 |
ທ່ານ ສະຫວັນຄອນ ລາຊະມຸນຕີ ຮອງລັດຖະມົນຕີ ກະຊວງຖະແຫລງຂ່າວ, ວັດທະນະທຳ ແລະ ທ່ອງທ່ຽວ.
ທ່ານ ສະຫວັນຄອນ ລາຊະມຸນຕີ ຮອງລັດຖະມົນຕີ ກະຊວງຖະແຫລງຂ່າວ, ວັດທະນະທຳ ແລະ ທ່ອງທ່ຽວ ກ່າວໃນກອງປະຊຸມສຳມະນາວິທະຍາສາດ ພາຍໃຕ້ຫົວຂໍ້: ການຄຸ້ມຄອງ, ການນຳໃຊ້ ແລະ ພັດທະນາສື່ໃນໄລຍະໃໝ່ ໃນວັນທີ 24 ກັນຍາ 2018 ນີ້ວ່າ: ສຳລັບທິດທາງແຜນການພັດທະນາ ວຽກງານຖະແຫລງຂ່າວ ແລະ ສື່ມວນຊົນໃນຕໍ່ໜ້າ ແມ່ນຈະໄດ້ສືບຕໍ່ຄຸ້ມຄອງ ແລະ ພັດທະນາສື່ມວນຊົນໃຫ້ກ້າວສູ່ຄຸນນະພາບໃໝ່, ທັນສະໄໝ, ວ່ອງໄວ, ເປັນກະບອກສຽງທີ່ແຫລມຄົມຂອງພັກ, ລັດ, ເປັນເວທີສົ່ງເສີມປະຊາທິປະໄຕປະຊາຊົນ, ເປັນ ແຫລ່ງ ຂໍ້ມູນຂ່າວສານ, ສາລະຄວາມຮູ້ ແລະ ຄວາມບັນເທິງ, ຕອບຕ້ານຖ້ອຍທຳນອງຂອງຄົນບໍ່ດີ ແລະ ອິດທິກຳລັງປໍລະປັກ, ສາມາດເຂົ້າເຖິງທຸກເປົ້າໝາຍ, ທຸກພື້ນທີ່ໃນ ທົ່ວປະເທດ ແລະ ທົ່ວໂລກ, ລວມທັງແນະນຳ, ຊຸກຍູ້ ແລະ ຕິດຕາມການຈັດຕັ້ງປະຕິບັດ ແລະ ເຜີຍແຜ່ກົດໝາຍວ່າດ້ວຍສື່ມວນຊົນ. ສືບຕໍ່ພັດທະນາເນື້ອໃນໃຫ້ກວ້າງ, ເລິກ, ຮັບປະກັນ 4 ລັກສະນະ, ຫລາຍຮູບແບບ, ດຶງດູດຄວາມສົນໃຈຂອງຜູ້ອ່ານ, ຜູ້ຟັງ, ຜູ້ເບິ່ງ ແລະ ເປັນແຫລ່ງສະໜອງຂໍ້ມູນຂ່າວສານ, ການບັນເທິງ ແລະ ໃຫ້ສາລະຄວາມຮູ້ຢ່າງ ຮອບດ້ານ ໃຫ້ແກ່ສັງຄົມ; ສືບຕໍ່ ໃຫ້ ອົງການພັກ, ລັດ, ເອກະຊົນ ເອົາໃຈໃສ່ວຽກງານປະຊາສຳພັນຂອງຕົນ ດ້ວຍການໃຫ້ຂ່າວແກ່ສື່ມວນຊົນຢ່າງທັນການ ແລະ ສືບຕໍ່ລົງທຶນຫັນປ່ຽນ ເຕັກນິກການ ຖະແຫລງຂ່າວ ແລະ ສື່ມວນຊົນທັງຢູ່ສູນກາງ ແລະ ທ້ອງຖິ່ນໄປສູ່ລະບົບດີຈີຕອນ ດ້ວຍຈັງຫວະໄວຂຶ້ນ.
ໃນຂະນະດຽວກັນ, ກໍສືບຕໍ່ສ້າງຄວາມເຂັ້ມແຂງ ໃຫ້ການຈັດຕັ້ງຖະແຫລງຂ່າວ ແລະ ສື່ມວນຊົນ, ພັດທະນາບຸກຄະລາກອນ ໃຫ້ມີຄຸນທາດການເມືອງ, ມີຄຸນສົມບັດສິນທຳປະຕິວັດ, ມີຈັນຍາບັນນັກຂ່າວ, ຮູ້ຄຸ້ມຄອງ, ມີວິຊາການ, ຮູ້ສ້າງລາຍຮັບ, ຮູ້ແບ່ງປັນ ແລະ ມີຄວາມພຽງພໍກັບຄວາມຕ້ອງການ ໃນໄລຍະໃໝ່; ເອົາ ໃຈໃສ່ປະຕິບັດນະໂຍບາຍ, ຍ້ອງຍໍ, ໃຫ້ນາມມະ ຍົດຕໍ່ຜູ້ມີຜົນງານດີເດັ່ນ ເປັນຕົ້ນແມ່ນຖັນແຖວພະນັກງານສື່ມວນຊົນ ແລະ ຜູ້ສະໜັບສະໜູນ, ພ້ອມທັງບັນຈຸບຸກຄະລາກອນເຂົ້າໃສ່ແຕ່ລະຂະແໜງວຽກ ໃຫ້ແທດເໝາະ ແລະ ພຽງພໍ ເພື່ອຮັບປະກັນຄຸນນະພາບຂອງວຽກງານ.
ນອກຈາກນັ້ນ, ເສີມຂະຫຍາຍບົດບົດບາດ ຂອງສະມາຄົມນັກຂ່າວ ແຫ່ງ ສປປ ລາວ ໃນການເຕົ້າໂຮມ, ສຶກສາອົບຮົມຖັນແຖວນັກຮົບສື່ມວນຊົນ ແລະ ເຮັດໜ້າທີ່ພົວ ພັນຕ່າງ ປະເທດຢ່າງຖືກທິດ; ສືບຕໍ່ສ້າງຄວາມເຂັ້ມແຂງດ້ານການເງິນ ໃຫ້ອົງການສື່ມວນຊົນ ດ້ວຍການສ້າງຖານລາຍຮັບໃໝ່ ທີ່ມີຄວາມໝັ້ນທ່ຽງ, ປະດິດສ້າງໃໝ່ໃນການ ບໍລິຫານ ການ ຜະລິດ ແລະ ການຕະຫລາດ ເພື່ອຂຸດຄົ້ນລາຍຮັບວິຊາການແນໃສ່ ກຸ້ມຕົນເອງເທື່ອກະກ້າວໃນຍຸກເສດຖະກິດ ແລະ ສື່ມວນຊົນດີຈີຕອນ ແລະ ເປັນເຈົ້າການເພີ່ມ ທະວີການ ຮ່ວມມືກັບ ສສ. ຫວຽດນາມ, ສປຈີນ, ປະເທດໃກ້ຄຽງ, ອາຊຽນ, ບັນດາປະເທດເພື່ອນມິດ ແລະ ອົງການຈັດຕັ້ງສາກົນ ໃນພາກພື້ນ ແລະ ໃນໂລກ ເພື່ອພັດທະນາວຽກ ງານຖະແຫລງ ຂ່າວ ແລະ ສື່ມວນຊົນ.
（ແຫຼ່ງຂໍ້ມູນ： ຂປລ）
