 |
ທ່ານຮອງນາຍົກລັດຖະມົນຕີ ຕ້ອນຮັບຄະນະຜູ້ແທນຫວຽດນາມ
ທີ່ຫ້ອງວ່າການສຳນັກງານນາຍົກລັດຖະມົນຕີ, ທ່ານ ສອນ ໄຊ ສີພັນດອນ ຮອງນາຍົກ ລັດຖະມົນຕີ ແຫ່ງ ສປປ ລາວ ໄດ້ຕ້ອນຮັບການເຂົ້າຢ້ຽມຂໍ່ານັບຂອງ ທ່ານ ດ່າວ ຫງ໋ອກ ຢຸງ ລັດຖະມົນຕີກະຊວງແຮງງານເສຍອົງຄະ ແລະ ສັງຄົມ ແຫ່ງ ສສ ຫວຽດນາມ ພ້ອມຄະນະ ໃນໂອກາດທີ່ເດີນທາງມາຢ້ຽມຢາມ ແລະ ເຂົ້າຮ່ວມກອງປະຊຸມລັດຖະມົນຕີແຮງງານ ແລະ ສະຫວັດດີການສັງຄົມ ລາວ - ຫວຽດນາມ ຄັ້ງທີ IV ປະຈຳປີ 2019 (26-29/3/2019).
ໂອກາດນີ້, ທ່ານ ຮອງນາຍົກລັດຖະມົນຕີ ໄດ້ກ່າວສະແດງຄວາມຍິນດີຕ້ອນຮັບ, ຊົມເຊີຍ ແລະ ຕີລາຄາສູງ ຕໍ່ການມາຢ້ຽມຢາມ ແລະ ເຮັດວຽກຢູ່ ສປປ ລາວ ຂອງທ່ານ ດ່າວ ຫງ໋ອກ ຢຸງ ພ້ອມຄະນະ ຊຶ່ງລາ - ຫວຽດນາມ ມີມູນເຊື້ອສາມັກຄີກັນມາແຕ່ຍາວນານ ເປັນການພົວພັນຮ່ວມມືພິເສດຮອບດ້ານ. ສຳລັບດ້ານແຮງງານ ແລະ ສະຫວັດດີການ ສັງຄົມນັບມື້ນັບມີການສືບຕໍ່ ແລະ ຂະຫຍາຍການຮ່ວມມືໃນຫຼາຍໆດ້ານ. ທ່ານ ຮອງນາ ຍົກລັດຖະມົນຕີ ຍັງໄດ້ອວຍ ພອນໃຫ້ ທ່ານ ດ່າວ ຫງ໋ອກ ຢຸງ ພ້ອມຄະນະມີຜົນສຳເລັດອັນຈົບງາມໃນການມາຢ້ຽມຢາມ ແລະ ເຂົ້າຮ່ວມກອງປະຊຸມລັດຖະມົນຕີແຮງງານ ແລະ ສະຫວັດດີການສັງຄົມ ລາວ-ຫວຽດນາມຄັ້ງນີ້.
ໂອກາດດຽວກັນ, ທ່ານ ດ່າວ ຫງ໋ອກ ຢຸງ ກໍໄດ້ກ່າວສະ ແດງຄວາມຂອບໃຈ ຕໍ່ທ່ານ ຮອງນາຍົກລັດຖະມົນຕີ ທີ່ໄດ້ໃຫ້ການຕ້ອນຮັບອັນອົບອຸ່ນ ພ້ອມທັງໄດ້ກ່າວຈຸດປະສົງໃນການມາຢ້ຽມຢາມ ແລະ ເຮັດວຽກຢູ່ ສປປ ລາວ ໃນຄັ້ງນີ້ໃຫ້ທ່ານ ຮອງນາຍົກລັດຖະມົນຕີໄດ້ຮັບຊາບ.
（ແຫຼ່ງຂໍ້ມູນ： pasaxon.org.la）
