 |
ໃຫ້ບໍລິການ EVISA ແກ່ນັກທ່ອງທ່ຽວເຂົ້າປະເທດ
ການບໍລິການ eVisa ເປັນການຈັດຕັ້ງນະໂຍບາຍຂອງລັດຖະບານ ຕາມທິດຫັນເປັນທັນສະໄໝ ເຊິ່ງເປັນທາງເລືອກໜຶ່ງທີ່ມີຄວາມສະດວກ ແລະ ວ່ອງໄວ ສຳລັບນັກທ່ອງທ່ຽວທີ່ມີຈຸດປະສົງຂໍວີຊາເຂົ້າ ສປປ ລາວ ພ້ອມທັງຈະເປັນປັດໄຈໜຶ່ງທີ່ສຳຄັນສຳລັບການຊຸກຍູ້ ແລະ ດຶງດູດນັກທ່ອງທ່ຽວເຂົ້າມາລາວຫຼາຍຂຶ້ນ.
ປັດຈຸບັນກົມກົງສຸນກະຊວງການຕ່າງປະເທດ ໃນຖານະເຮັດໜ້າທີ່ຈັດຕັ້ງປະຕິບັດໂຄງການອອກ eVisa ໄດ້ປະສານສົມທົບກັບພາກສ່ວນກ່ຽວຂ້ອງ ກະກຽມຢ່າງຮອບດ້ານ ເພື່ອເຮັດໃຫ້ໂຄງການດັ່ງກ່າວ ໄດ້ຮັບການຈັດຕັ້ງປະຕິບັດຢ່າງມີປະສິດທິຜົນ ແລະ ທັນເວລາ ໃນນີ້ ໜຶ່ງໃນວຽກງານບຸລິມະສິດແມ່ນການສົ່ງເສີມ ແລະ ປະຊາສໍາພັນການອອກ eVisa ໃຫ້ນັກທ່ອງທ່ຽວ ສາມາດເຂົ້າເຖິງຂໍ້ມູນການບໍລິການໄດ້ຢ່າງສະດວກ ວ່ອງໄວ ແລະ ເປັນທີ່ຮັບຮູ້ຢ່າງກວ້າງຂວາງໃນສາກົນ.
（ແຫຼ່ງຂໍ້ມູນ： vientianemai.net）
