ໃນວັນທີ 14 ພຶດສະພາ, ທີ່ສໍານັກງານ ສູນກາງຄະນະຊາວຫນຸ່ມປະຊາຊົນປະຕິວັດລາວ ນະຄອນຫຼວງວຽງຈັນ, ໄດ້ຈັດຕັ້ງກອງປະຊຸມການພົບປະ ແລະ ລົງນາມ ລະຫວ່າງ ສະມາຄົມນັກທຸລະກິດຫວຽດນາມ ທີ່ຮ່ວມມື ແລະ ລົງທຶນ ຢູ່ລາວ (BACI) ແລະ ສະມາຄົມ ນັກທຸລະກິດ ໄວຫນຸ່ມລາວ (YEAL).
ເຂົ້າຮ່ວມກອງປະຊຸມຄັ້ງນີ້ມີ ທ່ານເອກອັກຄະລັດຖະທູດ ຜູ້ມີອຳນາດເຕັມ ຫວຽດນາມປະຈໍາລາວ, ຫງ໋ວຽນ ບ໋າ ຮູ່ງ; ຄະນະບໍລິຫານງານສູນກາງຊາວຫນຸ່ມປະຊາຊົນປະຕິວັດລາວ ທ່ານ ວິລະວອນ ພັນທະວົງ; ປະທານສະມາຄົມ BACI ທ່ານ ຫງ໋ວຽນ ເຖ໋ ຮ່ຽນ; ປະທານສະມາຄົມ YEAL ທ່ານ ຄຳແສນ ສີສະວົງ ແລະ ນັກທຸລະກິດອີກຫລາຍກວ່າ 100 ແຫ່ງ ຂອງ YEAL ແລະ BACI.
ກ່າວຄຳປາໄສທີ່ກອງປະຊຸມ, ທ່ານ ຫງ໋ວຽນ ເຖ໋ ຮ່ຽນ - ປະທານສະມາຄົມ BACI ໃຫ້ຮູ້ວ່າ: ນັກທຸລະກິດ ກໍ່ຄືວິສາຫະກິດຫວຽດນາມ ມີໂຄງການ-ການລົງທຶນ ຫຼາຍກວ່າ 400 ແຫ່ງໃນລາວ, ເຊິ່ງມີທຶນຈົດທະບຽນ ກວ່າ 4,1 ຕື້ໂດລາສະຫະລັດ.
ໃນການລົງທຶນໂດຍກົງ, ວິສາຫະກິດຂອງສອງປະເທດໄດ້ມີຄວາມບຸກບືນ ແລະ ການຮ່ວມມືພັດທະນາ ໃນຫລາຍຂົງເຂດເຊັ່ນ: ການຂຸດຄົ້ນແຮ່ທາດ, ການພັດທະນາກະສິກໍາ ແລະ ການບໍລິການ ເພື່ອໃຫ້ສອດຄ່ອງ ກັບຄວາມສາມາດ ແລະ ທ່າແຮງຂອງສອງປະເທດ.
 |
ປະທານສະມາຄົມ BACI ຫງ໋ວຽນ ເຖ໋ ຮ່ຽນ (ຂວາ) ແລະ ປະທານສະມາຄົມ YEAL ຄຳແສນ ສີສະວົງ ມອບເອກະສານການຮ່ວມມື. (ພາບ: TTXVN)
ທ່ານ ຫງ໋ວຽນ ເຖ໋ ຮ່ຽນ ເນັ້ນໜັກວ່າ: ຜົນປະໂຫຍດຂອງການຮ່ວມມື ລະຫວ່າງສອງປະເທດຫວຽດນາມ ແລະ ລາວ ໃນຊຸມປີທີ່ຜ່ານມາໄດ້ສະແດງໃຫ້ເຫັນຄວາມພະຍາຍາມຂອງວິສາຫະກິດຂອງສອງປະເທດ, ກໍ່ຄືລັດຖະບານ, ບັນດາກະຊວງ, ທະບວງຕ່າງໆ ຂອງຫວຽດນາມ ແລະ ລາວ.
ປະທານສະມາຄົມ ທ່ານ ຄຳແສນ ສີສະວົງ ໃຫ້ຮູ້ວ່າ: ການຮ່ວມມືລະຫວ່າງ YEAL ແລະ BACI ມີຄວາມສໍາຄັນຈໍາເປັນທີ່ສຸດໃນປະຈຸບັນ ແລະ ອະນາຄົດ, ໂດຍສະເພາະໃນການສົ່ງເສີມການພັດທະນາເສດຖະກິດ-ສັງຄົມຂອງລາວ; ທ່ານ ຄຳແສນ ສີສະວົງ ຍັງເນັ້ນຫນັກວ່າ: YEAL ແລະ BACI ຄວນໃຊ້ໂອກາດໃນການຮ່ວມມືຫຼາຍກວ່າເກົ່າ, ໜູນຊ່ວຍແກ້ໄຂສະພາບການຂອງຊາວຫນຸ່ມວ່າງານ ກໍ່ຄືທີ່ບໍ່ມີວຽກເຮັດງານທໍາໃນລາວ.
ນອກຈາກນັ້ນ, ທ່ານ ຄຳແສນ ສີສະວົງ ປະທານ YEAL ໄດ້ສະເໜີໃຫ້ ສະມາຄົມ YEAL ແລະ BACI ຕ້ອງສ້າງຕັ້ງຄະນະກໍາມະການຮ່ວມມືເພື່ອແນໃສ່ການຮ່ວມມື ອັນແທ້ຈິງ ແລະ ປະສິດທິຜົນ.
 |
ທັດສະນີຍະພາບຂອງກອງປະຊຸມ. (ພາບ: TTXVN)
ໃນຕອນທ້າຍຂອງກອງປະຊຸມ, ວິສາຫະກິດຂອງສອງປະເທດໄດ້ລົງລາຍເຊັນ 5 ເອກະສານການຮ່ວມມື.
（ຄຳຮຸ່ງ）
