 |
ບັນຍາການຕອນຄຳຄືນຢູ່ແຂວງຫຼວງພະບາງ.
ກອງປະຊຸມວຽກງານຖະແຫລງຂ່າວ, ວັດທະນະທໍາ ແລະ ທ່ອງທ່ຽວ ທົ່ວແຂວງຫລວງພະບາງ ປະຈໍາປີ 2018-2019 ໄດ້ປິດລົງດ້ວຍຜົນສໍາເລັດອັນຈົບງາມ ໃນຕອນແລງຂອງວັນທີ 8 ກຸມພາ 2019, ພາຍຫລັງດໍາເນີນມາເປັນເວລາ 02 ວັນ, ໂດຍໄດ້ສຸມໃສ່ການສະຫລຸບຄືນ ການປະຕິບັດໜ້າທີ່ວຽກງານຖະແຫລງຂ່າວ, ວັດທະນະທໍາ ແລະ ທ່ອງທ່ຽວ 01 ປີຜ່ານມາ, ພ້ອມວາງທິດທາງ ແຜນການໃນປີຕໍ່ໜ້າ, ໂດຍມີການປະກອບຄໍາເຫັນ ຈາກຫລາຍພາກສ່ວນໃນຫລາຍບັນຫາ ທີ່ມີຄຸນຄ່າ ດ້ວຍແນວຄິດທີ່ສ້າງສັນ. ໃນນັ້ນ, ວຽກງານຖະແຫລງຂ່າວ ໄດ້ພັດທະນາດ້ານວິທີການ ແລະ ຮູບແບບ ການນໍາສະເໜີ ຂໍ້ມູນຂ່າວສານ, ສາລະໜ້າຮູ້ ແລະ ຄວາມບັນເທີງຜ່ານສື່ຕ່າງໆ ເປັນຕົ້ນ ວິທະຍຸ, ໂທລະພາບ ແລະ ໜັງສືພິມ ເຮັດໃຫ້ສັງຄົມ ໄດ້ຮັບຂໍ້ມູນຂ່າວສານດ້ານຕ່າງໆ ຊັດເຈນ ແລະວ່ອງໄວກວ່າເກົ່າ, ວຽກງານ ວັດທະນະທໍາ ໄດ້ຢຶດໝັ້ນທິດນໍາ ປົກປັກຮັກສາ ແລະ ເສີມຂະຫຍາຍຮີດ ຄອງປະເພນີ ວັດທະນະທໍາອັນເປັນມູນເຊື້ອຂອງຊາດ, ຂອງທ້ອງຖິ່ນ ກໍຄື ເອກະລັກສະເພາະຂອງເຜົ່າຕ່າງໆ ພາຍໃນແຂວງໄດ້ເປັນຢ່າງດີ, ປົກປັກຮັກສາມໍລະດົກໃຫ້ຊົງຄຸນຄ່າ ແລະ ຍືນຍົງ, ຂະ ບວນການສິລະປະວັນນະຄະດີ ຢູ່ແຕ່ລະໂຮງຮຽນ ແລະ ທ້ອງຖິ່ນຮາກຖານບ້ານ ໄດ້ເຄື່ອນໄຫວຮັບໃຊ້ວັນສໍາຄັນຕ່າງໆຂອງຊາດ, ຂອງພັກ ແລະ ການສະເຫລີມສະຫລອງ ປີທ່ອງທ່ຽວລາວ 2018. ສຳລັບວຽກງານທ່ອງທ່ຽວ ໄດ້ເອົາໃຈໃສ່ໃນການພັດທະນາ ແລະ ສົ່ງເສີມການທ່ອງທ່ຽວ ຕິດພັນກັບການອະນຸລັກປົກປັກຮັກສາມໍລະດົກ ທາງດ້ານທຳມະຊາດ, ປະຫວັດສາດ ແລະວັດທະນະທຳ, ເສີມຂະ ຫຍາຍໃຫ້ຍືນຍົງ ແລະ ສົ່ງເສີມການທ່ອງທ່ຽວດ້ວຍຫລາຍຮູບ, ຫລາຍແບບ ແລະ ຫລາຍສີສັນ. ພິເສດ ໄດ້ເຮັດສໍາເລັດບັນດາກິດຈະກໍາ ໃນການສະເຫລີມ ສະຫລອງປີທ່ອງທ່ຽວລາວ 2018 ສາມາດດຶງດູດນັກທ່ອງທ່ຽວ ມາທ່ຽວແຂວງຫລວງພະບາງ ໄດ້ 755.019 ຄົນ, ເພີ່ມຂຶ້ນ 15,19%.
ກອງປະຊຸມຄັ້ງນີ້, ໄດ້ຮັບຟັງການໂອ້ລົມຂອງ ທ່ານ ບໍ່ແສງຄໍາ ວົງດາລາ ລັດຖະມົນຕີ ກະຊວງຖະແຫລງຂ່າວ, ວັດທະນະທຳ ແລະ ທ່ອງທ່ຽວ, ເຊິ່ງທ່ານໄດ້ເນັ້ນບາງບັນຫາ ແລະ ເປັນເຂັມຊີ້ທິດ ເຍືອງທາງ ໃຫ້ແກ່ການຈັດຕັ້ງເຄື່ອນໄຫວວຽກງານຖະແຫລງຂ່າວ, ວັດທະນະທຳ ແລະ ທ່ອງທ່ຽວ ຂອງແຂວງ ເປັນຕົ້ນ ທ່ານໄດ້ເນັ້ນໃຫ້ຄະນະນຳພະແນກ ສືບຕໍ່ປະຕິບັດວຽກງານສືກສາອົບຮົມການ ເມືອງແນວຄິດ ເປັນກົກ, ເຕົ້າໂຮມຄວາມສາມັກຄີ ໃຫ້ເປັນປຶກແຜ່ນ ຖືເປັນພັນທະໜ້າທີ່ ແລະ ຄວາມຮັບຜິດຊອບການເມືອງຂອງຕົນ, ຄຽງຄູ່ກັບການປັບປຸງຂອດທີ່ຄົງຄ້າງ ຂອງວຽກງານທຸກດ້ານ, ຄຽງຄູ່ກັບການສ້າງເງື່ອນໄຂ ອຳນວຍຄວາມສະດວກໃຫ້ປີທ່ອງທ່ຽວ ລາວ-ຈີນ 2019 ແລະ ການຮັກສານາມ ມະຍົດເມືອງຍອດນິຍົມແຫ່ງການທ່ອງທ່ຽວ ຈາກວາລະສານວັນເດີລັດ ທີ່ໄດ້ມອບໃຫ້ແກ່ ແຂວງຫລວງພະບາງອີກຄັ້ງ ໃນປີ 2019.
ກອງປະຊຸມຄັ້ງນີ້, ຍັງໄດ້ມີການມອບໃບຍ້ອງຍໍ ຂອງທ່ານເຈົ້າແຂວງ ໃຫ້ກົມກອງ ແລະບຸກ ຄົນທີ່ມີສ່ວນຮ່ວມຜະລິດສາລະຄະດີ ມະຫັດສະຈັນເມືອງງອຍ ສາມາດຍາດໄດ້ອັນດັບທີ 1 ໃນທົ່ວປະ ເທດ ແລະ ຜູ້ທີ່ປະກອບສ່ວນພັດທະນາວຽກງານ ຖວທ ຂອງແຂວງຫລວງພະບາງ, ພ້ອມທັງມອບໃບຍ້ອງຍໍ ຂອງຫົວໜ້າພະແນກ ຖວທ ແຂວງ ໃຫ້ກົມກອງ ແລະ ບຸກຄົນທີ່ປະກອບສ່ວນວຽກງານວິຊາສະເພາະຕື່ມອີກ. ເຂົ້າຮ່ວມກອງປະຊຸມຄັ້ງນີ້, ມີ ທ່ານ ວົງສະຫວັນ ເທບພະຈັນ ຮອງເຈົ້າແຂວງຫລວງພະບາງ, ມີຜູ້ຕາງໜ້າພະແນກການ, ກົມກອງກ່ຽວຂ້ອງ, ຫົວໜ້າ, ຮອງຫົວໜ້າຫ້ອງການຖວທ 11 ເມືອງ ແລະ 1 ນະຄອນ, ພ້ອມດ້ວຍພາກສ່ວນທີ່ກ່ຽວຂ້ອງເຂົ້າຮ່ວມ.
（ແຫຼ່ງຂໍ້ມູນ： ອາພຸດເດດ ບຸບຜາ/ຂປລ）
