 |
ທ່ານ ອາລຸນແກ້ວ ກິດຕິຄະນ ລັດຖະມົນຕີ ປະຈຳສຳນັກງານ ນາຍົກລັດຖະມົນຕີ ກຽດເຜີຍແຜ່ເອກະສານສະພາບຊາຍແດນ ລາວ-ກຳປູເຈຍ
ທີ່ສຳນັກງານ ນາຍົກລັດຖະມົນຕີ ໄດ້ຈັດພິທີເຜີຍແຜ່, ເຊື່ອມຊຶມ ເອກະສານສະພາບຊາຍແດນ ລາວ-ກຳປູເຈຍ ໃນປັດຈຸບັນ ເພື່ອເຮັດໃຫ້ສະມາຊິກພັກ, ພະນັກງານໄດ້ມີຄວາມຮັບຮູ້ເຂົ້າໃຈ ຢ່າງຖືກຕ້ອງ, ກວ້າງຂວາງ ແລະ ເລິກເຊິ່ງ. ໃຫ້ກຽດເຜີຍແຜ່ໂດຍ ທ່ານ ອາລຸນແກ້ວ ກິດຕິຄະນ ລັດຖະມົນຕີ ປະຈຳສຳນັກງານ ນາຍົກລັດຖະມົນຕີ, ມີຮອງລັດຖະມົນຕີ ຫົວໜ້າກົມ, ຮອງກົມ ພ້ອມດ້ວຍພະນັກງານລັດຖະກອນ ເຂົ້າຮ່ວມຢ່າງພ້ອມພຽງ.
ທ່ານ ອາລຸນແລ້ວ ກິດຕິຄຸນ ໄດ້ຫວນຄືນກ່ຽວກັບ ສະພາບການຂອງໂລກ ໂດຍສັງເຂບ, ການພົວພັນລະຫວ່າງລາວ ກັບ ກຳປູເຈຍ ໂດຍສັງເຂບ, ສະພາບຊາຍແດນ ແລະ ການປັກຫລັກ ໝາຍຊາຍແດນ, ລວມທັງເຫດການທີ່ເກີດຂຶ້ນ, ທິດຊີ້ນຳ ແລະ ທິດທາງ ໃນການແກ້ໄຂ ບັນຫາເກີດຂຶ້ນ ເຊິ່ງການເຜີຍແຜ່ຄັ້ງນີ້ ແມ່ນແນໃສ່ເພື່ອສ້າງຄວາມຮັບຮູ້ ຢ່າງເລິກເຊິ່ງ ແລະ ຖືກຕ້ອງ ກ່ຽວກັບສະພາບຂອງລາວ ແລະ ກຳປູເຈຍ ໂດຍສະເພາະ ແມ່ນວຽກງານຊາຍແດນລາວ -ກຳປູເຈຍ. ພ້ອມນີ້ ຍັງເປັນການປຸກລະດົມ ສະຕິໃນການຮັກຊາດ, ຮັກບ້ານເກີດເມືອງນອນ ສ້າງຄວາມສາມັກຄີພາຍໃນ ເພື່ອປົກປັກຮັກສາ ເຂດນຳແດນດິນ ໃນປະເທດເຮົາ.
ໃນໂອກາດດຽວກັນນີ້ ທ່ານ ຖາວອນ ຈັນທະລາ ຮອງຫົວໜ້າ ກົມຈັດຕັ້ງ ແລະ ພະນັກງານ ສຳນັກງານນາຍົກລັດຖະມົນຕີ ໄດ້ຂຶ້ນຜ່ານດຳລັດ ຂອງນາຍົກລັດຖະມົນຕີ ວ່າດ້ວຍ ການແຕ່ງຕັ້ງ ຫົວໜ້າກົມບໍລິຫານ-ພິທີການ ແລະ ການເງິນ ຫ້ອງວ່າການ ສຳນັກງານນາຍົກລັດຖະມົນຕີ, ການແຕ່ງຕັ້ງສັບຊ້ອນ ພະນັກງານຮັບໜ້າທີ່ໃໝ່ ແລະ ການອະນຸມັດໃຫ້ພະນັກງານ ອອກພັກການ ແລະ ຮັບອຸດ ໜູນບຳນານ.
（ແຫຼ່ງຂໍ້ມູນ： ຂປລ）
