ້ອງການຂອງຊາວໜຸ່ມໃນປັດຈຸບັນໄດ້ປ່ຽນແປງໄປ. ນອກຈາກການແນະນຳທິດທາງອາຊີບ ແລະ ແນະນຳວຽກເຮັດງານທຳແລ້ວ, ຄົນຮຸ່ນໜຸ່ມຍັງຕ້ອງໄດ້ຮັບການປະກອບຄວາມຮູ້, ທັກສະ, ເຕັກໂນໂລຊີ, ຄວາມສາມາດໃນການປັບຕົວເຂົ້າກັບຕະຫຼາດແຮງງານ; ເຂົ້າເຖິງຂໍ້ມູນຂ່າວສານ, ແຫຼ່ງທຶນ, ຊ່ຽວຊານ, ວິສາຫະກິດ, ຕະຫຼາດ ແລະ ບັນດາໂອກາດພັດທະນາ.

ດັ່ງນັ້ນ, ກິດຈະກຳສະໜັບສະໜູນຕ້ອງມຸ່ງໄປສູ່ຜົນໄດ້ຮັບທີ່ເປັນຮູບປະທຳ, ຊ່ວຍໃຫ້ຊາວໜຸ່ມຊອກຫາວຽກເຮັດທີ່ເໝາະສົມ, ຫັນແນວຄິດໃຫ້ກາຍເປັນຮູບແບບການຜະລິດ, ທຸລະກິດ ແລະ ເຊື່ອມຕໍ່ກັບຜູ້ແນະນຳ, ແຫຼ່ງທຶນ, ລູກຄ້າ ຫຼື ຕະຫຼາດຈຳໜ່າຍຜະລິດຕະພັນ.

ຊາວໜຸ່ມຫວຽດນາມ - ລາວ ແລກປ່ຽນບັນດາວິທີການໃໝ່ໃນການຫັນເປັນດິຈິຕອນ, ປົກປັກຮັກສາສິ່ງແວດລ້ອມ, ໂຄສະນາກົດໝາຍ ແລະ ຮັກສາຄວາມສະຫງົບ, ຄວາມເປັນລະບຽບຮຽບຮ້ອຍ ໃນການເດີນທາງ “ຂ້ອຍຮັກປະເທດຊາດຂອງຂ້ອຍ”.

ທ້າວ ໄພວັນ ຈັນທະສຸກ, ກຳມະການພັກແຂວງ, ເລຂາຊາວໜຸ່ມແຂວງຫຼວງພະບາງ ເຫັນວ່າ ກອງສຳມະນາແມ່ນໂອກາດໃຫ້ຊາວໜຸ່ມສອງປະເທດແບ່ງປັນ, ຮ່ຳຮຽນບົດຮຽນໃນການສ້າງຕົນ, ສ້າງອາຊີບ. ທ້າວ ໄພວັນ ຈັນທະສຸກ ປາດຖະໜາໃຫ້ສອງຝ່າຍເພີ່ມທະວີການແລກປ່ຽນບົດຮຽນໃນການນຳໃຊ້ອຸປະກອນ ແລະ ເຕັກໂນໂລຊີ AI ເຂົ້າໃນການພັດທະນາເສດຖະກິດ - ສັງຄົມ.

ຈາກພຶດຕິກຳຕົວຈິງ, ທ່ານ ຫງວຽນຟານຮຸຍຄອຍ, ຜູ້ອຳນວຍການສູນສະໜັບສະໜູນຊາວໜຸ່ມຫວຽດນາມເລີ່ມຕົ້ນທຸລະກິດ ເຫັນວ່າ ການສະໜັບສະໜູນການເລີ່ມຕົ້ນທຸລະກິດ ກ່ອນອື່ນໝົດຕ້ອງຊ່ວຍໃຫ້ຊາວໜຸ່ມມີຄວາມສາມາດສ້າງວຽກເຮັດ ແລະ ລາຍຮັບດ້ວຍຕົນເອງ.

ຕາມທ່ານ, ຕ້ອງຫັນຈາກແນວຄິດ “ສະໜັບສະໜູນໂຄງການເລີ່ມຕົ້ນທຸລະກິດໜຶ່ງ” ໄປສູ່ “ສະໜັບສະໜູນຄົນຜູ້ໜຶ່ງທີ່ມີຄວາມສາມາດເລີ່ມຕົ້ນທຸລະກິດ”. ເມື່ອຊາວໜຸ່ມໄດ້ຮັບການປະກອບຄວາມສາມາດຢ່າງພຽງພໍ, ເຖິງແມ່ນວ່າໂຄງການໜຶ່ງຍັງບໍ່ປະສົບຜົນສຳເລັດ, ພວກເຂົາກໍຍັງສາມາດເລີ່ມໂຄງການອື່ນໄດ້.

ດ້ວຍຊັບພະຍາກອນປ່າໄມ້, ຊີວະນາໆພັນ ແລະ ພູມປັນຍາທ້ອງຖິ່ນອັນອຸດົມສົມບູນຂອງລາວ, ທ່ານ ຫງວຽນຟານຮຸຍຄອຍ ສະເໜີໃຫ້ສະໜັບສະໜູນຊາວໜຸ່ມສ້າງບັນດາຮູບແບບເສດຖະກິດທີ່ທັງເພີ່ມມູນຄ່າ ແລະ ຫຼຸດຜ່ອນລະດັບການຂຸດຄົ້ນຊັບພະຍາກອນ. ເຕັກໂນໂລຊີດິຈິຕອນ ແລະ ການຄ້າເອເລັກໂຕຣນິກ ກໍຕ້ອງກາຍເປັນເຄື່ອງມືສ້າງອາຊີບຂອງຊາວໜຸ່ມ.

ທ່ານ ຫງວຽນຟານຮຸຍຄອຍ ປາດຖະໜາໃຫ້ຄັດເລືອກຜະລິດຕະພັນຫັດຖະກຳ, ກະສິກຳ ຫຼື ຜະລິດຕະພັນທີ່ເປັນເອກະລັກຈຳນວນໜຶ່ງຂອງຊາວໜຸ່ມລາວ ເພື່ອທົດລອງນຳເຂົ້າສູ່ຕະຫຼາດຫວຽດນາມ ຜ່ານຊ່ອງທາງການຄ້າເອເລັກໂຕຣນິກ ແລະ ເຄືອຂ່າຍຊາວໜຸ່ມເລີ່ມຕົ້ນທຸລະກິດຫວຽດນາມ.

ຮ່ວມແຮງຮ່ວມໃຈຮັກສາຄວາມສະຫງົບ, ຄວາມເປັນລະບຽບຮຽບຮ້ອຍ

ໃນວັນດຽວກັນ, ທີ່ກອງສຳມະນາ “ຊາວໜຸ່ມເຂົ້າຮ່ວມຮັກສາຄວາມສະຫງົບ, ຄວາມເປັນລະບຽບຮຽບຮ້ອຍ”, ຊາວໜຸ່ມສອງປະເທດໄດ້ແບ່ງປັນບັນດາຮູບແບບ, ບົດຮຽນໃນການຮັບປະກັນຄວາມສະຫງົບ ແລະ ຂົນຂວາຍປະຊາຊົນເຂົ້າຮ່ວມຮັກສາຄວາມເປັນລະບຽບຮຽບຮ້ອຍຢູ່ທ້ອງຖິ່ນ.

ພັນໂທ ບຸນໄລ ໄຊຍະວົງ, ເລຂາຊາວໜຸ່ມຕຳຫຼວດແຂວງຫຼວງພະບາງ ໃຫ້ຮູ້ວ່າ ໃນໄລຍະຜ່ານມາ ກຳລັງສະມາຊິກຊາວໜຸ່ມຕຳຫຼວດແຂວງໄດ້ອາສາສະໝັກແກ້ໄຂບັນດາບັນຫາສັງຄົມຢູ່ບັນດາເຂດຈຸດສຸມ, ພ້ອມທັງຂົນຂວາຍປະຊາຊົນ ແລະ ຊາວໜຸ່ມເຂົ້າຮ່ວມຮັກສາຄວາມສະຫງົບ, ຄວາມເປັນລະບຽບຮຽບຮ້ອຍ.

ພັນໂທ ບຸນໄລ ໄຊຍະວົງ ປາດຖະໜາໃຫ້ມີໂອກາດສົ່ງສະມາຊິກຊາວໜຸ່ມຕຳຫຼວດແຂວງໄປຫວຽດນາມ ເພື່ອບຳລຸງສ້າງວິຊາສະເພາະດ້ານວຽກງານຊາວໜຸ່ມ, ພ້ອມທັງສະເໜີໃຫ້ສູນກາງສະຫະພັນຊາວໜຸ່ມຫວຽດນາມ ສືບຕໍ່ເອົາໃຈໃສ່ສະໜັບສະໜູນຄອມພິວເຕີ ແລະ ວັດຖຸອຸປະກອນຈຳນວນໜຶ່ງ.

ທ່ານ ຫງວຽນເຈິ່ນຮວ່າງ, ເລຂາຊາວໜຸ່ມກົມຕຳຫຼວດປ້ອງກັນ ແລະ ຕ້ານອາຊະຍາກຳດ້ານສິ່ງແວດລ້ອມ, ກະຊວງຕຳຫຼວດ ໃຫ້ຮູ້ວ່າ ຊາວໜຸ່ມກຳລັງຕຳຫຼວດປະຊາຊົນຫວຽດນາມໄດ້ປ່ຽນແປງໃໝ່ເນື້ອໃນ ແລະ ຮູບແບບການເຄື່ອນໄຫວ ໃຫ້ຕິດພັນກັບໜ້າທີ່ຂອງແຕ່ລະກົມກອງ, ທ້ອງຖິ່ນ. ສະມາຊິກຊາວໜຸ່ມໄດ້ເຂົ້າຮ່ວມໂດຍກົງໃນການຕໍ່ສູ້, ສືບສວນບັນດາຄະດີສະເພາະ, ຄະດີຕ່າງໆ; ຮັບປະກັນຄວາມສະຫງົບໃຫ້ແກ່ບັນດາເຫດການ; ລາດຕະເວນ, ກວດກາ; ປ້ອງກັນ ແລະ ດັບເພີງ, ກູ້ໄພ, ກູ້ຊີບ ແລະ ຊ່ວຍເຫຼືອປະຊາຊົນແກ້ໄຂຜົນກະທົບຈາກໄພທຳມະຊາດ.

ໃນວຽກງານໂຄສະນາກົດໝາຍ, ທ່ານ ຫວູວັນຕຸ່ງ, ເລຂາຊາວໜຸ່ມກົມຕຳຫຼວດຄຸ້ມຄອງການກັກຕົວ, ຄຸມຂັງ ແລະ ປະຕິບັດໂທດອາຍາໃນຊຸມຊົນ, ກະຊວງຕຳຫຼວດ ສະເໜີໃຫ້ເພີ່ມທະວີການນຳໃຊ້ YouTube, TikTok, Facebook ແລະ ບັນດາແພລັດຟອມດິຈິຕອນ ດ້ວຍເນື້ອໃນສັ້ນກະທັດຮັດ, ເຫັນພາບໄດ້ງ່າຍ, ເຂົ້າໃຈງ່າຍ ແລະ ຕິດພັນກັບສະຖານະການຕົວຈິງ.

ຕາມທ່ານ, ວິດີໂອສັ້ນສາມາດຈຳລອງສະຖານະການສະເພາະ, ຕັ້ງຄຳຖາມໂຕ້ຕອບ ແລ້ວອະທິບາຍຂໍ້ກຳນົດກົດໝາຍຢ່າງຖືກຕ້ອງ, ຈື່ຈຳງ່າຍ. ສຳລັບ YouTube, ສາມາດສ້າງລາຍການສຳມະນາ, ຖາມ - ຕອບກົດໝາຍ, ສາລະຄະດີ, ເລື່ອງລາວຈາກຕົວຈິງ ຫຼື ຫົວຂໍ້ສະເພາະແບບລົງເລິກ.

ພັນເອກ ສົມບຸນ ທະນາວັນ, ຮອງຫົວໜ້າຕຳຫຼວດແຂວງຫຼວງພະບາງ ຕີລາຄາວ່າ ບັນດາບົດຮຽນທີ່ຊາວໜຸ່ມຕຳຫຼວດຫວຽດນາມແບ່ງປັນນັ້ນມີຄວາມໝາຍທີ່ແທດຈິງ ແລະ ປາດຖະໜາໃຫ້ສອງຝ່າຍສືບຕໍ່ຈັດບັນດາໂຄງການແລກປ່ຽນ. ຕາມທ່ານ, ໜຶ່ງໃນບັນດາສິ່ງທ້າທາຍໃຫຍ່ສຳລັບຊາວໜຸ່ມຕຳຫຼວດແຂວງຫຼວງພະບາງໃນປັດຈຸບັນ ແມ່ນຄວາມຮູ້ດ້ານເຕັກໂນໂລຊີຊັ້ນສູງ. ດັ່ງນັ້ນ, ຝ່າຍລາວປາດຖະໜາສືບຕໍ່ໄດ້ຮັບການແບ່ງປັນ ແລະ ສະໜັບສະໜູນຈາກຊາວໜຸ່ມຕຳຫຼວດຫວຽດນາມໃນຂົງເຂດນີ້.

ຂີດໝາຍຂອງປະທານ ໄຊສົມພອນ ພົມວິຫານ ໃນສາຍພົວພັນ ຫວຽດນາມ - ລາວ ຍສໝ - ບັນດາຜົນງານ ແລະ ການອຸທິດຂອງສະຫາຍ ໄຊສົມພອນ ພົມວິຫານ ໄດ້ປະໄວ້ຮ່ອງຮອຍອັນເລິກເຊິ່ງ, ປະກອບສ່ວນສ້າງພື້ນຖານອັນໜັກແໜ້ນ ເພື່ອໃຫ້ສາຍພົວພັນລະຫວ່າງສະພາແຫ່ງຊາດ ຫວຽດນາມ - ລາວ ສືບຕໍ່ໄດ້ຮັບການສືບທອດ ແລະ ພັດທະນາໃຫ້ນັບມື້ນັບມີເນື້ອໃນຕົວຈິງ, ມີປະສິດທິຜົນ ແລະ ຍືນຍົງ.

ສະມາຄົມມິດຕະພາບຫວຽດນາມ - ລາວ ຮ່ວມໄວ້ອາໄລ ສະຫາຍ ໄຊສົມພອນ ພົມວິຫານ ຍສໝ - ວັນທີ 10/8, ທີ່ ຮ່າໂນ້ຍ, ຄະນະຜູ້ແທນສະມາຄົມມິດຕະພາບຫວຽດນາມ - ລາວ ນຳໂດຍ ທ່ານ ຫງວຽນດັກວິງ, ກຳມະການສູນກາງພັກ, ກຳມະການຄະນະປະຈຳສະພາແຫ່ງຊາດ, ປະທານຄະນະວັດທະນະທຳ ແລະ ສັງຄົມຂອງສະພາແຫ່ງຊາດ, ປະທານສະມາຄົມມິດຕະພາບຫວຽດນາມ - ລາວ ໄດ້ໄປຍັງສະຖານທູດແຫ່ງ ສປປ ລາວ ປະຈຳຫວຽດນາມ ເພື່ອຂຽນປຶ້ມໄວ້ອາໄລ ລະນຶກເຖິງ ສະຫາຍ ໄຊສົມພອນ ພົມວິຫານ, ປະທານສະພາແຫ່ງຊາດລາວ.