ກອງປະຊຸມຄັ້ງທີ 41 ຄະນະກໍາມະການລະຫວ່າງລັດຖະບານແຫ່ງ ສສ ຫວຽດນາມ ແລະ ລັດຖະບານ ສປປ ລາວ.

ໃນກອງປະຊຸມສອງຝ່າຍໄດ້ຮ່ວມມືກັນຕີລາຄາຜົນຂອງການຈັດຕັ້ງປະຕິບັດບົດບັນທຶກກອງປະຊຸມຄັ້ງທີ 40 ກໍ່ຄືຂໍ້ຕົກລົງວ່າດ້ວຍແຜນການຮ່ວມມືປະຈໍາປີ 2018 ແລະ ພ້ອມກັນປຶກສາຫາລືກ່ຽວກັບທິດທາງການຮ່ວມມືໃນປີ 2019. ສອງຝ່າຍໄດ້ຕີລາຄາສູງຕໍ່ບັນດາຜົນສໍາເລັດຂອງການຈັດຕັ້ງປະຕິບັດຂໍ້ຕົກລົງວ່າດ້ວຍແຜນການຮ່ວມມືໃນປີ 2018, ເຊິ່ງບັນລຸຜົນສໍາເລັດໃນຫຼາຍດ້ານເປັນຕົ້ນ: ການແລກປ່ຽນຄະນະຜູ້ແທນຂັ້ນສູງຂອງສອງພັກ, ສອງລັດໄດ້ດໍາເນີນເປັນປົກກະຕິ; ການຮ່ວມມືດ້ານການພັດທະນາຊັບພະກອນມະນຸດກໍ່ໄດ້ຮັບການປັບປຸງດ້ານຄຸນນະພາບ ແລະ ເປີດກວ້າງດ້ວຍຫຼາຍຮູບການ, ປັດຈຸບັນຈໍານວນນັກສຶກສາລາວທີ່ກໍາລັງຄົ້ນຄວ້າຢູ່ ຫວຽດນາມມີທັງໝົດ 14,200 ກວ່າຄົນ; ດ້ານການລົງທຶນ, ມາຮອດປັດຈຸບັນການລົງທຶນຂອງບັນດາວິສາຫະກິດຫວຽດນາມຢູ່ລາວມີຫລາຍກວ່າ 400 ໂຄງການ, ມູນຄ່າ 4.1 ​ຕື້ໂດລາສະຫະລັດ, ຈັດຢູ່ອັນດັບ 3 ໃນຈໍານວນບັນດາປະເທດ ແລະ ເຂດແຄ້ວນ ທີ່ມີວິສາຫະກິດມາລົງທຶນຢູ່ລາວ; ມູນຄ່າການຄ້າລະຫວ່າງສອງປະເທດໃນປີ 2018 ບັນລຸ 1 ຕື້ໂດລາສະຫະລັດ, ເພີ່ມຂຶ້ນ 14% ທຽບໃສ່ໄລຍະດຽວຂອງປີ 2017; ບັນດາກະຊວງ, ຂະແໜງການ, ອົງການຈັດຕັ້ງ, ທ້ອງຖິ່ນຕ່າງໆຂອງສອງຝ່າຍໄດ້ເພີ່ມທະວີການພົວພັນແລກປ່ຽນບົດຮຽນ ແລະ ເປີດກວ້າງການຮ່ວມມືຊ່ວຍເຫຼືອເຊິ່ງກັນ ແລະ ກັນຢ່າງແທດເໝາະກັບຕົວຈິງ ແລະ ມີປະສິດທິຜົນ; ບັນດາກົນໄກ, ນະໂຍບາຍການຮ່ວມມືໄດ້ຮັບການພິຈາລະນາ, ປັບປຸງດັດແກ້ຢ່າງທັນການ, ສອດຄ່ອງກັບສະພາບຕົວຈິງຂອງແຕ່ລະປະເທດກໍ່ຄືລະບຽບການສາກົນ.

ທ່ານ ທອງລຸນ ສິສຸລິດ ນາຍົກລັດຖະມົນຕີແຫ່ງ ສປປ ລາວ ແລະ ທ່ານ ຫງວຽນ ຊວນ ຟຸກ ນາຍົດລັດຖະມົນຕີແຫ່ງ ສສ ຫວຽດນາມ.

ສອງຝ່າຍໄດ້ຕົກລົງເຫັນດີເປັນເອກະພາບກ່ຽວກັບທິດທາງການຮ່ວມມືໃນປີ 2019, ໃນນັ້ນ ສຸມໃສ່ການເພີ່ມທະວີໃນການຮ່ວມມືດ້ານການເມືອງ, ການພົວພັນການຕ່າງປະເທດ, ປ້ອງກັນຊາດ, ຄວາມໝັ້ນຄົງ; ເພີ່ມທະວີການແລກປ່ຽນປະສົບການໃນການສ້າງນະໂຍບາຍຄວາມຫມັ້ນຄົງດ້ານເສດຖະກິດວິລະພາກ, ພັດທະນາແບບຍືນຍົງ, ປັບປຸງການເຊື່ອມຕໍ່ດ້ານເສດຖະກິດຂອງສອງປະເທດ, ໂດຍສະເພາະແມ່ນໃນຂະແໜງການຄົມມະນາຄົມ ແລະ ພະລັງງານ, ການທົບທວນປະສານງານ, ປັບປຸງສະພາບແວດລ້ອມທຸລະກິດ, ການລົງທຶນ, ພື້ນຖານໂຄງລ່າງການເຊື່ອມຕໍ່ດ້ານການຄົມມະນາຄົມ, ສ້າງເງື່ອນໄຂທີ່ດີກວ່າເກົ່າໃຫ້ແກ່ວິສາຫະກິດ, ສູ້ຊົນເຮັດໃຫ້ມູນຄ່າການຄ້າສອງຝ່າຍເພີ່ມຂຶ້ນຢ່າງໜ້ອຍແມ່ນ 10 % ໃນປີ 2019; ສືບຕໍ່ໃຫ້ຄວາມບູລິມະສິດ ແລະ ສຸກຍຸ້ຍົກສູງຄຸນນະພາບໃນການຮ່ວມມືດ້ານການສຶກສາ - ບໍາລຸງກໍ່ສ້າງ ແລະ ພັດທະນາແຫຼ່ງຊັບພະຍາກອນມະນຸດ, ໃນນັ້ນ ມີການເຮັດທົດລອງເອົາບັນດາເນື້ອໃນຂອງໂຄງການປະຫວັດສາດຂອງສາຍພົວພັນພິເສດລະຫວ່າງຫວຽດນາມ ແລະ ລາວ ເຂົ້າໃນຫຼັກສູດການສອນຢູ່ທີ່ບັນດາໂຮງຮຽນຂອງສອງປະເທດ; ບັນດາກະຊວງ, ຂະແໜງການ, ທ້ອງຖິ່ນຂອງສອງປະເທດສືບຕໍ່ການຊຸກຍຸ້ແລກປ່ຽນ, ການຮ່ວມມືຢ່າງແທ້ຈິງ, ມີປະສິດທິຜົນໃນຂົງເຂດວັດທະນະທໍາ, ວິທະຍາສາດ, ສັງຄົມ, ຂໍ້ມູນການສື່ສານ, ກິລາ, ສາທາລະນະສຸກ, ພາຍໃນ, ຍຸດຕິທໍາ...

ໃນຄວາມເຊື່ອຫມັ້ນອັນພິເສດ, ທັງສອງຝ່າຍໄດ້ຕົກລົງເຫັນດີທີ່ຈະສືບຕໍ່ປະສານງານຢ່າງແໜ້ນແຟ້ນ, ສອງປະເທດໄດ້ສະຫນັບສະຫນູນ ແລະ ຮ່ວມມືກັນຢ່າງແຫນ້ນແຟ້ນພາຍໃຕ້ຂອບເຂດບັນດາເວທີໃນພາກພື້ນ ແລະ ສາກົນ; ການເຊື່ອມຕໍ່ຂອງປະຊາຄົມອາຊຽນ, ເພີ່ມທະວີຄວາມສາມັກຄີ, ມີພາລະບົດບາດຕົ້ນຕໍໃນປະຊາຄົມອາຊຽນກ່ຽວກັບບັນດາບັນຫາຍຸດທະສາດຂອງພາກພື້ນ, ລວມທັງບັນຫາທະເລຈີນໃຕ້; ໄດ້ຕົກລົງຮ່ວມມືກັນໃນການຄຸ້ມຄອງ ແລະ ນໍາໃຊ້ຊັບພະຍາກອນນໍ້າຂອງແມ່ນໍ້າຂອງ. ສປປ ລາວ ຢືນຢັນການສະຫນັບສະຫນູນ ສສ ຫວຽດນາມ ທີ່ຈະເປັນສະມາຊິກບໍ່ຖາວອນຂອງສະພາຄວາມຫມັ້ນຄົງສະຫະປະຊາຊາດໃນໄລຍະ 2020-2021.

ພິທີລົງນາມບັນດາເອກະສານການຮ່ວມມືໃນປີ 2019.

ທີ່ກອງປະຊຸມ, ທ່ານ ທອງລຸນ ສິສຸລິດ ນາຍົກລັດຖະມົນຕີແຫ່ງ ສປປ ລາວ ແລະ ທ່ານ ຫງວຽນ ຊວນ ຟຸກ ນາຍົດລັດຖະມົນຕີແຫ່ງ ສສ ຫວຽດນາມ ໄດ້ເປັນສັກຂິພະຍານພິທີລົງນາມເອກະສານການຮ່ວມມື 06 ສະບັບ ຄື:

 1) ຂໍ້ຕົກລົງກ່ຽວກັບແຜນການຮ່ວມມືລະຫວ່າງລັດຖະບານຫວຽດນາມ ແລະ ລັດຖະບານລາວໃນ ປີ 2019;

 2) ບົດບັນທຶກກອງປະຊຸມຄັ້ງທີ 41 ຄະນະກໍາມະການລະຫວ່າງລັດຖະບານແຫ່ງ ສສ ຫວຽດນາມ ແລະ ລັດຖະບານ ສປປ ລາວ ກ່ຽວກັບການຮ່ວມມືສອງຝ່າຍ;

 3) ຂໍ້ຕົກລົງກ່ຽວກັບລັດຖະບານຫວຽດນາມຊ່ວຍເຫຼືອແນວພັນເຂົ້າດ້ວຍຈໍານວນ 300 ໂຕ່ນ ໃຫ້ແກ່ລັດຖະບານລາວ; 

 4)ຂໍ້ຕົກລົງກ່ຽວກັບແຜນການຮ່ວມມືດ້ານການສຶກສາ ປີ 2019 ລະຫວ່າງກະຊວງການສຶກສາ ແລະ ບໍາລຸງກໍ່ສ້າງ ສສ ຫວຽດນາມ ແລະ ກະຊວງສຶກສາ ແລະ ກິລາ ສປປ ລາວ;

 5) ບົດບັນທຶກມອບ-ຮັບໂຄງການສະຖານີໂທລະພາບຢູ່ແຂວງສະຫວັນນະເຂດ ສປປ ລາວ; 

 6) ບົດບັນທຶກມອບ-ຮັບໂຄງການຄະນະພາກວິຊາພາສາຫວຽດນາມຢູ່ມະຫາວິທະຍາໄລສຸພານຸວົງ ແລະ ມະຫາວິທະຍາໄລຈໍາປາສັກ, ຫໍພັກນັກສຶກສາຕ່າງປະເທດຢູ່ມະຫາວິທະຍາໄລແຫ່ງຊາດລາວ ແລະ ໂຮງຮຽນມັດທະຍົມມິດຕະພາບ ລາວ - ຫວຽດນາມ ໄລຍະທີ 2. 

（ໄຊພອນ）