 |
ນ້ອງນັກຮຽນທີ່ຢູ່ເຂດຫ່າງໄກຈາກຕົວເມືອງ.
ນະໂຍບາຍການຮຽນຮູ້ຕະຫຼອດຊີວິດຂອງ ສປປ ລາວ ໄດ້ເນັ້ນໃສ່ການສ້າງກົນໄກຂອງການສຶກສາ ເພື່ອໃຫ້ເຂົ້າເຖິງ ແລະ ກະຕຸກຊຸກຍູ້ໃຫ້ກຸ່ມເປົ້າໝາຍເຂົ້າຮ່ວມການຮຽນຮູ້ຕະຫຼອດຊີວິດ ພ້ອມທັງເນັ້ນໃສ່ຄວາມຕ້ອງການທຽບຫຼັກສູດ ເພື່ອສອດຄ່ອງກັບທຸກລະດັບຂອງການຮຽນ ແລະ ຮູບແບບຂອງການຮຽນ ແລະ ໃຫ້ສອດຄ່ອງກັບຄວາມຕ້ອງການສໍາລັບການພັດທະນາເສດຖະກິດ-ສັງຄົມຂອງພາກພື້ນ ແລະ ສາກົນ.
ອີງຕາມບົດຮຽນຂອງການຈັດຕັ້ງປະຕິບັດການຮຽນຮູ້ຕະລອດຊີວິດທີ່ດີ ໃນພາກທີ 2 ຂອງ ສປປ ລາວ ຫົວຂໍ້ທີ 3 ສຸມຄວາມພະຍາຍາມເພື່ອກ້າວໄປສູ່ການສ້າງລະບົບແຫ່ງຊາດດ້ວຍປະຊາຊົນ ລະບຸວ່າ: ນະໂຍບາຍການຮຽນຮູ້ຕະຫຼອດຊີວິດຂອງ ສປປ ລາວ ໄດ້ເນັ້ນໃສ່ການສ້າງກົນໄກຂອງການສຶກສາ ເພື່ອໃຫ້ເຂົ້າເຖິງ ແລະ ກະຕຸກຊຸກຍູ້ໃຫ້ກຸ່ມເປົ້າໝາຍເຂົ້າຮ່ວມການຮຽນຮູ້ຕະຫຼອດຊີວິດ, ເຊິ່ງ ນະໂຍບາຍໃໝ່ນີ້ ໄດ້ກໍານົດຄວາມຕ້ອງການໃນການເພີ່ມຂີດຄວາມສາມາດຂອງສະຖາບັນການສຶກສາ ເພື່ອສະໜອງການຮຽນຮູ້ຕະຫຼອດຊີວິດ ໂດຍໄດ້ມີການກໍານົດການສ້າງຂີດຄວາມສາມາດໃຫ້ແກ່ຄູ, ການສ້າງພື້ນຖານໂຄງລ່າງ, ການຈັດຕັ້ງການຮຽນ-ການສອນແບບຢືດຢຸ່ນ ແລະ ການກະກຽມປຶ້ມຕໍາລາຮຽນ, ຄູ່ມືຄູ ໂດຍສະເພາະແມ່ນສໍາລັບວຽກງານການສຶກສານອກໂຮງຮຽນ. ນອກຈາກນັ້ນ, ນະໂຍບາຍດັ່ງກ່າວ ຍັງໄດ້ເນັ້ນໃສ່ຄວາມຕ້ອງການທຽບຫຼັກສູດ ເພື່ອສອດຄ່ອງກັບທຸກລະດັບຂອງການຮຽນ ແລະ ຮູບແບບຂອງການຮຽນ ແລະ ໃຫ້ສອດຄ່ອງກັບຄວາມຕ້ອງການສໍາລັບການພັດທະນາເສດຖະກິດ-ສັງຄົມຂອງພາກພື້ນ ແລະ ສາກົນ.
ນອກຈາກນັ້ນ, ການມີສ່ວນຮ່ວມດ້ວຍຄວາມເອົາໃຈໃສ່ ແລະ ຮັບຜິດຊອບຈາກບັນດາພາກສ່ວນທີ່ກ່ຽວຂ້ອງອື່ນໆ ເປັນຄູ່ຮ່ວມພັດທະນາຢູ່ພາຍໃນປະເທດໃນການຈັດຕັ້ງປະຕິບັດການຮຽນຮູ້ຕະຫຼອດຊີວິດ ກໍ່ມີຄວາມສໍາຄັນອີກຢ່າງໜຶ່ງໃນການຮ່າງນະໂຍບາຍການຮຽນຮູ້ຕະຫຼອດຊີວິດ, ພ້ອມທັງຍັງເປັນການສ້າງລະບົບການຄຸ້ມຄອງການຮຽນຮູ້ຕະຫຼອດຊີວິດທີ່ມີປະສິດທິຜົນ ແລະ ຍືນຍົງດ້ວຍການສ້າງຕັ້ງຄະນະຮັບຜິດຊອບລະດັບຊາດ, ແຂວງ ແລະ ຂັ້ນເມືອງ ເພື່ອຮັບຜິດຊອບວຽກງານຮຽນຮູ້ຕະຫຼອດຊີວິດ. ພ້ອມດຽວກັນນີ້, ນະໂຍບາຍ ຍັງຄາດວ່າຈະໄດ້ມີການປັບປຸງລະບົບການປະເມີນຜົນຕື່ມອີກ, ພິຈາລະນາບັນດາຍຸດທະສາດສໍາລັບການຮຽນ-ການສອນອື່ນໆ, ປັບປຸງລະບົບການຮັບຮູ້, ການຢັ້ງຢືນ ແລະ ການທຽບໂອນຂອງການສຶກສາພາຍໃນ, ພາຍນອກໂຮງຮຽນ ແລະ ການຮຽນຮູ້ຕາມອັດທະຍາໄສ.
ຄຽງຄູ່ກັນນັ້ນ, ນະໂຍບາຍສົ່ງເສີມ ແລະ ຂອບການພັດທະນາຂອງສະຖາບັນການສຶກສາ ໂດຍອີງໃສ່ກົດໝາຍການສຶກສາ ສະບັບ 133/2015, ລັດຖະບານສົ່ງເສີມໃຫ້ພົນລະເມືອງລາວທຸກຄົນມີຄວາມຮູ້ ແລະ ທັດສະ ໂດຍຜ່ານການສຶກສາຮໍ່າຮຽນຈາກການສຶກສາພາຍໃນ ແລະ ພາຍນອກໂຮງຮຽນ. ແຜນພັດທະນາເສດຖະກິດ-ສັງຄົມແຫ່ງຊາດ 5 ປີ ຄັ້ງທີ 8 (2016-2020) ໄດ້ຢໍ້າເຖິງຄວາມຈໍາເປັນໃນການສືບຕໍ່ປະຕິຮູບການສຶກສາໃຫ້ປາກົດຜົນເປັນຈິງ ໂດຍເນັ້ນໜັກໃສ່ການຂະຫຍາຍໂອກາດທາງການສຶກສາ ເປັນຕົ້ນແມ່ນກຸ່ມປະຊາກອນທີ່ດ້ອຍໂອກາດຢູ່ໃນເຂດຊົນນະບົດຫ່າງໄກສອກຫຼີກ. ຍຸດທະສາດການເຕີບໂຕ ແລະ ຫຼຸດຜ່ອນຄວາມທຸກຍາກ (NGPES) ໄດ້ສະເໜີຂອບການພັດທະນາ ແລະ ປະຕິບັດການຫຼຸດຜ່ອນອັດຕາຄວາມທຸກຍາກ ແລະ ສົ່ງເສີມການເຕີບໂຕທາງດ້ານເສດຖະກິດແບບຍືນຍົງ ໂດຍຜ່ານໂຄງການການສຶກສາ ເປັນຕົ້ນແມ່ນການເຝິກອົບຮົມວິຊາຊີບ ແລະ ນະໂຍບາຍດັ່ງກ່າວ ໄດ້ເຮັດໃຫ້ມີກົດໝາຍກ່ຽວກັບວຽກງານອາຊີວະສຶກສາ ແລະ ດໍາລັດກ່ຽວກັບການສຶກສາຊັ້ນສູງ, ເຊິ່ງຖືວ່າເປັນການສ້າງພື້ນຖານທາງດ້ານນິຕິກໍາໃຫ້ແກ່ການສ້າງນະໂຍບາຍການຮຽນຮູ້ຕະຫຼອດຊີວິດ.
ສໍາລັບທິດທາງຕໍ່ໜ້າ ແມ່ນໄດ້ຖືເອົາຍຸດທະສາດເປັນບ່ອນອີງສໍາລັບການສົ່ງເສີມການຮຽນຮູ້ຕະຫຼອດຊີວິດຢູ່ໃນ ສ ປປ ລາວ, ເຊິ່ງກົມການສຶກສານອກໂຮງຮຽນ ກະຊວງສຶກສາທິການ ແລະ ກິລາ ຈະສືບຕໍ່ເຜີຍແຜ່ຮ່າງນະໂຍບາຍ ວ່າດ້ວຍການຮຽນຮູ້ຕະຫຼອດຊີວິດໃຫ້ແກ້ຜູ້ບໍລິຫານທີ່ກ່ຽວຂ້ອງຂັ້ນສູນກາງ, ຂັ້ນແຂວງ ແລະ ຂັ້ນທ້ອງຖິ່ນ, ນໍາສະເໜີນະໂຍບາຍການຮຽນຮູ້ຕະຫຼອດຊີວິດ ສະບັບສົມບູນໃຫ້ແກ່ລັດຖະບານ ເພື່ອປະກາດນໍາໃຊ້, ຍົກລະດັບຄວາມເຂົ້າໃຈຕໍ່ກັບນະໂຍບາຍການຮຽນຮູ້ຕະຫຼອດຊີວິດໃຫ້ແກ່ຜູ້ບໍລິຫານການສຶກສາທຸກລະດັບ ແລະ ຈັດຕັ້ງກອງປະຊຸມແນະນໍາການຈັດຕັ້ງປະຕິບັດນະໂຍບາຍການຮຽນຮູ້ຕະຫຼອດຊີວິດ ຢູ່ ສປປ ລາວ.
（ຫັດທະບູນ）
