 |
ທ່ານ ຫງວຽນ ບາຮຸ່ງ ເອກອັກຄະລັດສະທູດ ສສ ຫວຽດນາມ ປະຈຳ ສປປ ລາວ.
ທ່ານ ຫງວຽນ ບາຮຸ່ງ ຍັງໄດ້ໃຫ້ທັດສະນະວ່າ: ໃນຖານະເປັນເອກອັກຄະລັດຖະທູດ ແຫ່ງ ສສ ຫວຽດນາມ ປະຈຳ ສປປ ລາວ, ເຊິ່ງມີໜ້າທີ່ສຳຄັນໃນການປະສານສົມທົບ, ເສນາທິການ, ຊຸກຍູ້ ແລະ ຕິດຕາມການຈັດຕັ້ງປະຕິບັດ ຂໍ້ຕົກລົງຂັ້ນສູນກາງພັກຂອງສອງປະເທດທຸກໆປີ ບົນພື້ນຖານສາຍພົວພັນພິເສດ ລະຫວ່າງ ສອງປະເທດ, ການນຳຂັ້ນສູງຂອງພວກເຮົາໄດ້ມີການພົບປະ ແລະ ສ້າງບັນດາຂໍ້ຕົກລົງທີ່ສຳຄັນ. ການຈັດຕັ້ງປະຕິບັດຂໍ້ຕົກລົງຂັ້ນສູງ ລະຫວ່າງ ລາວ-ຫວຽດນາມ ຢ່າງມີໄຊ ຈະມີຄວາມໝາຍສຳຄັນທີ່ສຸດ ໃນການປັບປຸງ, ເພີ່ມພູນຄູນສ້າງມິດຕະພາບອັນຍິ່ງໃຫຍ່, ຄວາມສາມັກຄີແບບພິເສດ ແລະ ການຮ່ວມມືຮອບດ້ານ ລະຫວ່າງ ຫວຽດນາມ-ລາວ. ພ້ອມດຽວກັນນີ້, ເອກອັກຄະລັດຖະທູດ ຈຳເປັນຕ້ອງມີການປະສານສົມທົບຢ່າງແໜ້ນແຟ້ນ ກັບບັນດາພາກສ່ວນຫລັກແຫລ່ງຂອງສອງປະເທດ ເປັນຕົ້ນ ບັນດາກະຊວງ, ຂະແໜງການ ແລະ ທ້ອງຖິ່ນບາງວຽກງານ ໂດຍສະເພາະ ສະຖານທູດ ກໍຄື ບັນດາອົງການຕາງໜ້າຂອງ ສສ ຫວຽດນາມ ປະຈຳ ສປປ ລາວ ຕ້ອງກຳແໜ້ນເນື້ອໃນຂອງຂໍ້ຕົກລົງຂັ້ນສູງ, ຕິດຕາມການຈັດຕັ້ງປະຕິບັດບັນດາຂໍ້ຕົກລົງດັ່ງກ່າວ, ຂອງກະຊວງ, ຂະແໜງການ ແລະ ທ້ອງຖິ່ນທີ່ກ່ຽວຂ້ອງຂອງແຕ່ລະປະເທດ ແລະ ລາຍງານ, ເສນາທິການ, ສະເໜີທັນທີ ກັບການນຳສອງປະເທດ, ເຮັດວຽກໂດຍກົງ ກັບກະຊວງ, ຂະແໜງການ ແລະ ທ້ອງຖິ່ນຂອງສອງປະເທດ ເພື່ອຊຸກຍູ້ ແລະ ສືບຕໍ່ເປັນຂົວຕໍ່ລະຫວ່າງກະຊວງ, ຂະແໜງການ ແລະ ທ້ອງຖິ່ນຂອງສອງຝ່າຍ ເພື່ອຈັດຕັ້ງປະຕິບັດບັນດາຂໍ້ຕົກລົງດັ່ງກ່າວໃຫ້ໄດ້ດີ, ສືບຕໍ່ປະສານສົມທົບກັບບັນດາສະຫາຍລາວ ຢູ່ນະຄອນຫລວງວຽງຈັນ, ໂດຍສະເພາະ ບັນດາກະຊວງ, ຂະແໜງການຕ່າງໆ ທີ່ເປັນຫລັກແຫລ່ງ, ຮັບຟັງຄຳຄິດເຫັນຂອງບັນດາສະຫາຍ ຕໍ່ການຈັດຕັ້ງປະຕິບັດບັນດາຂໍ້ຕົກລົງດັ່ງກ່າວ ເພື່ອໃຫ້ເຂົາເຈົ້າລາຍງານສ່ອງແສງກັບການນຳຫວຽດນາມ ເພື່ອມີການປັບປຸງ ຫລື ມີມາດຕະການເພີ່ມທະວີຢ່າງທັນການ ຫລື ບັນດາສະຫາຍການນຳຂັ້ນສູງ ສາມາດແລກປ່ຽນເຊິ່ງກັນ ແລະ ກັນ ຍາມມີຄວາມຈຳເປັນ ເພື່ອກະຕຸກຊຸກຍູ້ບັນດາບັນຫາຕ່າງໆ ແລະ ຕ້ອງໄດ້ມີການຜັນຂະຫຍາຍ ໂດຍສະເພາະແມ່ນບັນຫາຕ່າງໆ ທີ່ມີຄວາມຫຍຸ້ງຍາກທາງດ້ານພາວະວິໄສ ແລະ ອັດຕະວິໄສຂອງແຕ່ລະຝ່າຍ.
ທ່ານ ຫງວຽນ ບາຮຸ່ງ ກ່າວຕື່ມວ່າ: ສຳລັບຄົນຮຸ່ນໜຸ່ມຂອງສອງປະເທດ ຫວຽດນາມ-ລາວ ຕ້ອງມີຄວາມເຂົ້າໃຈເລິກເຊິ່ງ ກ່ຽວກັບລັກສະນະອັນຍິ່ງໃຫຍ່, ຄວາມສາມັກຄີແບບພິເສດ ມີໜຶ່ງບໍ່ມີສອງ ລະຫວ່າງສອງຊາດ ເພາະເປັນອະນາຄົດຂອງປະເທດ ແລະ ອະນາຄົດຂອງສາຍພົວພັນດັ່ງ ກ່າວ. ຖ້າຄົນຮຸ່ນໜຸ່ມບໍ່ເຂົ້າໃຈຢ່າງເລິກເຊິ່ງ, ແທ້ຈິງ ແລະ ຈະແຈ້ງຕໍ່ກັບລັກສະນະເປັນຕາຍຂອງສາຍພົວພັນດັ່ງກ່າວ, ເຊິ່ງເຮັດໃຫ້ມີຄວາມຫຍຸ້ງ ຍາກໃນການຮັບຮູ້, ສືບທອດ ແລະ ເພີ່ມພູນຄູນສ້າງສາຍພົວພັນດັ່ງກ່າວໃນອະນາຄົດ. ອາດຢັ້ງຢືນໄດ້ວ່າ ໃນໄລຍະຜ່ານມາການນຳຂອງສອງປະເທດ ໄດ້ເອົາໃຈໃສ່ໃນບັນຫາດັ່ງກ່າວ ແລະ ໃຊ້ທຸກເຫື່ອແຮງ, ເວລາຫລາຍສົມຄວນ ເພື່ອເຮັດວຽກງານໂຄສະນາເຜີຍແຜ່ຄວາມໝາຍຄວາມສຳຄັນ ຂອງສາຍພົວພັນແບບພິເສດ ຫວຽດນາມ-ລາວ, ລາວ-ຫວຽດນາມ ໃຫ້ແກ່ຄົນຮຸ່ນໜຸ່ມຂອງສອງປະເທດ. ຂ້າພະເຈົ້າເຊື່ອໝັ້ນວ່າ ໃນອະນາຄົດຄົນຮຸ່ນໜຸ່ມຂອງພວກເຮົາ ຈະປະກອບສ່ວນສຳຄັນເຂົ້າໃນສາຍພົວພັນດັ່ງກ່າວ, ຮັບຮູ້ມູນເຊື້ອອັນລ້ຳຄ່າ ແລະ ສືບຕໍ່ສ້າງສາຍ ພົວພັນດັ່ງກ່າວ ໃຫ້ນັບມື້ນັບພັດທະນາ ຄືດັ່ງຄວາມຫວັງຂອງການນຳສອງປະເທດ ແລະ ຄືດັ່ງຄຳເວົ້າ ຂອງ ປະທານໂຮ່ ຈິມິງ “ໝັ້ນຄົງທະນົງແກ່ນຕະຫລອດການ”.
（ແຫຼ່ງຂໍ້ມູນ： ມະນີທອນ/ຂປລ）
