 |
ທູດລາວ ຍື່ນສານຕາຕັ້ງຕໍ່ປະທານປະເທດ ສສ ຫວຽດນາມ
ທ່ານ ແສງເພັດ ຮຸ່ງບຸນຍວງ ໄດ້ສະແດງຄວາມຍິນດີ ແລະ ເປັນກຽດຢ່າງສູງ ທີ່ໄດ້ຮັບການແຕ່ງຕັ້ງ ໃຫ້ດໍາລົງຕໍາແໜ່ງ ເປັນເອກອັກຄະລັດຖະທູດ ວິສາມັນ ຜູ້ມີອໍານາດເຕັມແຫ່ງ ສປປ ລາວ ປະຈໍາ ສສ ຫວຽດນາມ, ພ້ອມທັງ ໄດ້ນຳເອົາຄໍາອວຍພອນອັນປະເສີດ ຂອງທ່ານ ປະທານປະ ເທດ ແຫ່ງສປປ ລາວ ຝາກມາຍັງທ່ານ ປະທານປະເທດ ສສ ຫວຽດນາມ ແລະ ໃຫ້ຄໍາໝັ້ນສັນຍາວ່າ ທ່ານ ຈະພະຍາຍາມເຮັດສຸດຄວາມສາມາດ ຂອງຕົນ ເຂົ້າໃນການເສີມຂະຫຍາຍສາຍພົວພັນອັນຍິ່ງໃຫຍ່, ຄວາມສາມັກຄີແບບພິເສດ ແລະ ການຮ່ວມມືຮອບດ້ານ ລະຫວ່າງ ສອງພັກ, ສອງລັດ ແລະ ປະຊາຊົນ ສອງປະເທດ ໃຫ້ແຕກດອກອອກຜົນ ແລະ ໃຫ້ຂະຫຍາຍ ຕົວຢ່າງບໍ່ຢຸດຢັ້ງ.
ໂອກາດນີ້, ທ່ານ ຫງວຽນ ຝູຈ້ອງ ໄດ້ຕາງໜ້າ ລັດ ແລະ ປະຊາຊົນຫວຽດນາມ ສະແດງຄວາມຍິນດີຕ້ອນຮັບທ່ານທູດ, ພ້ອມທັງສົ່ງຄໍາຢື້ຢາມຖາມຂ່າວ ແລະ ພອນໄຊອັນປະເສີດ ມາຍັງບັນດາການນຳລາວ ຈົ່ງມີພາລະນາໄມ ສົມບູນ, ມີຄວາມຜາສຸກ ແລະ ໄດ້ຮັບຜົນສຳເລັດໃໝ່ ໃນການນໍາພາລັດຖະບານ ແລະ ປະຊາຊົນລາວ ໄປສູ່ຄວາມຈະເລີນຮຸ່ງເຮືອງ. ປະທານປະເທດ ຫງວຽນ ຝູຈ້ອງ ຍັງໄດ້ຊີ້ໃຫ້ເຫັນວ່າ: ປັດຈຸບັນ, ຫວຽດນາມ ໄດ້ມີການຂະຫຍາຍຕົວຢ່າງຕັ້ງໜ້າ ໃນທຸກຂົງເຂດ ແລະ ເຮັດໃຫ້ຊື່ສຽງ ຂອງ ຫວຽດນາມ ນັບມື້ສູງເດັ່ນໃນເວທີພາກພື້ນ ແລະ ສາກົນ. ເປັນຕົ້ນແມ່ນ ຫວຽດນາມ ຈະດຳລົງຕຳແໜ່ງ ເປັນປະທານອາຊຽນ ໃນປີ 2020 ແລະ ເປັນສະມາຊິກບໍ່ຖາວອນ ຂອງສະພາຄວາມໝັ້ນຄົງ ສະຫະປະຊາຊາດ 2020-2021.
ປະທານປະເທດ ຫງວຽນ ຝູຈ້ອງ ເຊື່ອໝັ້ນວ່າ: ໃນໄລຍະປະຕິບັດໜ້າທີ່ ຂອງທ່ານ ທູດແສງເພັດ ຮຸ່ງບຸນຍວງ ຢູ່ຫວຽດນາມ ຈະສຸມໃສ່ປະຕິບັດບັນດາໜ້າທີ່ ທີ່ລັດ ແລະ ປະຊາຊົນ ມອບໝາຍໃຫ້ ປະສົບຜົນສໍາເລັດເປັນຢ່າງດີ. ສປປ ລາວ ແລະ ສສ ຫວຽດນາມ ໄດ້ສ້າງຕັ້ງສາຍພົວພັນການທູດ ນໍາກັນໃນວັນທີ 5 ກັນຍາ 1962, ເປັນປະເທດບ້ານໃກ້ເຮືອນຄຽງ, ມີການພົວພັນ ມິດຕະພາບອັນຍິ່ງໃຫຍ່, ຄວາມສາມັກຄີແບບພິເສດ ແລະ ມີການຮ່ວມມືຮອບດ້ານ: ການເມືອງ, ປ້ອງກັນຊາດ-ປ້ອງກັນຄວາມສະຫງົບ, ການສຶກສາ, ວັດທະນະທຳ, ການຄ້າ-ການລົງທຶນ, ການຄົມມະນາຄົມຂົນສົ່ງ, ກະສິກໍາ ແລະ ອື່ນໆ ທີ່ນັບມື້ເຂົ້າສູ່ລວງເລິກ ແລະ ນໍາມາຜົນປະໂຫຍດ ມາສູ່ປະຊາຊົນສອງຊາດ ລາວ-ຫວຽດນາມ ຕະຫລອດມາ.
（ແຫຼ່ງຂໍ້ມູນ： ຂປລ）
