 |
ພາບປະກອບ
ເພື່ອຮອງຮັບການປະຕິວັດ ອຸດສາຫະກຳ ຄັ້ງທີ 4, ສປປ ລາວ ຕ້ອງໄດ້ເອົາໃຈໃສ່ໂຄສະນາ ເຜີຍແຜ່ໃຫ້ທົ່ວສັງຄົມຮັບຮູ້ ແລະ ເຂົ້າໃຈຢ່າງເລິກເຊິ່ງເຖິງທາດແທ້ ຂອງການປະຕິວັດອຸດສາຫະກຳ ຄັ້ງທີ 4, ສ້າງ ແລະ ປັບປຸງບັນດາກົດໝາຍ, ນິຕິກຳລຸ່ມກົດໝາຍ, ກົນໄກການປະສານງານ ແລະ ຄຸ້ມຄອງລັດ, ຄຸ້ມຄອງເສດຖະກິດ-ສັງຄົມ ຕາມແນວທາງນະ ໂຍບາຍຂອງພັກ-ລັດ ໃນຍຸກອຸດສາຫະກຳ 4.0 ພ້ອມດຽວກັນນັ້ນ, ຕ້ອງບຸທະລຸໃນການພັດທະນາຊັບ ພະຍາກອນມະນຸດ, ຄົ້ນຄວ້ານຳໃຊ້ວິທະຍາສາດ ແລະ ເຕັກໂນໂລຊີໃໝ່ທີ່ທັນສະໄໝ, ເອົາໃຈໃສ່ເປີດກວ້າງ ການບໍລິການວິທະຍາສາດ ແລະ ເຕັກໂນໂລຊີໃຫ້ແກ່ສັງຄົມ, ລວມທັງເປີດກວ້າງການຮ່ວມມືກັບ ຕ່່າງປະເທດ ຕາມແນວທາງນະໂຍບາຍ ການຕ່າງປະເທດຂອງພັກ.
ສຳລັບການປະຕິວັດ ອຸດສາຫະກຳຄັ້ງທີ 4, ສປປ ລາວ ໄດ້ປະເຊີນກັບສິ່ງທ້າທາຍ ຫລາຍຢ່າງເນື່ອງຈາກວ່າ ສປປ ລາວ ຂາດເຂີນຊັບພະຍາກອນມະນຸດ ທີ່ມີຄວາມຮູ້ ຄວາມສາມາດສູງ, ທ່າແຮງດ້ານວິທະຍາສາດ ແລະ ເຕັກໂນໂລຊີ ຍັງບໍ່ທັນເຂັ້ມແຂງ, ຖ້າຊັກຊ້າຈະກາຍເປັນປະເທດ ທີ່ຫລ້າຫລັງ, ບັນຫາໄພຫວ່າງງານ ກາຍເປັນບັນຫາທາງດ້ານສັງຄົມ, ການເມືອງ, ບັນຫາທາງສັງຄົມອອນລາຍ ແລະ ຄວາມປອດໄພດ້ານຂໍ້ມູນຂ່າວສານ.
（ໄຊພອນ）
