 |
ຕາດຖໍ້າພະ ແຫລ່ງທ່ອງທ່ຽວໃໝ່ ທີ່ຄວນໄປສຳຜັດ
ກ່ຽວກັບສະຖານທີ່ທ່ອງທ່ຽວທີ່ພວມໄດ້ຮັບຄວາມນິຍົມເພື່ອຜ່ອນຄາຍຄວາມຮ້ອນຈາກອາກາກທີ່ອົບເອົ້າ, ໃນບົດນີ້ກໍຍັງສືບຕໍ່ນຳເອົາສະຖານທີ່ທ່ອງທ່ຽວທີ່ເໝາະແກ່ການລົງຫລິ້ນນໍ້າ ສຳຜັດກັບບັນຍາກາດພູຜາປ່າດົງເຊິ່ງກໍບໍ່ໄກຈາກນະຄອນຫລວງວຽງຈັນພໍປານໃດ ແລະ ກໍຢູ່ໃນເຂດບ້ານເວີນກະເບົາ ເມືອງປາກງື່ມ ນັ້ນກໍຄື ຕາດຖໍ້າພະ. ສະຖານທີ່ທ່ອງທ່ຽວແຫ່ງນີ້ຫາກໍເລີ່ມເປີດບໍລິການໃນລະດູຝົນປີຜ່ານມາ ແລະ ກໍມີນັກທ່ອງທ່ຽວຈຳນວນຫລາຍຢູ່ເຂດເມືອງປາກງື່ມ ແລະ ເຂດໃກ້ຄຽງໃຫ້ຄວາມສົນໃຈ.
ຕາດຖໍ້າພະ ແມ່ນຢູ່ໃກ້ກັບເຂດປ່າສະຫງວນພູເຂົາຄວາຍໂດຍແມ່ນພາກສ່ວນເອກະຊົນເປັນຜູ້ສຳປະທານ ແລະ ພັດທະນາໃຫ້ເປັນແຫລ່ງທ່ອງທ່ຽວ. ສໍາລັບເສັ້ນທາງແມ່ນໄປຕາມທາງ 13 ໃຕ້ໄລຍະທາງປະມານ 60 ກິໂລແມັດ ແລ້ວລ້ຽວຊ້າຍເຂົ້າໄປທາງຕາດວັງຫລວງ ແລະ ກ່ອນທີ່ຈະຮອດຕາດວັງຫລວງປະມານ 3 ກິໂລແມັດຈະມີປ້າຍລ້ຽວຂວາເຂົ້າໄປ 800 ແມັດ ກໍຈະເຖິງຕາດຖໍ້າພະແລ້ວ, ເມື່ອໄປເຖິງຈຸດໝາຍປາຍທາງແລ້ວຮັບປະກັນໄດ້ເລີຍວ່າທ່ານຈະຮູ້ສຶກສົດຊື່ນຢ່າງແນ່ນອນເພາະບັນຍາກາດດີໆ, ມີນໍ້າໃສເຢັນໆ ເໝາະແກ່ກັບການໄປພັກຜ່ອນກິ່ນເຂົ້າປ່າແບບຄອບຄົວ.
 |
ຕາດຖໍ້າພະແຫ່ງນີ້, ຍັງມີອາຫານພື້ນບ້ານ ປະເພດ ແກ່ງໜໍ່ໄມ້ສົດໆ, ປີ້ງປາໄກ່, ປີ້ງປາ ແລະ ເຄື່ອງດື່ມປະເພດຕ່າງໆໄວ້ຄອຍບໍລິການ, ນອກຈາກນີ້ຍັງມີຕູບນ້ອຍ-ໃຫຍ່ ຫລາຍກວ່າ 20 ຕູບ, ມີຫ້ອງນໍ້າ ແລະ ບ່ອນຈອດລົດກວ້າງຂວາງໄວ້ອໍານວຍຄວາມສະດວກໃຫ້ແກ່ຜູ້ທີ່ມາທ່ຽວຊົມ ແລະ ສິ່ງສໍາຄັນອີກຢ່າງໜຶ່ງຄື: ຖ້າໃຜສົນໃຈທີ່ຈະໄປທ່ຽວສາມາດນຳອາຫານເຂົ້າໄປແຕ່ງກິນເອງໄດ້ແຕ່ຫ້າມນຳເຂົ້າເຄື່ອງດື່ມທີ່ບັນຈຸແກ້ວເຂົ້າໄປເພື່ອຄວາມປອດໄພ ແລະ ເປັນການຮັກສາສິ່ງແວດລ້ອມ. ຖ້າມີໂອກາດຢ່າງລືມລອງໄປສໍາຜັດຮັບປະກັນວ່າທ່ານຈະເພີດເພີນຈົນລື່ມຄວາມອິດເມື່ອຍ ແລະ ຄວາມສັບສົນວຸ້ນວາຍໃນຕົວເມືອງໄປເລີຍ.
（ແຫຼ່ງຂໍ້ມູນ： ຂປລ）
